ವಿಜಯಲಕ್ಷ್ಮಿ ಹುಟ್ಟುಹಬ್ಬಕ್ಕೆ 'ದಾಸ'ನ ಸ್ಪೆಷಲ್ ಸರ್ಪ್ರೈಸ್ ಕಹಾನಿ.!

ಪತಿ-ಪತ್ನಿ ನೋಡಿದ ಚಿತ್ರ

ಮದುವೆ ಬಳಿಕ ಪತ್ನಿ ವಿಜಯಲಕ್ಷ್ಮಿ ಜೊತೆಗೆ ದರ್ಶನ್ ಒಟ್ಟಿಗೆ ಕೂತು ನೋಡಿದ ಸಿನಿಮಾ 'ದಾಸ'. ನವೆಂಬರ್ 11, 2003 ರಂದು ಹುಟ್ಟುಹಬ್ಬದ ಸಂಭ್ರಮದಲ್ಲಿ ವಿಜಯಲಕ್ಷ್ಮಿ ಇದ್ದಾಗ, 'ದಾಸ' ಚಿತ್ರದ ಸ್ಪೆಷಲ್ ಸ್ಕ್ರೀನಿಂಗ್ ವ್ಯವಸ್ಥೆ ಮಾಡಲಾಗಿತ್ತು. ಅಂದು ದರ್ಶನ್ ಫ್ಯಾಮಿಲಿ, ಫ್ರೆಂಡ್ಸ್ ಕೂತು ಮೈಸೂರಿನ ಸರಸ್ವತಿ ಥಿಯೇಟರ್ ನಲ್ಲಿ 'ದಾಸ'ನನ್ನ ಕಣ್ತುಂಬಿಕೊಂಡಿದ್ದರು.

ನಿರ್ಮಾಪಕ ರಮೇಶ್ ಯಾದವ್ ಏನಂತಾರೆ.?

''ದರ್ಶನ್ ಮದುವೆ ಆದ್ಮೇಲೆ, ಪತ್ನಿ ಜೊತೆ ದರ್ಶನ್ ನೋಡಿದ ಸಿನಿಮಾ 'ದಾಸ'. ಅವತ್ತು ದರ್ಶನ್ ಪತ್ನಿ ಬರ್ತಡೇ ಇತ್ತು. ಆಗ ಸ್ಪೆಷಲ್ ಶೋ ಮಾಡಿದ್ವಿ'' ಎಂದು 'ಫಿಲ್ಮಿಬೀಟ್ ಕನ್ನಡ'ಕ್ಕೆ ತಿಳಿಸಿದ್ದಾರೆ 'ದಾಸ' ನಿರ್ಮಾಪಕ ರಮೇಶ್ ಯಾದವ್.

'ದಾಸ' ಟೈಟಲ್ ಫಿಕ್ಸ್ ಆಗಿದ್ದು ಹೇಗೆ.?

ಇಂದು ದರ್ಶನ್ 'ಅಭಿಮಾನಿಗಳ ದಾಸ' ಅಂತಲೇ ಫೇಮಸ್ ಆಗಿದ್ದಾರೆ. ಟ್ವಿಟ್ಟರ್ ಅಕೌಂಟ್ ನಲ್ಲಿ ದರ್ಶನ್ ಹ್ಯಾಂಡಲ್ 'ದಾಸ ದರ್ಶನ್' ಅಂತಲೇ ಇದೆ. ಅಸಲಿಗೆ, 'ದಾಸ' ಅಂತ ಶೀರ್ಷಿಕೆ ಬಂದಿದ್ದು ಹೇಗೆ ಅಂದ್ರೆ.. ''ಮೆಜೆಸ್ಟಿಕ್' ಚಿತ್ರವನ್ನ ನಾನು ನೋಡಿದ್ದೆ. ಆ ಸಿನಿಮಾದಲ್ಲಿ ದರ್ಶನ್ ಹೆಸರು ದಾಸ. ಸಿನಿಮಾ ಮುಗಿದ ಮೇಲೆ ಸೀದಾ ಹೋಗಿ 'ದಾಸ' ಅಂತಲೇ ಟೈಟಲ್ ರಿಜಿಸ್ಟರ್ ಮಾಡಿಸಿದೆ. ಆಮೇಲೆ, ದರ್ಶನ್ ಗಾಗಿ 'ದಾಸ' ಅಂತಲೇ ಸಿನಿಮಾ ಮಾಡಿದೆ'' ಎನ್ನುತ್ತಾರೆ ನಿರ್ಮಾಪಕ ರಮೇಶ್ ಯಾದವ್.

ಟೈಟಲ್ ಇಟ್ಟ ಮೇಲೆ ಕಥೆ ಮಾಡಿದ್ದು.!

