ಸಿನಿಮಾ ರಥದ ಚಕ್ರಗಳಾದ ಅಸಿಸ್ಟೆಂಟ್ ಡೈರೆಕ್ಟರ್‌ಗಳ ಬಗ್ಗೆ ನಿಮಗೆಷ್ಟು ಗೊತ್ತು?

ಕತೆ ಕಟ್ಟುವಾಗಲೇ ಬೇಕು ಸಹಾಯಕ ನಿರ್ದೇಶಕ

ಕತೆಯೊಂದು ಹೊಳೆದಾಗಲೇ ಸಹಾಯಕ ನಿರ್ದೇಶಕನ ಅವಶ್ಯಕತೆ ಬರುತ್ತದೆ. ನಿರ್ದೇಶಕನ ಆಫೀಸ್‌ನಲ್ಲಿ ಸಹಾಯಕ ನಿರ್ದೇಶಕರನ್ನು ಗುಡ್ಡೆ ಹಾಕಿಕೊಂಡು ಕತೆಯ ಎಳೆಯನ್ನು ಹಿಂಜಿ-ಹಿಂಜಿ ಚಿತ್ರಕತೆ ಮಾಡುತ್ತಾನೆ ನಿರ್ದೇಶಕ. ಕೆಲವು ಪ್ರಕರಣಗಳಲ್ಲಿ ನಿರ್ದೇಶಕ ಮೊದಲೇ ಚಿತ್ರಕತೆ ಬರೆದುಕೊಂಡಿರುತ್ತಾನೆ.

ನಟ-ನಟಿಯರ ಆಯ್ಕೆಯಲ್ಲೂ ಸಾಥ್

ಚಿತ್ರಕತೆಯ ನಂತರ ನಟ-ನಟಿಯರನ್ನು ವಿಶೇಷವಾಗಿ ಪೋಷಕ ಪಾತ್ರಗಳ ನಟ-ನಟಿಯರನ್ನು ಗುರುತಿಸುವುದು, ನಟ-ನಟಿಯರ ಶೆಡ್ಯೂಲ್ ಅನ್ನು ಅಂತಿಮಗೊಳಿಸುವುದು. ಚಿತ್ರೀಕರಣಕ್ಕೆ ಬೇಕಾದ ವಸ್ತುಗಳನ್ನು ಪಟ್ಟಿ ಮಾಡುವುದು, ಚಿತ್ರಕತೆ, ಸಂಭಾಷಣೆಗಳನ್ನು ಫೈನ್ ಟ್ಯೂನ್ ಗೊಳಿಸುವುದು ಇತರೆ ಕಾಗದ ಕೆಲಸಗಳನ್ನು ಸಹಾಯಕ ನಿರ್ದೇಶಕರು ಮಾಡುತ್ತಾರೆ. ಇವರೆಲ್ಲರ ಮೇಲ್ವಿಚಾರಕನಾಗಿ ನಿರ್ದೇಶಕ ಇರುತ್ತಾನೆ.

ಅನುಮೋದನೆ ಪಡೆವ ಕೆಲಸ ಸಹಾಯಕ ನಿರ್ದೇಶಕರದ್ದೇ

ನಂತರದ್ದು ಶೂಟಿಂಗ್ ಸ್ಥಳಗಳ ಆಯ್ಕೆ ಮತ್ತು ಅಗತ್ಯವಿದ್ದಲ್ಲಿ ಪರ್ಮೀಶನ್ ತೆಗೆದುಕೊಳ್ಳುವುದು. ಶೂಟಿಂಗ್ ಸ್ಪಾಟ್‌ಗಳ ಆಯ್ಕೆ ಬಹುತೇಕವಾಗಿ ನಿರ್ದೇಶಕರೇ ಮಾಡುತ್ತಾರೆ, ಇದರಲ್ಲಿ ಸಹಾಯಕ ನಿರ್ದೇಶಕರ ಕಾರ್ಯ ತುಸು ಕಡಿಮೆ. ಶೂಟಿಂಗ್ ಮಾಡಲು ಅನುಮೋದನೆ ಪಡೆದುಕೊಳ್ಳಲು ಓಡಾಡುವ ಕಾರ್ಯ ಬಹುತೇಕ ಸಹಾಯಕ ನಿರ್ದೇಶಕರೇ ಮಾಡಬೇಕಾಗುತ್ತದೆ. ಕೆಲವು ಪ್ರಕರಣಗಳಲ್ಲಿ ನಿರ್ಮಾಪಕರ ಕಡೆಯವರು ಅಥವಾ ಮ್ಯಾನೇಜರ್ ಈ ಕಾರ್ಯ ಮಾಡುತ್ತಾರೆ.

ಚಿತ್ರೀಕರಣ ಪ್ರಾರಂಭವಾದ ಮೇಲೆ ಬಿಡುವೇ ಇಲ್ಲ

ಸಿನಿಮಾ ಚಿತ್ರೀಕರಣ ಪ್ರಾರಂಭವಾದ ಮೇಲೆ ಸಹಾಯಕ ನಿರ್ದೇಶಕರಿಗೆ ಬಿಡುವೆಂಬುದೇ ಇರುವುದಿಲ್ಲ. ಸೆಟ್‌ನಲ್ಲಿ ಅವರು ಎಲ್ಲವೂ ಆಗಿರುತ್ತಾರೆ. ಸೆಟ್‌ನಲ್ಲಿ ಅವರು ನಿರ್ವಹಿಸುವ ಜವಾಬ್ದಾರಿಗಳ ಪಟ್ಟಿ ಬಹಳ ದೊಡ್ಡದು. ಅದನ್ನು ಚರ್ಚಿಸಲು ಪ್ರತ್ಯೇಕ ಲೇಖನದ ಅಗತ್ಯವಿದೆ.

ಮುಂದುವರೆಯುವುದು.....