ಕೆಲವೇ ದಿನಗಳಲ್ಲಿ ಪ್ರೇಕ್ಷಕರ ನೆಚ್ಚಿನ 'ಕಮಲಿ' ಧಾರಾವಾಹಿ ಅಂತ್ಯ?

ಕಮಲಿಯಾಗಿ ಅಮೂಲ್ಯ ಓಂಕಾರ್

ಜೀ ಕನ್ನಡದಲ್ಲಿ ಪ್ರಸಾರವಾಗುವ 'ಕಮಲಿ' ಧಾರಾವಾಹಿ ತುಂಬಾ ಜನಪ್ರಿಯತೆ ಪಡೆದಿದೆ. ಈ ಧಾರಾವಾಹಿ ಶುರುವಾಗಿ ನಾಲ್ಕು ವರ್ಷಗಳೇ ಉರುಳಿವೆ. 2018ರ ಮೇ ತಿಂಗಳಲ್ಲಿ ಈ ಧಾರಾವಾಹಿ ಮೊದಲು ಆರಂಭವಾಗಿತ್ತು. ಈ ಧಾರಾವಾಹಿಯಲ್ಲಿ ಕಮಲಿ ಪಾತ್ರವನ್ನು ನಿರ್ವಹಿಸುತ್ತಿರುವವರು ಅಮೂಲ್ಯಾ ಒಂಕಾರ್ ಗೌಡ. ಈ ಹಿಂದೆ ಅವರು 'ಅರಮನೆ' ಎಂಬ ಧಾರಾವಾಹಿಯಲ್ಲಿ ಮಾಡರ್ನ್ ಹುಡುಗಿಯಾಗಿ ಕಾಣಿಸಿಕೊಂಡಿದ್ದರು. ಆದರೆ 'ಕಮಲಿ' ಧಾರಾವಾಹಿಯಲ್ಲಿ ಪಕ್ಕಾ ಹಳ್ಳಿ ಹುಡುಗಿಯಾಗಿ ಕಾಣಿಸಿಕೊಂಡಿದ್ದಾರೆ. 'ಕಮಲಿ' ಧಾರಾವಾಹಿ ಒಂದು ಹಳ್ಳಿ ಹುಡುಗಿಯ ಸುತ್ತ ಹೆಣೆದಿರುವ ಕಥೆ.

ಪದೇ ಪದೇ ಪ್ರಸಾರದ ಸಮಯ ಬದಲು

ಖ್ಯಾತ ನಿರ್ದೇಶಕ ಅರವಿಂದ್ ಕೌಶಿಕ್ ಈ ಧಾರಾವಾಹಿಯ ಸಾರಥಿ ಆಗಿದ್ದಾರೆ. ನಿರ್ದೇಶನದ ಜೊತೆಗೆ ನಿರ್ಮಾಣವನ್ನು ಕೂಡ ಅವರೇ ಮಾಡಿದ್ದಾರೆ. ಪದ್ಮವಾಸಂತಿ, ಯಮುನಾ ಶ್ರೀನಿಧಿ, ನಿರಂಜನ್ ಬಿ ಎಸ್, ಗ್ಯಾಬ್ರಿಯೆಲಾ ಸ್ಮಿತ್, ಸುಹಾಸ್, ಅಂಕಿತಾ, ಮೈಕೋ ಮಂಜು ಸೇರಿದಂತೆ ಅನೇಕ ಪ್ರತಿಭಾನ್ವಿತ ಕಲಾವಿದರಿದ್ದಾರೆ. ಈ ಧಾರಾವಾಹಿ ಶುರುವಾದಾಗ ಟಾಪ್ ಲಿಸ್ಟ್‌ನಲ್ಲಿತ್ತು. ಬರಬರುತ್ತಾ ಟಿಆರ್‌ಪಿ ರೇಟಿಂಗ್ ಕಡಿಮೆಯಾಗ ತೊಡಗಿತು. ಅದರ ಜೊತೆಗೆ 'ಕಮಲಿ' ಧಾರಾವಾಹಿ ಪ್ರಸಾರದ ಸಮಯವೂ ಬದಲಾಗುತ್ತಾ ಹೋಯ್ತು. ಈಗ ರಾತ್ರಿ 10 ಗಂಟೆಗೆ ಪ್ರಸಾರವಾಗುತ್ತಿದೆ.