''ಪಿ.ಎನ್.ಸತ್ಯ ಅವರನ್ನ ಮೀಟ್ ಮಾಡಿ, ದರ್ಶನ್ ಗಾಗಿ ಸಿನಿಮಾ ಮಾಡಬೇಕು ಅಂತ ಹೇಳಿದೆ. ಚಿತ್ರಕ್ಕೆ 'ದಾಸ' ಅಂತ ಟೈಟಲ್ ಕೇಳುತ್ತಿದ್ದ ಹಾಗೆ, ಪಿ.ಎನ್.ಸತ್ಯ ನಗಲು ಶುರು ಮಾಡಿದರು. ಯಾಕಂದ್ರೆ, ಅವರ 'ಮೆಜೆಸ್ಟಿಕ್' ಚಿತ್ರದಲ್ಲಿ ದರ್ಶನ್ ಹೆಸರು ದಾಸ'' - ರಮೇಶ್ ಯಾದವ್, ನಿರ್ಮಾಪಕ.

'ದಾಸ' ಚಿತ್ರದ ಬಜೆಟ್ ಎಷ್ಟು.?

''ಪಿ.ಎನ್.ಸತ್ಯ ಹತ್ತಿರ ಒಂದು ಕಥೆ ಇತ್ತು. ತಾಯಿ ಸೆಂಟಿಮೆಂಟ್ ಬಗ್ಗೆ ಒಂದು ಕಥೆ ಹೇಳಿದರು. ಅದು ನನಗೆ ಇಷ್ಟ ಆಯ್ತು. ಕಥೆ ಫೈನಲ್ ಮಾಡಿಕೊಂಡು, ದರ್ಶನ್ ರನ್ನ ಮೀಟ್ ಮಾಡಿದ್ವಿ. ಸಿನಿಮಾ ಸೆಟ್ಟೇರಿತು. 2-3 ಕೋಟಿ ರೂಪಾಯಿ ಬಜೆಟ್ ನಲ್ಲಿ 'ದಾಸ' ಚಿತ್ರ ರೆಡಿ ಆಯ್ತು'' - ರಮೇಶ್ ಯಾದವ್, ನಿರ್ಮಾಪಕ.

ಶತದಿನೋತ್ಸವ ಆಚರಿಸಿಕೊಂಡ 'ದಾಸ'

''ದಾಸ' ಚಿತ್ರದಲ್ಲಿ ದರ್ಶನ್ ಗೆ ಮಾಸ್ ಇಮೇಜ್ ಇತ್ತು. ರಿಲೀಸ್ ಆದಾಗ ಆಲ್ ಏರಿಯಾ ಸೋಲ್ಡ್ ಔಟ್. ಒಳ್ಳೆಯ ರೆಸ್ಪಾನ್ಸ್ ಬಂತು. 'ದಾಸ' 100 ಡೇಸ್ ಓಡ್ತು. ದರ್ಶನ್ ಕೆರಿಯರ್ ಗೆ 'ದಾಸ' ಉತ್ತಮ ಬ್ರೇಕ್ ಕೊಡ್ತು'' ಅಂತಾರೆ ರಮೇಶ್ ಯಾದವ್.

ದೊಡ್ಡ ತಿರುವು ಕೊಟ್ಟ 'ದಾಸ'

2003 ರಲ್ಲಿ ಬಿಡುಗಡೆ ಆದ ಚಿತ್ರಗಳ ಪೈಕಿ 'ದಾಸ' ಅತಿ ಹೆಚ್ಚು ಕಲೆಕ್ಷನ್ ಮಾಡಿದ ಚಿತ್ರ. ದೊಡ್ಡ ಮಟ್ಟದ ನಿರೀಕ್ಷೆ ಇಲ್ಲದೆ ತೆರೆಗೆ ಬಂದ 'ದಾಸ' ಅಲ್ಲಿಯವರೆಗಿನ ದರ್ಶನ್ ಕೆರಿಯರ್ ನಲ್ಲಿ ಬಿಗ್ ಹಿಟ್ ಆಯ್ತು. 'ದಾಸ' ಚಿತ್ರದಿಂದ ದರ್ಶನ್ ವೃತ್ತಿಬದುಕಿಗೆ ಹೊಸ ತಿರುವು ಸಿಕ್ತು. ಇವೆಲ್ಲದರ ಜೊತೆಗೆ ಮದುವೆ ಆದ್ಮೇಲೆ, ಪತ್ನಿ ಜನ್ಮದಿನದಂದು ದರ್ಶನ್ ಮತ್ತು ವಿಜಯಲಕ್ಷ್ಮಿ ಒಟ್ಟಿಗೆ ನೋಡಿದ ಚಿತ್ರ ಎಂಬ ಸೆಂಟಿಮೆಂಟ್ ಕೂಡ ಈ ಚಿತ್ರಕ್ಕಿದೆ. ಹೀಗಾಗಿ, ದರ್ಶನ್ ಮತ್ತು ವಿಜಯಲಕ್ಷ್ಮಿ ಪಾಲಿಗೆ 'ದಾಸ' ಸಿನಿಮಾ ತುಂಬಾನೇ 'ಸ್ಪೆಷಲ್'.