ಅಂತೂ ಇಂತೂ ನಟಿ ಚಂದ್ರಿಕಾ ಆಟದಿಂದ ಔಟ್

ಈ ವಾರ ಈಟಿವಿ ಕನ್ನಡ ವಾಹಿನಿಯ 'ಬಿಗ್ ಬಾಸ್' ಕಾರ್ಯಕ್ರಮದಲ್ಲಿ ಮೂವರು ನಾಮಿನೇಟ್ ಆಗಿದ್ದರು. ಚಂದ್ರಿಕಾ, ಅರುಣ್ ಸಾಗರ್ ಹಾಗೂ ವಿಜಯ್ ರಾಘವೇಂದ್ರ. ಮೂವರಲ್ಲಿ ಯಾರು ಮನೆಗೆ ಹೋಗಲಿದ್ದಾರೆ ಎಂಬ ಬಗ್ಗೆ ತೀವ್ರ ಕುತೂಹಲ ಮನೆ ಮಾಡಿತ್ತು. ಕಡೆಗೂ ಚಂದ್ರಿಕಾ ಅವರು ಆಟದಿಂದ ಔಟ್ ಆಗಿದ್ದಾರೆ.

ಈಗ ನಿಕಿತಾಗೆ ಸ್ಪರ್ಧಿಯೇ ಇಲ್ಲದಂತಾಗಿದೆ. ಮನೆಯಲ್ಲಿ ಉಳಿದಿರುವ ಏಕೈಕ ನಾರಿಮಣಿ ಎಂದರೆ ನಿಕಿತಾ. ಇನ್ನು ನರೇಂದ್ರ ಬಾಬು ಶರ್ಮಾ, ಅರುಣ್ ಸಾಗರ್ ಹಾಗೂ ವಿಜಯ್ ರಾಘವೇಂದ್ರ ಅವರು ಮನೆಯಲ್ಲಿ ಉಳಿದುಕೊಂಡಿದ್ದಾರೆ.

ಕಳೆದ 82 ದಿನಗಳಲ್ಲಿ ಚಂದ್ರಿಕಾ ಅವರು ಬಿಗ್ ಬಾಸ್ ಶೋ ಮೂಲಕ ಕಿರುತೆರೆ ವಾಹಿನಿ ವೀಕ್ಷಕರಿಗೆ ಮತ್ತಷ್ಟು ಹತ್ತಿರವಾಗಿದ್ದಾರೆ. ಅವರನ್ನು ಹತ್ತಿರದಿಂದ ನೋಡಿದಂತಾಗಿದೆ. ಅವರ ಮನಸ್ಥಿತಿಯನ್ನು ಅರ್ಥ ಮಾಡಿಕೊಳ್ಳುವಂತಾಗಿದೆ.

ಸಣ್ಣಪುಟ್ಟ ವಿಷಯಕ್ಕೂ ತಮ್ಮ ಮಗು ಮೇಲೆ ಆಣೆ ಮಾಡುತ್ತಿದ್ದ ಚಂದ್ರಿಕಾ ತಾವು ತುಂಬಾ ಜಗಳಗಂಟಿ ಎಂಬುದೂ ಈ ಕಾರ್ಯಕ್ರಮದ ಮೂಲಕ ವೀಕ್ಷಕರಿಗೆ ಗೊತ್ತಾಯಿತು. ಅವರ ಈ ಸ್ವಭಾವ ಬಹಳಷ್ಟು ಮಂದಿಗೆ ಬೇಸರವನ್ನೂ ತರೆಸಿದ್ದು ಸುಳ್ಳಲ್ಲ.