ಜಾನ್ ಮೂಗಿಗೆ ಕೊಟ್ಟ ಅವನು ಸಕತ್ ಪಂಚ್!

ಜಾನ್ ಅಬ್ರಹಾಂ

ಚಿತ್ರೀಕರಣದ ವೇಳೆಯಲ್ಲಿ ಈ ರೀತಿ ಗೂಸಾ ತಿನ್ನುವುದು ಜಾನ್ ಗೆ ಮಾಮೂಲಿ ಎನ್ನಬಹುದು. ಫೋರ್ಸ್ ಚಿತ್ರದ ವೇಳೆಯಲ್ಲಿ ಕೂಡಾ ಜಾನ್ ಗೆ ಸಕತ್ ಪೆಟ್ಟು ಬಿದ್ದಿತ್ತು. ಆದರೆ, ಈ ಬಾರಿ ಬಿದ್ದ ಗೂಸಾ ಕೊಂಚ ಹೆಚ್ಚಿನ ನೋವು ನೀಡುತ್ತಿದೆ.

ವರದಿಗಳ ಪ್ರಕಾರ ಸಂಜಯ್ ಗುಪ್ತ ಅವರ ಶೂಟೌಟ್ ಅಟ್ ವಡಾಲ ಚಿತ್ರದ ಫೈಟಿಂಗ್ ಸೀನ್ ನಲ್ಲಿ ಜ್ಯೂ. ಕಲಾವಿದನೊಬ್ಬ ಜಾನ್ ಮೂಗಿಗೆ ಸಕತ್ ಪಂಚ್ ಕೊಟ್ಟಿದ್ದಾನೆ. ಜಾನ್ ಮೂಗಿನಿಂದ ರಕ್ತ ಬಳಬಳನೆ ಹರಿದಿದೆ. ರಕ್ತ ಕಂಡು ಟಫ್ ಹುಡುಗ ಜಾನ್ ಕೂಡ ಒಂದು ಕ್ಷಣ ಅವಾಕ್ಕಾಗಿದ್ದಾನೆ.

ಮೆದವಾಗಿ ಬಾರಿಸಬೇಕಿದ್ದ ಜ್ಯೂ.ಕಲಾವಿದ ಯಾಕೆ ರೀತಿ ಮಾಡಿದ ಎಂದು ಚಿತ್ರತಂಡ ಚಿಂತೆಗೀಡಾಗಿದೆ. ಆದರೆ, ಇದೊಂದು ಆಕಸ್ಮಿಕ ಘಟನೆ ಎಂದು ನಿರ್ಧರಿಸಲಾಗಿದೆ. ಜಾನ್ ಗೆ ಚಿಕಿತ್ಸೆ ನೀಡಲಾಗಿದ್ದು, ಆತಂಕಕ್ಕೆ ಕಾರಣವಿಲ್ಲ ಎನ್ನಲಾಗಿದೆ.

ಆದರೆ, ಜಾನ್ ಏಕೆ ಈ ರೀತಿ ಪದೇ ಪದೇ ಒದೆ ತಿನ್ನುತ್ತಾನೆ ಎಂಬುದು ಕುತೂಹಲಕಾರಿಯಾಗಿದೆ. ಈ ಚಿತ್ರದಲ್ಲಿ 1982ರಲ್ಲಿ ಮುಂಬೈ ಪೊಲೀಸ್ ಗುಂಡಿಗೆ ಬಲಿಯಾದ ಮಾನ್ಯ ಸುರ್ವೆ ಎಂಬ ಗ್ಯಾಂಗ್ ಸ್ಟರ್ ಪಾತ್ರದಲ್ಲಿ ಜಾನ್ ಕಾಣಿಸಿಕೊಂಡಿದ್ದಾನೆ.