ಮತ್ತೊಂದು ಚಿತ್ರಕ್ಕೆ ಪ್ರಭಾಸ್ ಗ್ರೀನ್‌ ಸಿಗ್ನಲ್: ಬಾಲಿವುಡ್ ನಿರ್ಮಾಪಕನ ಜೊತೆ ತಗ್ಗೋದೇ ಇಲ್ಲ ಎಂದ ಡಾರ್ಲಿಂಗ್

ಸುಕುಮಾರ್ ನಿರ್ದೇಶನದಲ್ಲಿ ಪ್ರಭಾಸ್

ಹೌದು ಸ್ಟಾರ್ ಡೈರೆಕ್ಟರ್ ಸುಕುಮಾರ್ ನಿರ್ದೇಶನದ ಪ್ಯಾನ್ ಇಂಡಿಯಾ ಸಿನಿಮಾದಲ್ಲಿ ಪ್ರಭಾಸ್ ನಟಿಸ್ತಾರೆ ಎನ್ನಲಾಗ್ತಿದೆ. ಈಗಾಗಲೇ ಸುಕ್ಕು ಹೇಳಿರುವ ಕಥೆ ಡಾರ್ಲಿಂಗ್‌ಗೆ ಇಷ್ಟ ಆಗಿದೆಯಂತೆ. ಆದಷ್ಟು ಬೇಗ ಸಿನಿಮಾ ಶುರು ಮಾಡೋಣ ಎಂದು ಕೂಡ ಹೇಳಿದ್ದಾರಂತೆ. ಈ ಸುದ್ದಿ ಈಗ ಸೋಷಿಯಲ್ ಮೀಡಿಯಾದಲ್ಲಿ ಸಿಕ್ಕಾಪಟ್ಟೆ ಸದ್ದು ಮಾಡ್ತಿದೆ. ಅಭಿಮಾನಿಗಳಂತೂ ಈ ಸುದ್ದಿ ಕೇಳಿ ಥ್ರಿಲ್ ಆಗಿದ್ದು ಆದಷ್ಟು ಬೇಗ ಈ ಬಗ್ಗೆ ಅಧಿಕೃತ ಘೋಷಣೆ ಬರಲಿ ಎನ್ನುತ್ತಿದ್ದಾರೆ.

ಅಭಿಷೇಕ್ ಅಗರ್‌ವಾಲ್ ಪ್ಲ್ಯಾನ್

'ದಿ ಕಾಶ್ಮೀರ್ ಫೈಲ್ಸ್' ಹಾಗೂ 'ಕಾರ್ತಿಕೇಯ- 2' ಸಿನಿಮಾಗಳನ್ನು ನಿರ್ಮಿಸಿದ ಅಭಿಷೇಕ್ ಅಗರ್‌ವಾಲ್ ಪ್ರಭಾಸ್ ಹಾಗೂ ಸುಕುಮಾರ್‌ನ ಒಟ್ಟಿಗೆ ಸೇರಿಸಿದ್ದಾರೆ ಎನ್ನಲಾಗ್ತಿದೆ. ಇಬ್ಬರ ಭೇಟಿ ಮಾಡಿಸಿ ಸಿನಿಮಾ ಐಡಿಯಾ ಓಕೆ ಆಗುತ್ತಿದ್ದಂತೆ ನಿರ್ಮಾಪಕರು ಇಬ್ಬರಿಗೂ ಅಡ್ವಾನ್ಸ್ ಕೂಡ ಕೊಟ್ಟಿದ್ದಾರಂತೆ. 'ರಂಗಸ್ಥಳಂ' ಚಿತ್ರಕ್ಕೂ ಮೊದಲೇ ಸುಕ್ಕು ಪ್ರಭಾಸ್‌ಗೆ ಒಂದು ಕಥೆ ಹೇಳಿದ್ದರಂತೆ. ಆದರೆ ಪ್ರಭಾಸ್ ಬೇರೆ ಬೇರೆ ಸಿನಿಮಾಗಳಲ್ಲಿ ಬ್ಯುಸಿ ಆಗಿದ್ದರಿಂದ ಅದು ಸಾಧ್ಯವಾಗಿರಲಿಲ್ಲ.

'ಪುಷ್ಪ-2' ಚಿತ್ರದಲ್ಲಿ ಸುಕ್ಕು ಬ್ಯುಸಿ

ಕಳೆದ ವರ್ಷ ಸುಕುಮಾರ್ 'ಪುಷ್ಪ' ರೀತಿಯ ಸೆನ್ಸೇಷನಲ್ ಹಿಟ್ ಸಿನಿಮಾ ಕೊಟ್ಟಿದ್ದು ಗೊತ್ತೇಯಿದೆ. ಪುಷ್ಪರಾಜ್ ಆಗಿ ಅಲ್ಲು ಅರ್ಜುನ್ ಅಬ್ಬರಿಸಿ ಬಾಕ್ಸಾಫೀಸ್ ಶೇಕ್ ಮಾಡಿದ್ದರು. ಬಾಲಿವುಡ್‌ನಲ್ಲೂ ಸಿನಿಮಾ ಭರ್ಜರಿ ಕಲೆಕ್ಷನ್ ಮಾಡಿತ್ತು. ಪಕ್ಕಾ ಮಾಸ್ ಮಸಾಲಾ ಎಂಟರ್‌ಟೈನರ್ ಸಿನಿಮಾ ಕಟ್ಟಿಕೊಂಡು ಸುಕುಮಾರ್ ಗೆದ್ದಿದ್ದರು. ಸದ್ಯ 'ಪುಷ್ಪ' ಸೀಕ್ವೆಲ್ ಚಿತ್ರೀಕರಣದಲ್ಲಿ ಬ್ಯುಸಿ ಆಗಿದ್ದಾರೆ. ಮುಂದಿನ ವರ್ಷಾಂತ್ಯಕ್ಕೆ 'ಪುಷ್ಪ'-2 ಕಂಪ್ಲೀಟ್ ಆಗಲಿದೆ.

2024ರಲ್ಲಿ ಸೆಟ್ಟೇರಲಿದೆ ಸಿನಿಮಾ

ಪ್ರಭಾಸ್ ಸಿನಿಮಾ ಅಂದ್ರೇನೇ ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ ಕುತೂಹಲ ಶುರುವಾಗುತ್ತೆ. ಇನ್ನು ಸುಕುಮಾರ್ ಕೂಡ ಕೈ ಜೋಡಿಸುತ್ತಾರೆ ಅಂದ್ಮೇಕೆ ನಿರೀಕ್ಷೆ ಮತ್ತಷ್ಟು ಹೆಚ್ಚಾಗುವುದರಲ್ಲಿ ಅನುಮಾನ ಇಲ್ಲ. ಪ್ರಭಾಸ್ ಹಾಗೂ ಸುಕುಮಾರ್ ತಮ್ಮ ಸದ್ಯದ ಕಮೀಟ್‌ಮೆಂಟ್‌ಗಳನ್ನು ಮುಗಿಸಿ 2024ರ ವೇಳೆಗೆ ಒಟ್ಟಿಗೆ ಕೆಲಸ ಮಾಡುವ ಸಾಧ್ಯತೆಯಿದೆ. ಪ್ಯಾನ್ ಇಂಡಿಯಾ ಲೆವೆಲ್‌ನಲ್ಲಿ 5 ಭಾಷೆಗಳಲ್ಲಿ ಸಿನಿಮಾ ನಿರ್ಮಾಣದ ಪ್ಲ್ಯಾನ್ ನಡೀತಿದೆ.