ಚಿರಂಜೀವಿ ಪುತ್ರಿ ಶ್ರೀಜಾ 3ನೇ ಮದುವೆಗೆ ಮುಂದಾದ್ರಾ? ಇನ್‌ಸ್ಟಾಗ್ರಾಂ ಪೋಸ್ಟ್ ವೈರಲ್

ಶ್ರೀಜಾ ಪೋಸ್ಟ್‌ನಲ್ಲಿ ಏನಿದೆ?

ಹೊಸ ವರ್ಷದ ಸಂಭ್ರಮದಲ್ಲಿ ಕಳೆದ ವರ್ಷದ ಮೊಮೆಂಟ್ಸ್ ಶೇರ್ ಮಾಡಿ, "ಡಿಯರ್ 2022, ನನ್ನ ಜೀವನದಲ್ಲಿ ಬಹಳ ಮುಖ್ಯವಾದ ವ್ಯಕ್ತಿಯನ್ನು ಭೇಟಿ ಮಾಡುವಂತೆ ಮಾಡಿದೆ. ನನ್ನ ಬಗ್ಗೆ ಬಹಳ ಅರಿತಿರುವ ವ್ಯಕ್ತಿ, ನನ್ನನ್ನು ಬಹಳ ಪ್ರೀತಿಸುವ, ಕೇರಿಂಗ್ ಮಾಡುವ, ಕಷ್ಟ ಸುಖದಲ್ಲಿ ನನ್ನ ಜೊತೆಗಿರುವ ವ್ಯಕ್ತಿ, ಸದಾ ನನಗೆ ಬೆಂಬಲವಾಗಿ ನಿಲ್ಲುವ ವ್ಯಕ್ತಿ, ನಾನು ಅವರನ್ನು ಭೇಟಿ ಆಗಿದ್ದು ಅದ್ಭುತ. ಹೊಸ ಪಯಣ ಶುರುವಾಗುತ್ತಿದೆ" ಎಂದು ಬರೆದುಕೊಂಡಿದ್ದಾರೆ.

ಶ್ರೀಜಾ ಪೋಸ್ಟ್ ವೈರಲ್

ಸದ್ಯ ಚಿರಂಜೀವಿ ಪುತ್ರಿ ಶ್ರೀಜಾ ಮಾಡಿರುವ ಪೋಸ್ಟ್ ಸಖತ್ ವೈರಲ್ ಆಗಿದೆ. ಕಳೆದೊಂದು ವರ್ಷದಿಂದ ಕೇಳಿಬರುತ್ತಿರುವ ಆಕೆಯ 3ನೇ ಮದುವೆ ಸುದ್ದಿ ನಿಜವಾಗುತ್ತಾ? ಎನ್ನುವ ಅನುಮಾನವೂ ಕೆಲವರನ್ನು ಕಾಡುತ್ತಿದೆ. ಇನ್ನು ಶ್ರೀಜಾ ಮುಂಬೈನಲ್ಲಿ ಬ್ಯುಸಿನೆಸ್ ಮಾಡಲು ಬಹಳ ದಿನಗಳಿಂದ ಪ್ರಯತ್ನ ನಡೆಸುತ್ತಿದ್ದಾರೆ ಎನ್ನಲಾಗ್ತಿದೆ. ಇನ್ನು ಕೆಲ ದಿನಗಳ ಹಿಂದೆಯೇ ಶ್ರೀಜಾ ಇನ್‌ಸ್ಟಾಗ್ರಾಮ್‌ ಅಕೌಂಟ್‌ನಲ್ಲಿ ತಮ್ಮ ಹೆಸರಿನ ಜೊತೆ ಇದ್ದ ಪತಿಯ ಹೆಸರನ್ನು ಕೈಬಿಟ್ಟಿದ್ದರು. ಶ್ರೀಜಾ ಕಲ್ಯಾಣ್ ಎನ್ನುವುದನ್ನು ಶ್ರೀಜಾ ಕೋನಿದೇಲ ಎಂದು ಬದಲಿಸಿದ್ದರು. ಇಬ್ಬರು ಬೇರೆ ಬೇರೆ ವಾಸಿಸುತ್ತಿರುವ ವಿಚಾರ ಕೂಡ ಡಿವೋರ್ಸ್ ಬಗ್ಗೆ ಚರ್ಚೆ ಹುಟ್ಟುವಂತೆ ಮಾಡಿದೆ.