ದ್ವೇಷ ಕಾರುತ್ತಿರುವ ಅನಿಕಾ

ಇನ್ನು ಸದ್ಯ ಕಮಲಿ ತನ್ನ ಪ್ರೀತಿಯ ಮೇಷ್ಟ್ರು ರಿಷಿಯನ್ನು ಪ್ರೀತಿಸಿ ಮದುವೆಯಾಗಿದ್ದಾಳೆ. ಆದರೆ ಸುಖ ಸಂಸಾರ ನಡೆಸಲು ಅನಿಕಾ ಬಿಡುತ್ತಿಲ್ಲ. ಪದೇ ಪದೇ ಒಂದಲ್ಲ ಒಂದು ಸಮಸ್ಯೆಗಳನ್ನು ರಿಷಿ ಮತ್ತು ಕಮಲಿ ಜೋಡಿ ಎದುರಿಸುತ್ತಿದೆ. ಎಷ್ಟು ಸಲ ಬುದ್ಧಿ ಹೇಳಿದರೂ ಕೇಳದ ಅನಿಕಾ, ಪದೇ ಪದೇ ಕಮಲಿ ಹಾಗೂ ರಿಷಿಗೆ ತೊಂದರೆ ಕೊಡುತ್ತಿದ್ದಾಳೆ. ಒಂದು ಕಡೆ ಕಮಲಿ ತಾನು ಇಷ್ಟಪಟ್ಟ ರಿಷಿಯನ್ನು ಮದುವೆಯಾಗಿದ್ದಾಳೆ. ಮತ್ತೊಂದು ಕಡೆ ತನ್ನ ಮಲತಾಯಿಯ ಮಗಳು ಕಮಲಿ. ಹೀಗಾಗಿ ಅನಿಕಾ ಸದಾ ಕಮಲಿ ಮೇಲೆ ದ್ವೇಷ ಕಾರುತ್ತಿರುತ್ತಾಳೆ.

ಕಮಲಿ ಧಾರಾವಾಹಿಯೂ ಅಂತ್ಯವಾಗುತ್ತಾ..?

ಇನ್ನು ಈ ಧಾರಾವಾಹಿಯನ್ನು ನೋಡುವವರ ಸಂಖ್ಯೆ ಕಡಿಮೆಯಾಗಿದೆ. ಒಂದು ಸಮಯ ಬದಲಾವಣೆ ಕಾರಣವಾದರೆ, ಮತ್ತೊಂದು ಕಥೆ ಎಳೆದಂತೆ ಭಾವಿಸುತ್ತಿದೆ. ಹೀಗಾಗಿ ಪ್ರೇಕ್ಷಕರು 'ಕಮಲಿ' ಧಾರಾವಾಹಿಯನ್ನು ನೋಡುವುದನ್ನು ಕಡಿಮೆ ಮಾಡಿದ್ದಾರೆ. ಈಗ ಜೀ ಕನ್ನಡದಲ್ಲಿ ಹಲವು ಹೊಸ ಧಾರಾವಾಹಿಗಳು ಬರಲು ಕಾಯುತ್ತಿವೆ. ಹಾಗಾಗಿ 'ನಾಗಿಣಿ-2' ಧಾರಾವಾಹಿಯನ್ನು ಅಂತ್ಯ ಮಾಡಲು ಸಿದ್ಧತೆ ನಡೆದಿವೆ. ಅದರ ಜೊತೆಗೆ ಈಗ 'ಕಮಲಿ' ಧಾರಾವಾಹಿಯ ಕೊನೆಯ ಎಪಿಸೋಡ್ ಕೂಡ ಶೂಟ್ ಆಗಿದೆಯಂತೆ. ಹಾಗಾಗಿ ಇನ್ನೇನು ಕೆಲವೇ ದಿನಗಳಲ್ಲಿ ಈ ಧಾರಾವಾಹಿಯು ಅಂತ್ಯವಾಗುತ್ತಿದೆ ಎನ್ನಲಾಗಿದೆ.