2019ರಲ್ಲಿ ಭಾರತೀಯ ಚಿತ್ರರಂಗದ ಆದಾಯ ಎಷ್ಟು?: ಚಿತ್ರೋದ್ಯಮದ ಪ್ರಗತಿಯ ವರದಿ

ಒಟ್ಟಾರೆ ಮನರಂಜನಾ ಉದ್ಯಮ ಪ್ರಗತಿ

ಭಾರತೀಯ ಮಾಧ್ಯಮ ಮತ್ತು ಮನರಂಜನಾ ಉದ್ಯಮ 2019ರಲ್ಲಿ 1.82 ಟ್ರಿಲಿಯನ್ ರೂಪಾಯಿ ಆದಾಯಕ್ಕೆ ಮುಟ್ಟಿದ್ದು, 2018ಕ್ಕೆ ಹೋಲಿಸಿದರೆ ಶೇ 9ರಷ್ಟು ಒಟ್ಟಾರೆ ಬೆಳವಣಿಗೆ ಕಂಡಿದೆ. ಅದರಲ್ಲಿ ಚಿತ್ರರಂಗ ಶೇ 10ರಷ್ಟು ಪ್ರಗತಿಯೊಂದಿಗೆ 191 ಬಿಲಿಯನ್ ರೂ. ಗಳಿಕೆ ಮಾಡಿದೆ.

ಹಿಂದಿ ಚಿತ್ರರಂಗ

ಹಿಂದಿ ಚಿತ್ರೋದ್ಯಮ 49.5 ಬಿಲಿಯನ್ ರೂ ಒಟ್ಟು ಗಲ್ಲಾ ಪೆಟ್ಟಿಗೆ ಗಳಿಕೆ ಕಂಡಿದ್ದು, ದೇಶಿ ಸಿನಿಮಾಗಳು 115 ಬಿಲಿಯನ್ ರೂ. ಆದಾಯ ಸಂಗ್ರಹಿಸಿದೆ. ಸೂಪರ್ ಸ್ಟಾರ್‌ಗಳ ಸಿನಿಮಾಗಳು ಹೊರದೇಶದಲ್ಲಿ ದೊಡ್ಡ ಹಿಟ್ ಆಗದಿದ್ದರೂ ಶೇ 10ರಷ್ಟು ಚಿತ್ರಮಂದಿರ ಆದಾಯದ ಕುಸಿತದೊಂದಿಗೆ 27 ಬಿಲಿಯನ್ ರೂ. ಗಳಿಕೆ ಕಂಡಿದೆ.

ಸಿನಿಮಾಗಳ ಗಳಿಕೆ

2019ರಲ್ಲಿ ಒಟ್ಟು 17 ಹಿಂದಿ ಚಿತ್ರಗಳು ನೂರು ಕೋಟಿ ಕ್ಲಬ್ ಸೇರಿದ್ದವು. ಆರು ಸಿನಿಮಾಗಳು 200ಕೋಟಿ ರೂ,ಗೂ ಅಧಿಕ ಗಳಿಕೆ ಸಾಧಿಸಿದ್ದವು. ಹಾಲಿವುಡ್‌ನ ನಾಲ್ಕು ಸಿನಿಮಾಗಳು ಭಾರತದಲ್ಲಿ 100 ಕೋಟಿ ಕ್ಲಬ್ ತಲುಪಿದ್ದರೆ, ಒಂದು ಸಿನಿಮಾ 400 ಕೋಟಿ ರೂ. ಗಳಿಕೆ ಮಾಡಿದೆ.

ಕನ್ನಡ ಚಿತ್ರರಂಗ

2019ರಲ್ಲಿ 223 ಕನ್ನಡ ಸಿನಿಮಾಗಳು ಬಿಡುಗಡೆಯಾಗಿದ್ದು, ಶೇ 36ರಷ್ಟು ಆದಾಯ ಬೆಳವಣಿಗೆಯನ್ನು ಕಂಡಿದೆ. 2018ರಲ್ಲಿ 3.8 ಬಿಲಿಯನ್ ರೂ. ಒಟ್ಟು ಬಾಕ್ಸ್ ಆಫೀಸ್ ಕಲೆಕ್ಷನ್ ಮಾಡಿದ್ದರೆ, 2019ರಲ್ಲಿ 5.2 ಬಿಲಿಯನ್ ರೂ. ಗಳಿಕೆ ಕಂಡಿದೆ.

ತೆಲುಗು ಸಿನಿಮಾ

ತೆಲುಗಿನಲ್ಲಿ 2019ರಲ್ಲಿ 263 ಚಿತ್ರಗಳು ಬಿಡುಗಡೆಯಾಗಿವೆ. 2018ರಲ್ಲಿ 238 ಸಿನಿಮಾಗಳು ತೆರೆ ಕಂಡಿದ್ದವು. ಹಾಗೆಯೇ ಕಳೆದ ವರ್ಷ ಟಾಲಿವುಡ್ 14 ಬಿಲಿಯನ್ ಬಾಕ್ಸಾಫೀಸ್ ಗಳಿಕೆ ಕಂಡಿದೆ. 2018ಕ್ಕೆ ಹೋಲಿಸಿದರೆ 1.4%ರಷ್ಟು ಪ್ರಗತಿ ಉಂಟಾಗಿದೆ.

ತಮಿಳು ಚಿತ್ರರಂಗ

ತಮಿಳಿನಲ್ಲಿ ಕನ್ನಡ ಮತ್ತು ತೆಲುಗಿಗೆ ಹೋಲಿಸಿದರೆ ಕಡಿಮೆ ಸಿನಿಮಾಗಳು ತೆರೆ ಕಂಡಿದ್ದವು. 2019ರಲ್ಲಿ ಕೇವಲ 215 ಚಿತ್ರಗಳು ಬಿಡುಗಡೆಯಾಗಿದ್ದವು. 2018ರಲ್ಲಿ ಬಿಡುಗಡೆಯಾದ ತಮಿಳು ಸಿನಿಮಾಗಳ ಸಂಖ್ಯೆ 243. ಆದರೆ ಬಾಕ್ಸಾಫೀಸ್ ಗಳಿಕೆಯಲ್ಲಿ ಶೇ 13.8ರಷ್ಟು ಪ್ರಗತಿಯಾಗಿದೆ. ಕಾಲಿವುಡ್ ಕಳೆದ ವರ್ಷ 14.6 ಬಿಲಿಯನ್ ರೂ. ಆದಾಯ ಕಂಡಿದೆ.