ಐಟಂ ಗರ್ಲ್ ಆಗಿ ಬದಲಾದ ಬೆಡಗಿ ವಿದ್ಯಾ ಬಾಲನ್

ಊ ಲಾ ಲಾ ಎಂದು ಎದೆಯುಬ್ಬಿಸಿ ಕುಣಿದು ಪಡ್ಡೆಗಳ ಹೃದಯಕ್ಕೆ ಕಿಚ್ಚಿಟ್ಟಿದ್ದ ವಿದ್ಯಾ ಬಾಲನ್‌ಗೆ ಮತ್ತೊಂದು ಮಸ್ತ್ ಆಫರ್ ಬಂದಿದೆ. ವಿಧು ವಿನೊದ್ ಚೋಪ್ರಾ ನಿರ್ಮಾಣದ 'ಫೆರಾರಿ ಕಿ ಸವಾರಿ' ಚಿತ್ರದಲ್ಲಿ ಐಟಂ ಪಾತ್ರ ಸಿಕ್ಕಿದೆ. ಈ ಚಿತ್ರದ ಹಾಡಿನಲ್ಲಿ ವಿದ್ಯಾ ಗ್ಲಾಮರಸ್ ಆಗಿ ಕಾಣಿಸಲಿದ್ದಾರೆ.

ವಿದ್ಯಾ ಈ ಹಿಂದೆಂದೂ ಈ ರೀತಿಯ ಹಾಡಿನಲ್ಲಿ ಕುಣಿದಿರಲಿಲ್ಲ. ಈ ಹಾಡಿನ ಕಾನ್ಸೆಪ್ಟ್ ವಿಭಿನ್ನವಾಗಿದ್ದು ಚಿತ್ರೀಕರಣ ಮುಂಬರುವ ದಿನಗಳಲ್ಲಿ ನಡೆಯಲಿದೆ. ಈ ಹಾಡು ಬಾಲಿವುಡ್‌ನ ಮತ್ತೊಂದು ವಿಭಿನ್ನ ಐಟಂ ಹಾಡಾಗಿ ಹೊರಹೊಮ್ಮಲಿದೆ ಎಂದಿದ್ದಾರೆ ಚಿತ್ರದ ನಿರ್ದೇಶಕ ರಾಜೇಶ್ ಮಪುಸ್ಕರ್.

ಶರ್ಮಾನ್ ಜೋಷಿ ಈ ಚಿತ್ರದ ನಾಯಕ ನಟ. ಕುಟುಂಬ ಪ್ರಧಾನ ಚಿತ್ರವಾದ ಇದರಲ್ಲಿ ವಿದ್ಯಾ ಐಟಂ ಡಾನ್ಸ್ ಎಷ್ಟರ ಮಟ್ಟಿಗೆ ಯಶಸ್ವಿಯಾಗುತ್ತದೆ ಎಂಬ ಕುತೂಹಲ ಇದ್ದೇ ಇದೆ. ಈ ಐಟಂ ಹಾಡಿಗೆ ನೃತ್ಯ ಸಂಯೋಜನೆ ಯಾರು ಮಾಡಲಿದ್ದಾರೆ ಎಂಬುದು ಇನ್ನೂ ನಿಗೂಢವಾಗಿದೆ. (ಏಜೆನ್ಸೀಸ್)