ಶ್ರೀಜಾ ಮೊದಲ ಮದುವೆ

ಭಾರತೀಯ ಚಿತ್ರರಂಗದ ಮೆಗಾಸ್ಟಾರ್ ಚಿರಂಜೀವಿ. ಬರೀ ಅವರ ಸಿನಿಮಾ ವಿಚಾರಗಳು ಮಾತ್ರವಲ್ಲ ವೈಯಕ್ತಿಕ ವಿಚಾರಕ್ಕೆ ಸಂಬಂಧಿಸಿದಂತೆ ಇಂತಹ ಸುದ್ದಿಗಳು ಪದೇ ಪದೇ ಚರ್ಚೆಗೆ ಗ್ರಾಸವಾಗುತ್ತಿರುತ್ತದೆ. ಶ್ರೀಜಾ ತಮ್ಮ 19ನೇ ವಯಸ್ಸಿನಲ್ಲೇ ಸಿರೀಶ್ ಭಾರಧ್ವಜ್ ಎಂಬುವವರನ್ನು ಪ್ರೀತಿಸಿದ್ದರು. ಪೋಷಕರ ವಿರೋಧದ ನಡುವೆಯೂ ಆತನ ಕೈ ಹಿಡಿದಿದ್ದರು. ಇದು ಮೆಗಾ ಫ್ಯಾಮಿಲಿಯಲ್ಲಿ ದೊಡ್ಡ ಹೈಡ್ರಾಮಾಗೆ ಕಾರಣವಾಗಿತ್ತು. ನಂತರ ಅತ್ತೆ ಮನೆಯಲ್ಲಿ ಕಾಟ ಕೊಡುತ್ತಿದ್ದಾರೆ ಎಂದು ಹೇಳಿ 2011ರಲ್ಲಿ ವಿಚ್ಛೇದನ ನೀಡಿ ಸಿರೀಶ್‌ ಅವರಿಂದ ದೂರಾಗಿದ್ದರು. ನಂತರ ಮತ್ತೆ ತವರು ಮನೆಗೆ ವಾಪಸ್ ಬಂದಿದ್ದರು.

2016ರಲ್ಲಿ 2ನೇ ಮದುವೆ

ಮೊದಲ ಪತಿಯಿಂದ ದೂರಾಗಿ 5 ವರ್ಷಗಳ ನಂತರ ಶ್ರೀಜಾ, ಉದ್ಯಮಿ ಕಲ್ಯಾಣ್ ದೇವ್ ಕೈ ಹಿಡಿದರು. ಬಹಳ ಅದ್ಧೂರಿಯಾಗಿ ಈ ಮದುವೆ ನಡೆದಿತ್ತು. ಕಲ್ಯಾಣ್ ಮುಂದೆ ಮೆಗಾ ಫ್ಯಾಮಿಲಿ ಬೆಂಬಲದೊಂದಿಗೆ ಹೀರೊ ಆಗಿ ಟಾಲಿವುಡ್‌ಗೆ ಎಂಟ್ರಿ ಕೊಟ್ಟಿದ್ದರು. ಎಲ್ಲ ಸರಿ ಹೋಯಿತು ಎಂದುಕೊಳ್ಳುವ ಸಮಯದಲ್ಲಿ ಇದೀಗ ಮತ್ತೆ ಇಬ್ಬರ ದಾಂಪತ್ಯದಲ್ಲಿ ಬಿರುಕು ಮೂಡಿದೆ ಎನ್ನುವ ಗುಸುಗುಸು ಶುರುವಾಗಿದೆ. ಸದ್ಯ ಶ್ರೀಜಾ ಮಾಡಿರುವ ಪೋಸ್ಟ್ ಅದಕ್ಕೆ ಮತ್ತಷ್ಟು ಇಂಬು ನೀಡುವಂತಿದೆ.