ಬಿಗ್ ಬಾಸ್ ಕನ್ನಡ ಹೊಸ ಆವೃತ್ತಿ ಮತ್ತೆ ಮುಂದೂಡಿಕೆ ಅಂತೆ?

ಜನವರಿಯಲ್ಲಿ ಇರಲ್ಲ ಬಿಗ್ ಬಾಸ್!

ಕಲರ್ಸ್ ವಾಹಿನಿಯ ಮೂಲಗಳು ತಿಳಿಸಿರುವಂತೆ ''ಜನವರಿಯಲ್ಲಿ ಬಿಗ್ ಬಾಸ್ ಇರುವುದಿಲ್ಲ. ಬದಲಾಗಿ ಮಾರ್ಚ್ ಅಂತ್ಯದ ವೇಳೆ ಬಿಗ್ ಬಾಸ್ ಏಂಟನೇ ಆವೃತ್ತಿ ಶುರುವಾಗಬಹುದು. ಈ ಕಾರ್ಯಕ್ರಮಕ್ಕೆ ಸಂಬಂಧಿಸಿದಂತೆ ಎಲ್ಲ ತಯಾರಿ ನಡೆಯುತ್ತಿದೆ. ಸ್ಪರ್ಧಿಗಳ ಆಯ್ಕೆ ಸಹ ಬಹುತೇಕ ಅಂತ್ಯವಾಗಿದೆ'' ಎಂದು ತಿಳಿದು ಬಂದಿದೆ.

ಪ್ರೈಮ್ ಸಮಯದಲ್ಲಿ ಸ್ಲಾಟ್ ಸದ್ಯಕ್ಕಿಲ್ಲ

ಕಲರ್ಸ್ ಕನ್ನಡ ವಾಹಿನಿಯಲ್ಲಿ ಬಿಗ್ ಬಾಸ್ ಪ್ರಸಾರವಾಗಲಿದೆ. ಸದ್ಯಕ್ಕೆ ಪ್ರೈಮ್ ಸಮಯದಲ್ಲಿ ಬಿಗ್ ಬಾಸ್‌ಗೆ ಸ್ಲಾಟ್ ಇಲ್ಲ. ಮಜಾ ಭಾರತ ಮತ್ತು ಮಜಾ ಟಾಕೀಸ್ ಕಾರ್ಯಕ್ರಮಗಳು ನಡೆಯುತ್ತಿದೆ. ಬಿಗ್ ಬಾಸ್ ಆರಂಭವಾಗುತ್ತಿದ್ದಂತೆ ಈ ಶೋಗಳ ಸಮಯವೂ ಬದಲಾಗಲಿದೆ ಎಂದು ಹೇಳಲಾಗಿದೆ.

ಸುದೀಪ್ ಜೊತೆಗೆ ಚರ್ಚೆಯಾಗಿದೆ

ಬಿಗ್ ಬಾಸ್ ಕನ್ನಡ ಏಂಟನೇ ಆವೃತ್ತಿಗೆ ಸಂಬಂಧಿಸಿದಂತೆ ನಿರೂಪಕ, ನಟ ಸುದೀಪ್ ಜೊತೆ ಈಗಾಗಲೇ ಚರ್ಚೆಯಾಗಿದೆ. ಸುದೀಪ್ ಮತ್ತು ಪರಮೇಶ್ವರ್ ಗುಂಡ್ಕಲ್ ಭೇಟಿ ಮಾಡಿ ಮಾತುಕತೆ ನಡೆಸಿರುವ ಫೋಟೋವನ್ನು ಸ್ವತಃ ಗುಂಡ್ಕಲ್ ಫೇಸ್‌ಬುಕ್‌ನಲ್ಲಿ ಹಂಚಿಕೊಂಡಿದ್ದರು. ''ಹೊಸ ಆವೃತ್ತಿಯ ತಯಾರಿ'' ಎಂದು ಕ್ಯಾಪ್ಷನ್ ಹಾಕಿದ್ದರು.

ಡ್ರೋನ್ ಪ್ರತಾಪ್, ಹನುಮಂತನ ಮೇಲೆ ಎಲ್ಲರ ಕಣ್ಣು

ಏಂಟನೇ ಆವೃತ್ತಿಯ ಬಿಗ್ ಬಾಸ್‌ನಲ್ಲಿ ಯಾರೆಲ್ಲ ಭಾಗವಹಿಸಬಹುದು ಎಂಬ ಚರ್ಚೆ ಈಗಾಗಲೇ ದೊಡ್ಡ ಮಟ್ಟದಲ್ಲಿ ನಡೆಯುತ್ತಿದೆ. ಈ ವರ್ಷ ಹೆಚ್ಚು ಸುದ್ದಿಯಲ್ಲಿದ್ದ ಡ್ರೋನ್ ಪ್ರತಾಪ, ಸರಿಗಮಪ ಖ್ಯಾತಿಯ ಹನುಮಂತ, ಟಿಕ್ ಟಾಕ್ ಸುಂದರಿ ಸೋನು ಗೌಡ ಸೇರಿದಂತೆ ಹಲವರ ಹೆಸರು ಕೇಳಿ ಬರುತ್ತಿದೆ.