'ಒಂದು ವಾರ ಈ ಗುಂಗಿನಿಂದ ಹೊರಬರಲ್ಲ': 'ಕಾಂತಾರ' ನೋಡಿ ವಿಡಿಯೋ ಮಾಡಿದ ಕಂಗನಾ!

'ಕಾಂತಾರ'ಎಕ್ಸ್‌ಪ್ಲೋಸಿವ್ ಎಕ್ಸ್‌ಪೀರಿಯನ್ಸ್!

ಕನ್ನಡ ಸಿನಿಮಾ ನೋಡಿ ಮೆಚ್ಚುಕೊಂಡವರಿಗೆ ಲೆಕ್ಕವಿಲ್ಲ. ಬೇರೆ ಬೇರೆ ಭಾಷೆಯ ಸೆಲೆಬ್ರೆಟಿಗಳು 'ಕಾಂತಾರ' ಸಿನಿಮಾ ನೋಡಿ ಮೆಚ್ಚಿಕೊಂಡಿದ್ದಾರೆ. ಈಗ ಕಂಗನಾಗೂ ಕೂಡ ಈ ಸಿನಿಮಾವನ್ನು ಹಾಡಿ ಹೊಗಳಿದ್ದಾರೆ. ಸಿನಿಮಾ ನೋಡಿ ವಿಡಿಯೋ ಮೂಲಕ ಮೆಚ್ಚುಗೆ ಸೂಚಿಸಿದ್ದಾರೆ. "ನಾನು ನನ್ನ ಕುಟುಂಬದ ಜೊತೆ ಒಂದು ಸಿನಿಮಾ ನೋಡಿಕೊಂಡು ಬರುತ್ತಿದ್ದೇನೆ. ಅದುವೇ ಕಾಂತಾರ. ನಾನು ಇನ್ನೂ ನಡುಗುತ್ತಿದ್ದೇನೆ. ಇದೊಂದು ಎಕ್ಸ್‌ಪ್ಲೋಸಿವ್ ಎಕ್ಸ್‌ಪೀರಿಯನ್ಸ್. ರಿಷಬ್ ಶೆಟ್ಟಿ ನಿಮಗೊಂದು ಸಲಾಂ. ರಚನೆ, ನಿರ್ದೇಶನ, ನಟನೆ, ಆಕ್ಷನ್ ಎಲ್ಲವೂ ಅದ್ಭುತ. ನಂಬೋಕೆ ಆಗುತ್ತಿಲ್ಲ." ಎಂದು ಕಂಗನಾ ಪ್ರತಿಕ್ರಿಯಿಸಿದ್ದಾರೆ.

ಥಿಯೇಟರ್‌ನಲ್ಲಿ ಸಿನಿಮಾ ನೋಡೋದು ಅದ್ಭುತ

" ಇದನ್ನು ಸಿನಿಮಾ ಎನ್ನುತ್ತಾರೆ. ಚಿತ್ರಮಂದಿರದಲ್ಲಿ ಕೂತು ಸಿನಿಮಾ ನೋಡುವುದಂತೂ ಅದ್ಭುತ. ಸಿನಿಮಾ ನೋಡಿಕೊಂಡು ಥಿಯೇಟರ್‌ನಿಂದ ಹೊರ ಹೋಗುತ್ತಿದ್ದ ಸಾಕಷ್ಟು ಜನರನ್ನು ಮಾತಾಡಿಕೊಳ್ಳುತ್ತಿರುವುದನ್ನು ಕೇಳಿದ್ದೇನೆ. ಅವರು ಹಿಂದೆಂದೂ ಇಂತಹದ್ದೊಂದು ಸಿನಿಮಾವನ್ನು ನೋಡಿಲ್ಲ ಎನ್ನುತ್ತಿದ್ದರು. ಇಂತಹದ್ದೊಂದು ಸಿನಿಮಾ ನೀಡಿದ್ದಕ್ಕೆ ಧನ್ಯವಾದಗಳು. ಇದು ನಿಜಕ್ಕೂ ಅದ್ಭುತ." ಎಂದು ಕಾಂತಾರ ಸಿನಿಮಾವನ್ನು ಹಾಡಿ ಹೊಗಳಿದ್ದಾರೆ.

