Yash19: ಯಶ್- ವೆಂಕಟ್ ಕೋನಂಕಿ ಗುಪ್ತ್ ಗುಪ್ತ್ ಮೀಟಿಂಗ್: KVN ಬ್ಯಾನರ್‌ನಲ್ಲಿ ಸಿನಿಮಾ ಫಿಕ್ಸ್?

KVN ಬ್ಯಾನರ್‌ನಲ್ಲಿ ಯಶ್‌19 ಫಿಕ್ಸ್?

ಯಶ್ ಮುಂದಿನ ಚಿತ್ರಕ್ಕೆ KVN ಪ್ರೊಡಕ್ಷನ್ ಸಂಸ್ಥೆ ಬಂಡವಾಳ ಹೂಡುತ್ತದೆ ಎನ್ನುವ ಸುದ್ದಿ ಹಲವು ದಿನಗಳಿಂದ ಸದ್ದು ಮಾಡ್ತಿದೆ. ಈ ಹಿಂದೆ ಯಶ್ ದಂಪತಿ ಗೋವಾ ಮುಖ್ಯಮಂತ್ರಿ ಪ್ರಮೋದ್ ಸಾವತ್ ಭೇಟಿ ಮಾಡಿದ್ದರು. ಆಗ ಅವರ ಜೊತೆ KVN ಬ್ಯಾನರ್‌ನ ವೆಂಕಟ್ ಕೋನಂಕಿ ನಾರಾಯಣ ಕೂಡ ಕಾಣಿಸಿಕೊಂಡಿದ್ದರು. ಅಂದಿನಿಂದಲೇ ಯಶ್ ಇಂತಾದೊಂದು ಸುದ್ದಿ ಹರಿದಾಡಲು ಆರಂಭವಾಗಿತ್ತು. ಅದೇ ನಿಜವಾಗುತ್ತದೆ ಎಂದು ಈಗ ಹೇಳಲಾಗುತ್ತಿದೆ. 'ಸಖತ್', 'ಬೈಟುಲವ್' ಸಿನಿಮಾಗಳನ್ನು ನಿರ್ಮಿಸಿರುವ ಸಂಸ್ಥೆ ಸದ್ಯ ಧ್ರುವ- ಪ್ರೇಮ್ ಜೋಡಿಯ 'ಕೆಡಿ' ಚಿತ್ರಕ್ಕೆ ಬಂಡವಾಳ ಹೂಡಿದೆ.

ಯಶ್- ವೆಂಕಟ್ ಭೇಟಿ

ಸದ್ಯ ಯಶ್ ನಿರ್ಮಾಪಕ ವೆಂಕಟ್ ಕೋನಂಕಿ ನಾರಾಯಣ ಜೊತೆ ಕಾಣಿಸಿಕೊಂಡಿರುವ ಫೋಟೊವೊಂದು ವೈರಲ್ ಆಗ್ತಿದೆ. ಇಬ್ಬರು ಸಿನಿಮಾ ಬಗ್ಗೆ ಚರ್ಚಿಸಿದ್ದಾರಂತೆ. ಯಶ್19 ಚಿತ್ರಕ್ಕೆ KVN ಸಂಸ್ಥೆ ಬಂಡವಾಳ ಹೂಡುವುದು ಕನ್ಫರ್ಮ್ ಎನ್ನಲಾಗುತ್ತಿದೆ. ಆದರೆ ಕಥೆ, ನಿರ್ದೇಶಕರು ಯಾರು ಎನ್ನುವುದು ಮಾತ್ರ ಇನ್ನು ಫೈನಲ್ ಆಗಿಲ್ಲ. ಅದೇ ಕಾರಣಕ್ಕೆ ಯಶ್ ಕೊಂಚ ಸಮಯ ಕೇಳಿದ್ದಾರೆ ಎನ್ನುವ ಮಾತುಗಳು ಕೇಳಿಬರ್ತಿದೆ. ತಮಿಳು ನಿರ್ದೇಶಕರೊಬ್ಬರು ಚಿತ್ರಕ್ಕೆ ಆಕ್ಷನ್ ಕಟ್ ಹೇಳುವ ಬಗ್ಗೆ ಗುಸುಗುಸು ಶುರುವಾಗಿದೆ. ಯಶ್ ಅಧಿಕೃತವಾಗಿ ಹೇಳುವವರೆಗೂ ಯಾವುದು ಪಕ್ಕಾ ಅಲ್ಲ. ಈ ಹಿಂದೆ ಆಂಗ್ಲಪತ್ರಿಕೆಯ ಸಂವಾದ ಕಾರ್ಯಕ್ರಮದಲ್ಲಿ ಸ್ವತಃ ಯಶ್ ಈ ಮಾತನ್ನು ಹೇಳಿದ್ದರು. ನನ್ನ ಮುಂದಿನ ಸಿನಿಮಾವನ್ನು ನಾನೇ ಘೋಷಿಸುತ್ತೇನೆ ಎಂದಿದ್ದರು.

