ಕೊನೆಗೂ ಸಿನಿಮಾ ಚಿತ್ರೀಕರಣಕ್ಕೆ ಅನುಮತಿ: ಷರತ್ತುಗಳು ಅನ್ವಯ!

ಜಿಲ್ಲಾಡಳಿತದ ಅನುಮತಿ ಕಡ್ಡಾಯ

ರಾಜ್ಯ ಸರ್ಕಾರ ಚಿತ್ರೀಕರಣ ಪ್ರಾರಂಭಿಸಲು ಅನುಮತಿ ನೀಡಿದ್ದರೂ, ಶೂಟಿಂಗ್ ನಡೆಸುವಾಗ ಆಯಾ ಪ್ರದೇಶದ ಜಿಲ್ಲಾಡಳಿತದ ಅನುಮತಿ ಪಡೆಯುವುದು ಕಡ್ಡಾಯ. ಫಿಲಂ ಸಿಟಿಯಲ್ಲಿ ಚಿತ್ರೀಕರಣ ನಡೆಸಲು ಸಹ ಅನುಮತಿ ಪಡೆಯಬೇಕು. ಸ್ಟ್ಯಾಂಡರ್ಡ್ ಆಪರೇಟಿಂಗ್ ಪ್ರೊಸೀಜರ್‌ಗಳಿಗೆ (ಎಸ್‌ಒಪಿ) ನಿರ್ಮಾಣ ಸಂಸ್ಥೆಗಳು ಬದ್ಧರಾಗಿರಬೇಕು.

ಸಿನಿಮಾ, ವೆಬ್ ಸೀರೀಸ್ ರದ್ದು

ಹಿಂದಿಯ ಸುಮಾರು 70 ಚಿತ್ರಗಳು, 40 ಮರಾಠಿ ಸಿನಿಮಾಗಳು ಮತ್ತು 10 ವೆಬ್ ಸೀರೀಸ್‌ಗಳ ಚಿತ್ರೀಕರಣ ಮಾರ್ಚ್ 17ರಿಂದ ರದ್ದುಗೊಂಡಿದ್ದವು. ಅಂದಾಜಿನ ಪ್ರಕಾರ ಹಿಂದಿ ಕಿರುತೆರೆಯಲ್ಲಿ ಪ್ರತಿ ವರ್ಷ 30,000 ಎಪಿಸೋಡ್‌ಗಳಷ್ಟು ಚಿತ್ರೀಕರಣ ನಡೆಯುತ್ತವೆ.

ಸಂಕಷ್ಟದಲ್ಲಿ ಕಲಾವಿದರು, ತಂತ್ರಜ್ಞರು

ಧಾರಾವಾಹಿ, ಸಿನಿಮಾಗಳ ಚಿತ್ರೀಕರಣವಿಲ್ಲದೆ ಸಾವಿರಾರು ಕಾರ್ಮಿಕರು ದುಡಿಮೆ ಇಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಇದರಿಂದ ಸಣ್ಣ ಪುಟ್ಟ ಕೆಲಸಗಳನ್ನು ಮಾಡಿಕೊಂಡಿರುವವರು ಮಾತ್ರವಲ್ಲ, ಪ್ರಮುಖ ಪಾತ್ರಗಳಲ್ಲಿ ನಟಿಸುತ್ತಿದ್ದ ಕಲಾವಿದರೂ ಆತಂಕಕ್ಕೆ ಒಳಗಾಗಿದ್ದಾರೆ. ಅನೇಕ ಧಾರಾವಾಹಿಗಳು ನಿಂತು ಹೋಗಿರುವುದರಿಂದ ಕೆಲಸ ಕಳೆದುಕೊಂಡಿದ್ದಾರೆ. ಇತ್ತೀಚೆಗೆ ನಟಿ ಪ್ರೇಕ್ಷಾ ಮೆಹ್ತಾ ಆತ್ಮಹತ್ಯೆ ಮಾಡಿಕೊಳ್ಳಲೂ ಇದೇ ಕಾರಣ ಎಂದು ಹೇಳಲಾಗಿದೆ.

ಉದ್ಧವ್ ಠಾಕ್ರೆಗೆ ಮನವಿ

ಹಿಂದಿ ಟೆಲಿವಿಷನ್ ಮೇಲೆ ಸುಮಾರು 5,000 ಕೋಟಿ ರೂ, ಮರಾಠಿ ಕಿರುತೆರೆ ಮೇಲೆ ಸುಮಾರು 250 ಕೋಟಿ ರೂ ಹೂಡಿಕೆ ಮಾಡಲಾಗಿದೆ. ಹೀಗಾಗಿ ಚಿತ್ರೀಕರಣ ಪ್ರಾರಂಭಿಸಲು ಅನುಮತಿ ನೀಡುವಂತೆ ನಿಯೋಗವೊಂದು ಮಹಾರಾಷ್ಟ್ರ ಮುಖ್ಯಮಂತ್ರಿ ಉದ್ಧವ್ ಠಾಕ್ರೆ ಅವರಿಗೆ ಮನವಿ ಮಾಡಿತ್ತು.

35 ಜನರಿಗೆ ಮಾತ್ರ ಅವಕಾಶ

ಪಶ್ಚಿಮ ಬಂಗಾಳ ಸರ್ಕಾರವು ಜೂನ್ 1ರಿಂದ ಸಿನಿಮಾಗಳ ಚಿತ್ರೀಕರಣಕ್ಕೆ ಅನುಮತಿ ನೀಡಿದೆ. ಆದರೆ ಚಿತ್ರೀಕರಣ ನಡೆಯುವ ಸ್ಥಳದಲ್ಲಿ ಗರಿಷ್ಠ 35 ಜನರಿಗೆ ಮಾತ್ರ ಅವಕಾಶ ನೀಡಲಾಗಿದೆ. ಒಂದು ಸಿನಿಮಾ ಸೆಟ್‌ನಲ್ಲಿ ತಂತ್ರಜ್ಞರು, ಕಲಾವಿದರು, ಸಹಾಯಕರು ಸೇರಿದಂತೆ ಕನಿಷ್ಠ 100 ಜನರ ಅಗತ್ಯವಿರುತ್ತದೆ. ಹೀಗಾಗಿ ಈ ನಿರ್ಬಂಧದ ಮಧ್ಯೆ ಚಿತ್ರೀಕರಣ ನಡೆಸುವುದು ಕಷ್ಟ ಎಂದು ಬೆಂಗಾಳಿ ಚಿತ್ರರಂಗ ಹೇಳಿದೆ.