'ಒಂದು ವಾರ ಈ ಗುಂಗಿನಿಂದ ಹೊರಬರಲ್ಲ'

ರಿಷಬ್ ಶೆಟ್ಟಿ ನಟಿಸಿ, ನಿರ್ದೇಶಿಸಿದ ಸಿನಿಮಾ ಬಾಲಿವುಡ್ ನಟಿ ಕಂಗನಾಗೆ ತುಂಬಾನೇ ಇಷ್ಟ ಆಗಿದೆ. ಸಿನಿಮಾ ಥ್ರಿಲ್ ಆಗಿರೋ ಕಂಗಾನಾ ಚಿತ್ರತಂಡಕ್ಕೆ ಭೇಷ್ ಎಂದಿದ್ದಾರೆ. ಬಾಲಿವುಡ್ ಸಿನಿಮಾಗಳ ವಿರುದ್ಧ ತಿರುಗಿಬೀಳುವ ನಟಿ ಮತ್ತೊಂದು ದಕ್ಷಿಣ ಭಾರತವನ್ನು ಇಷ್ಟಪಟ್ಟಿದ್ದಾರೆ. ಕಂಗನಾ ಹಂಚಿಕೊಂಡ ವಿಡಿಯೋವನ್ನು ಹೊಂಬಾಳೆ ಫಿಲ್ಮ್ಸ್ ಈ ವಿಡಿಯೋ ರಿ-ಟ್ವೀಟ್ ಮಾಡಿದೆ. ಇದೇ ವಿಡಿಯೋದಲ್ಲಿ " ನಾನು ಈ ಸಿನಿಮಾ ನೋಡಿದ ಬಳಿಕ ಇನ್ನೊಂದು ವಾರ ಇದರಿಂದ ಹೊರಬರುವುದಿಲ್ಲ ಅಂತ ಅನಿಸುತ್ತಿದೆ. ವ್ಹಾವ್.." ಎಂದು ಥ್ರಿಲ್ ಆಗಿದ್ದಾರೆ ನಟಿ ಕಂಗನಾ.

20 ದಿನಗಳಲ್ಲಿ 'ಕಾಂತಾರ' ಗಳಿಸಿದ್ದೆಷ್ಟು?

20 ದಿನಗಳಲ್ಲಿ ರಿಷಬ್ ಶೆಟ್ಟಿಯ 'ಕಾಂತಾರ' ಸಿನಿಮಾ ಭರ್ಜರಿ ಕಲೆಕ್ಷನ್ ಹೊಸ ದಾಖಲೆಯನ್ನು ಬರೆಯುವ ಹಾಗಿದೆ. ಈಗಾಗಲೇ ಸುಮಾರು 171 ಕೋಟಿ ರೂಪಾಯಿಗೂ ಅಧಿಕ ಗಳಿಕೆ ಕಂಡಿದೆ. ಹೀಗೆ ಮುಂದುವರೆದರೆ 'ಕಾಂತಾರ' ಸಿನಿಮಾ 'ಕೆಜಿಎಫ್ ಚಾಪ್ಟರ್ 1' ದಾಖಲೆಯನ್ನು ಉಡೀಸ್ ಮಾಡಬಹುದು ಎಂದು ನಿರೀಕ್ಷೆ ಮಾಡಲಾಗಿದೆ. 'ಕೆಜಿಎಫ್ 1' ಸುಮಾರು 240 ಕೋಟಿ ರೂ. ಕಲೆಹಾಕಿತ್ತು. ಈ ದಾಖಲೆಯನ್ನು ಮುರಿಯಬಹುದು ಎಂದು ಭವಿಷ್ಯ ನುಡಿಯಲಾಗುತ್ತಿದೆ.