ವಿಜಯ್‌ಗಾಗಿ ಹಾಲಿವುಡ್‌ ಕತೆ ಹೊತ್ತು ತರುತ್ತಿರುವ 'ವಿಕ್ರಂ' ನಿರ್ದೇಶಕ

ಹಾಲಿವುಡ್‌ ಸಿನಿಮಾದಿಂದ ಪ್ರೇರಣೆ

ವಿಜಯ್‌ರ ಹೊಸ ಸಿನಿಮಾಕ್ಕೆ ಕತೆಯನ್ನು ಹಾಲಿವುಡ್‌ನಿಂದ ಹೊತ್ತು ತರುತ್ತಿದ್ದಾರೆ ಲೋಕೇಶ್ ಕನಗರಾಜ್. ಹಾಲಿವುಡ್‌ ಸಿನಿಮಾಗಳ ದೊಡ್ಡ ಪ್ರಭಾವ ಲೋಕೇಶ್‌ ಮೇಲಿರುವುದು ಅವರ ಈ ಹಿಂದಿನ ಸಿನಿಮಾಗಳಿಂದಲೂ ತಿಳಿದುಕೊಳ್ಳಬಹುದು. ಆದರೆ ಈಗ ನೇರವಾಗಿ ಅಲ್ಲಿನ ಸಿನಿಮಾ ಒಂದನ್ನೇ ಎರವಲು ಪಡೆದು ತಮಿಳು ಪ್ರೇಕ್ಷಕರಿಗೆ ರುಚಿಸುವಂತೆ ತಿದ್ದಿ ತೆರೆಗೆ ತರಲು ಹೊರಟಿದ್ದಾರೆ.

ವಿಜಯ್‌ ದ್ವಿಪಾತ್ರದಲ್ಲಿ!?

2005 ರಲ್ಲಿ ಬಿಡುಗಡೆ ಆಗಿದ್ದ ಹಿಟ್ ಹಾಲಿವುಡ್ ಸಿನಿಮಾ 'ಹಿಸ್ಟರಿ ಆಫ್ ವೈಯೊಲೆನ್ಸ್' ಸಿನಿಮಾದ ಕತೆಯನ್ನು ಆಧರಿಸಿ ಲೋಕೇಶ್ ಕನಗರಾಜ್ ಚಿತ್ರಕತೆ ಬರೆದಿದ್ದು, ವಿಜಯ್‌ರ ಇಮೇಜು ಹಾಗೂ ತಮಿಳು ಪ್ರೇಕ್ಷಕರು ಒಪ್ಪುವಂತೆ ಇಲ್ಲಿನ ಪರಿಸರಕ್ಕೆ ತಕ್ಕುದಾಗಿ ಹೊಂದಿಕೊಳ್ಳುವಂತೆ ಚಿತ್ರಕತೆಯಲ್ಲಿ ಮಾರ್ಪಾಡುಗಳನ್ನು ಮಾಡಲಾಗಿದೆ. ಈ ಸಿನಿಮಾದಲ್ಲಿ ವಿಜಯ್‌ ದ್ವಿಪಾತ್ರದಲ್ಲಿ ನಟಿಸಲಿದ್ದಾರೆ ಎಂಬ ಮಾತುಗಳು ಸಹ ಕೇಳಿ ಬರುತ್ತಿವೆ.

ಲೋಕೇಶ್ ಯೂನಿವರ್ಸ್‌ ಹೊರತಾದ ಸಿನಿಮಾ

ಲೋಕೇಶ್ ಕನಗರಾಜ್ ಈಗಾಗಲೇ ವಿಜಯ್‌ಗಾಗಿ 'ಮಾಸ್ಟರ್' ಸಿನಿಮಾ ನಿರ್ದೇಶಿಸಿದ್ದು, ಆ ಸಿನಿಮಾ ಸೂಪರ್ ಹಿಟ್ ಆಗಿದೆ. ಅದರ ಬಳಿಕ ನಿರ್ದೇಶನ ಮಾಡಿರುವ 'ವಿಕ್ರಂ' ಸಿನಿಮಾ ಸಹ ಸೂಪರ್-ಡೂಪರ್ ಹಿಟ್ ಆಗಿದೆ. 'ವಿಕ್ರಂ 2' ಸಿನಿಮಾವನ್ನು ಸಹ ಲೋಕೇಶ್ ಈಗಾಗಲೇ ಘೋಷಣೆ ಮಾಡಿದ್ದಾರೆ. ಆ ಸಿನಿಮಾದಲ್ಲಿ ನಟ ಸೂರ್ಯ ಮುಖ್ಯ ವಿಲನ್ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಈ ನಡುವೆ ವಿಜಯ್‌ಗಾಗಿ ಹೊಸ ಸಿನಿಮಾ ನಿರ್ದೇಶಿಸುತ್ತಿದ್ದಾರೆ ಲೋಕೇಶ್.

ಭಾರಿ ಬಜೆಟ್‌ನ ಸಿನಿಮಾ

ವಿಜಯ್‌ರ 67 ನೇ ಸಿನಿಮಾ ಇದಾಗಿರಲಿದ್ದು, ಈ ಸಿನಿಮಾವನ್ನು 250 ಕೋಟಿ ಬಜೆಟ್‌ನಲ್ಲಿ ನಿರ್ಮಾಣ ಮಾಡಲಾಗುತ್ತಿದೆ. ಈ ಸಿನಿಮಾಕ್ಕಾಗಿ ವಿಜಯ್‌ಗೆ 125 ಕೋಟಿ ಸಂಭಾವನೆ ನೀಡಲಾಗುತ್ತಿದೆ. ಇನ್ನು ನಿರ್ದೇಶಕ ಲೋಕೇಶ್ ಕನಗರಾಜ್‌ಗೆ 20 ಕೋಟಿ ಸಂಭಾವನೆ ನೀಡಲಾಗುತ್ತಿದೆ. ಇದೀಗ ವಿಜಯ್‌ 'ವಾರಿಸು' ಸಿನಿಮಾದಲ್ಲಿ ನಟಿಸುತ್ತಿದ್ದು ಈ ಸಿನಿಮಾದಲ್ಲಿ ಕನ್ನಡತಿ ರಶ್ಮಿಕಾ ಮಂದಣ್ಣ ನಾಯಕಿಯಾಗಿ ನಟಿಸುತ್ತಿದ್ದಾರೆ. ಸಿನಿಮಾವನ್ನು ತೆಲುಗಿನ ದಿಲ್ ರಾಜು ನಿರ್ಮಾಣ ಮಾಡುತ್ತಿದ್ದಾರೆ.