ದುಬೈನಲ್ಲಿ ಹುಟ್ಟುಹಬ್ಬ ಆಚರಣೆ

ರಾಕಿಭಾಯ್ ಯಶ್ ಪತ್ನಿ ಹಾಗೂ ಮಕ್ಕಳ ಸಮೇತ ದುಬೈಗೆ ಹಾರಿದ್ದಾರೆ. ಈ ಬಾರಿ ಹುಟ್ಟುಹಬ್ಬವನ್ನು ಅಲ್ಲೇ ಆಚರಿಸಿಕೊಳ್ಳುತ್ತಿದ್ದಾರೆ. ಸದ್ಯ ದುಬೈನಲ್ಲಿ ಅಭಿಮಾನಿಗಳ ಜೊತೆ ಯಶ್ ಕ್ಲಿಕ್ಕಿಸಿಕೊಂಡ ಫೋಟೊಗಳು ಸೋಶಿಯಲ್ ಮೀಡಿಯಾದಲ್ಲಿ ವೈರಲ್ ಆಗಿದೆ. ಕಾರಣಾಂತರಗಳಿಂದ ಕಳೆದೆರಡು ವರ್ಷ ಹುಟ್ಟುಹಬ್ಬದ ದಿನ ಯಶ್ ಅಭಿಮಾನಿಗಳನ್ನು ಭೇಟಿ ಮಾಡಿರಲಿಲ್ಲ. ಈ ಬಾರಿ ಸಿಗುತ್ತಾರೆ, ನೆಚ್ಚಿನ ನಟನ ಕೈ ಕುಲುಕು ಶುಭಾಶಯ ಕೋರಲು ಕಾಯ್ತಿದ್ದ ಅಭಿಮಾನಿಗಳಿಗೆ ನಿರಾಸೆ ಆಗಿದೆ. ಇನ್ನು ಯಶ್‌ ಬರ್ತ್‌ಡೇ ಸ್ಪೆಷಲ್ ಕಾಮನ್ ಡಿಪಿ ಸಿಕ್ಕಾಪಟ್ಟೆ ವೈರಲ್ ಆಗಿದೆ.

2 ಸಿನಿಮಾಗಳು ರೀ ರಿಲೀಸ್

ಯಶ್ ಅಭಿಮಾನಿಗಳ ಜೊತೆ ಹುಟ್ಟುಹಬ್ಬ ಆಚರಿಸಿಕೊಳ್ಳುತ್ತಿಲ್ಲ. ಆದರೆ ರಾಕಿಂಗ್ ಸ್ಟಾರ್ ನಟನೆಯ 2 ಸೂಪರ್ ಹಿಟ್ ಸಿನಿಮಾಗಳು ಇವತ್ತು ರೀ ರಿಲೀಸ್ ಆಗ್ತಿದೆ. 8 ವರ್ಷಗಳ ಹಿಂದೆ ಬಾಕ್ಸಾಫೀಶ್ ಶೇಕ್ ಮಾಡಿದ್ದ 'ಮಿ & ಮಿ ರಾಮಾಚಾರಿ' ಸಿನಿಮಾ ದೊಡ್ಡಮಟ್ಟದಲ್ಲಿ ಮತ್ತೆ ಬೆಳ್ಳಿ ಪರದೆಗೆ ಬಂದಿದೆ. ಸಂತೋಷ್ ಆನಂದ್‌ರಾಮ ನಿರ್ದೇಶನದ ಈ ಚಿತ್ರದಲ್ಲಿ ಯಶ್ ಹಾಗೂ ರಾಧಿಕಾ ಪಂಡಿತ್ ಜೋಡಿಯಾಗಿ ನಟಿಸಿದ್ದರು. ಇನ್ನು 'KGF- 2' ಚಿತ್ರವನ್ನು ಕೂಡ ಕೆಲವೆಡೆ ಪ್ರದರ್ಶನ ಮಾಡಲಾಗುತ್ತಿದೆ.