'ರಜನಿಕಾಂತ್ ಜತೆ ದ್ವೀಪದಲ್ಲಿ ಏಕಾಂತದಲ್ಲಿರಲು ಬಯಸುವೆ'

'ಮರ್ಡರ್' ಖ್ಯಾತಿಯ ನಟಿ ಮಲ್ಲಿಕಾ ಶೆರಾವತ್ 'ದಿ ಬ್ಯಾಚಲರೇಟ್ ಇಂಡಿಯಾ ಮೇರೆ ಖಯಾಲೋಂಕಿ ಮಲ್ಲಿಕಾ' ರಿಯಾಲ್ಟಿ ಷೋಗಾಗಿ ಹಲವಾರು ಸಾಹಸ/ಗಿಮಕ್ ಗಳನ್ನು ಮಾಡುತ್ತಿದ್ದಾರೆ.

Life OK ಚಾನೆಲಿನಲ್ಲಿ ಅಕ್ಟೋಬರ್ 7ರಿಂದ ಪ್ರಸಾರವಾಗುತ್ತಿರುವ The Bachelorette India - Mere Khayalon ki Mallika ರಿಯಾಲ್ಟಿ ಷೋ ಪ್ರೊಮೋ ಧಾವಂತದಲ್ಲಿರುವ ಅವಿವಾಹಿತೆ ಮಲ್ಲಿಯನ್ನು 'ದ್ವೀಪ ಪ್ರದೇಶದಲ್ಲಿ ಏಕಾಂತದಲ್ಲಿರುವಾಗ ನಿನ್ನ ಕಾಂತ ಯಾರಾಗಿರಬೇಕೆಂದು ಬಯಸುವೆ?' ಎಂದು ಕೇಳಿದ್ದಕ್ಕೆ 'ಸೂಪರ್ ಸ್ಟಾರ್ ರಜನಿಕಾಂತ್' ಎಂದು ಪಟ್ಟನೆ ಉತ್ತರಿಸಿದ್ದಾಳೆ.

'ಅದ್ಯಾಕಮ್ಮಿ ಮಲ್ಲಿ ಹಂಗೇಳ್ತೀಯಾ?' ಎಂದು ಮತ್ತಷ್ಟು ಕೆದಕಿದ್ದಕ್ಕೆ 'ರಜನಿ ಇದ್ದ ಕಡೆ ಜೀವನ ಬೋರ್ ಎಂಬ ಮಾತೇ ಇಲ್ಲ! ಆತನೊಟ್ಟಿಗೆ ಇದ್ದರೆ ಒಂದೊಂದು ಕ್ಷಣವೂ ರಸವತ್ತಾಗಿರುತ್ತದೆ. ಆತ ಹಾಗೆ ನೋಡಿಕೊಳ್ಳುತ್ತಾನೆ ಎಂಬ ವಿಶ್ವಾಸ ನನ್ನದು. ಮತ್ತೂ ಹೇಳಬೇಕು ಅಂದರೆ ಅಕಸ್ಮಾತ್ ನಾನು ಎಲ್ಲಾದರೂ ಹೋಗಬೇಕು ಅಂದರೆ ಆತ ನನಗೆ ಇಡೀ ದ್ವೀಪವನ್ನು ಸುತ್ತಿಸುತ್ತಾರೆ' ಎಂದು ಹುಬ್ಬೆಗರಿಸಿದ್ದಾಳೆ.

'ಅಮ್ಮಿ, ನಿನಗೆ ಅಮಿತಾಭ್ ಇಷ್ಟವೋ ಅಥವಾ ನಾಸೀರುದ್ದೀನ್ ಷಾ ಇಷ್ಟವೋ?' ಎಂದೂ ಕೇಳಲಾಗಿ ನಟಿ ಮಲ್ಲಿಕಾ ಇಬ್ಬರ ಬಗ್ಗೆಯೂ ಸಮಾನ ದೃಷ್ಟಿಕೋನವಿದೆ ಎಂದು ಉಲಿದಿದ್ದಾಳೆ. ಬಾಲಿವುಡ್ ಮೇರುಪರ್ವತ ಅಮಿತಾಭ್ ಬಗ್ಗೆ ನನಗೆ ಅಪಾರ ಗೌರವಾದರಗಳಿವೆ. ಇನ್ನು ನಾಸೀರುದ್ದೀನ್ ಷಾರನ್ನು ನಿಜಕ್ಕೂ ಪ್ರೀತಿಸುವೆ. 'ಡರ್ಟಿ ಪಾಲಿಟಿಕ್ಸ್' ಸಿನಿಮಾದಲ್ಲಿ ಆತನೊಂದಿಗೆ ನಟಿಸುತ್ತಿದ್ದೇನೆ' ಎಂದು 'ಪ್ಯಾರ್ ಕೆ ಸೈಡ್ ಎಫೆಕ್ಟ್ಸ್' ಹೀರೋಯಿನ್ ಹೇಳಿಕೊಂಡಿದ್ದಾಳೆ.