ಕರೋಡ್ ಪತಿ ಬಂಪರ್ ಬಹುಮಾನ ರು.7 ಕೋಟಿ

ಕನ್ನಡದ ಕೋಟ್ಯಾಧಿಪತಿ ಬಹುಮಾನದ ಮೊತ್ತ ರು.1 ಕೋಟಿ ಇತ್ತು. ನಾಲ್ಕು ಲೈಫ್ ಲೈನ್ ಗಳನ್ನು ಬಳಸಿಕೊಂಡು ತಮ್ಮ ಬುದ್ಧಿವಂತಿಕೆಯನ್ನು ಪ್ರದರ್ಶಿಸುತ್ತಾ ಒಂದು ಕೋಟಿ ಗೆಲ್ಲುವ ಸದಾವಕಾಶ ಕಲ್ಪಿಸಲಾಗಿತ್ತು. ಇದು ಕನ್ನಡದ ಕೋಟ್ಯಾಧಿಪತಿ ಮಾತಾಯಿತು. ಈಗ ಹಿಂದಿಯ 'ಕೌನ್ ಬನೇಗಾ ಕರೋಡ್ ಪತಿ' ಏಳನೇ ಸೀಸನ್ 2013 ಸೆಪ್ಟೆಂಬರ್ 6ರಿಂದ ಶುರುವಾಗುತ್ತಿದೆ.

ಹೊಸ ಸೀಸನ್ ವಿಶೇಷ ಏನೆಂದರೆ ಬಹುಮಾನದ ಮೊತ್ತವನ್ನು ರು.7 ಕೋಟಿಗೆ ಏರಿಸಲಾಗಿದೆ. ಹಾಗೆಯೇ ನಾಲ್ಕು ಲೈಫ್ ಲೈನ್ ಗಳ ಬದಲಾಗಿ ಐದು ಲೈಫ್ ಲೈನ್ ಗಳನ್ನು ಈ ಬಾರಿಯ ಸೀಸನ್ ನಲ್ಲಿ ನೀಡಲಾಗುತ್ತಿದೆ. ಸೋನಿ ಎಂಟರ್ ಟೈನ್ ಮೆಂಟ್ ಟೆಲಿವಿಷನ್ ನಲ್ಲಿ ಸೆಪ್ಟೆಂಬರ್ 6ರಿಂದ ಹೊಸ ಸೀಸನ್ ಆರಂಭ.

ಇಷ್ಟು ದಿನ ಬಿಗ್ ಬಿ ಅಮಿತಾಬ್ ಬಚ್ಚನ್ ನಡೆಸಿಕೊಡುತ್ತಿದ್ದ ಈ ಶೋ ಮುಂಬೈ ಗುರಗಾಂವ್ ನ ಫಿಲಿಂಸಿಟಿಯಲ್ಲಿ ನಡೆಯುತ್ತಿತ್ತು. ಈಗ ಮುಂಬೈನ ಅಂಧೇರಿ ಪಶ್ವಿಮ ಭಾಗದಲ್ಲಿರುವ ಯಶ್ ರಾಜ್ ಫಿಲಂಸ್ ಸ್ಟುಡಿಯೋದಲ್ಲಿ ನಡೆಯಲಿದೆ. ಇದಕ್ಕಾಗಿ ಭರ್ಜರಿ ಸೆಟ್ ಸಹ ಹಾಕಲಾಗಿದೆ.

ಕೌನ್ ಬನೇಗಾ ಕರೋಡ್ ಪತಿ ಏಳನೇ ಸೀಸನ್ ಕುರಿತು ಗುರುವಾರ (ಆ.29) ಮುಂಬೈನಲ್ಲಿ ಪತ್ರಿಕಾಗೋಷ್ಠಿ ನಡೆಯಲಿದೆ. ಬಿಗ್ ಬಿ ಅಮಿತಾಬ್ ಬಚ್ಚನ್ ಸಹ ಪಾಲ್ಗೊಳ್ಳುತ್ತಿದ್ದು ಅಧಿಕೃತ ವಿವರಗಳನ್ನು ನೀಡಲಿದ್ದಾರೆ. ಎಪ್ಪತ್ತರ ಹರೆಯದ ಬಿಗ್ ಬಿ ಈ ಬಾರಿ ಏನು ಮೋಡಿ ಮಾಡಲಿದ್ದಾರೆ ಎಂಬ ಕುತೂಹಲ ಕಿರುತೆರೆ ವೀಕ್ಷಕರಿಗೆ ಇದ್ದೇ ಇದೆ. (ಏಜೆನ್ಸೀಸ್)