ಬಾಲಿವುಡ್‌ ಬಿಗ್‌ ಬಜೆಟ್ ಸಿನಿಮಾ ತಿರಸ್ಕರಿಸಿದ ರಾಕಿಭಾಯ್ ಯಶ್!

ಅತಿಥಿ ಪಾತ್ರದಲ್ಲಿ ನಟಿಸಿದ್ದ ಶಾರುಖ್ ಖಾನ್

'ಬ್ರಹ್ಮಾಸ್ತ್ರ' ಸಿನಿಮಾದಲ್ಲಿ ಹಲವು ನಟರು ನಟಿಸಿದ್ದರು. ಶಾರುಖ್ ಖಾನ್‌ರ ಅತಿಥಿ ಪಾತ್ರವಂತೂ ಭಾರಿ ಹಿಟ್ ಆಗಿತ್ತು. ದಕ್ಷಿಣದ ನಟ ನಾಗಾರ್ಜುನ, ಅಮಿತಾಬ್ ಬಚ್ಚನ್ ಅವರುಗಳು ಸಹ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದರು. ಮಲ್ಟಿಸ್ಟಾರರ್ ಆಗಿದ್ದ ಈ ಸಿನಿಮಾ ದೊಡ್ಡ ಹಿಟ್ ಆಗಿತ್ತು. ಮೊದಲ ಭಾಗದಂತೆಯೇ ಎರಡನೇ ಭಾಗದಲ್ಲಿಯೂ ಹಲವು ನಟರಿಂದ ಅತಿಥಿ ಪಾತ್ರ ಮಾಡಿಸುವ ಯೋಜನೆಯಲ್ಲಿ ಸಿನಿಮಾದ ನಿರ್ದೇಶಕ ಅಯಾನ್ ಮುಖರ್ಜಿ ಇದ್ದಾರೆ.

ಲೆಕ್ಕಾಚಾರ ಹಾಕಿ ನಟಿಸಲು ಆಹ್ವಾನ?

ಯಶ್ ಅನ್ನು ಸಿನಿಮಾಕ್ಕೆ ತೆಗೆದುಕೊಂಡು ಅವರ ಅಭಿಮಾನಿಗಳನ್ನು ಸಿನಿಮಾದತ್ತ ಸೆಳೆಯುವ ಯೋಜನೆ ಚಿತ್ರತಂಡದ್ದು, ಜೊತೆಗೆ ದಕ್ಷಿಣ ಭಾರತದ ನಟನನ್ನು ಸಿನಿಮಾದಲ್ಲಿ ಹಾಕಿಕೊಳ್ಳುವ ಮೂಲಕ ದಕ್ಷಿಣ ಭಾರತದಲ್ಲಿ ಪ್ರಚಾರ ಮಾಡಲು ಅನುಕೂಲ ಮಾಡಿಕೊಳ್ಳುವುದು ಸಹ ಚಿತ್ರತಂಡದ ಯೋಜನೆ. ನಾಗಾರ್ಜುನಗೆ ಸಿನಿಮಾದಲ್ಲಿ ಪಾತ್ರ ನೀಡಿ, ದಕ್ಷಿಣ ಭಾರತದಲ್ಲಿ ಸಿನಿಮಾದ ಬಗ್ಗೆ ಭರ್ಜರಿ ಪ್ರಚಾರವನ್ನು ಚಿತ್ರತಂಡ ಮಾಡಿತ್ತು. ಒಳ್ಳೆಯ ಕಲೆಕ್ಷನ್ ಅನ್ನೂ ದಕ್ಷಿಣ ಭಾರತದಿಂದ ಮಾಡಿತ್ತು. ಇದೇ ಯೋಜನೆ ಇಟ್ಟುಕೊಂಡು ಯಶ್ ಅನ್ನು ಚಿತ್ರತಂಡ ಸಂಪರ್ಕಿಸಿತ್ತು, ಆದರೆ ಯಶ್‌ ಕಡೆಯಿಂದ ನಿರಾಕರಣೆ ಕೇಳಿ ಹಿಂತಿರುಗಿದೆ.

ಹೃತಿಕ್-ರಣ್ವೀರ್ ಸಹ ನಟಿಸಿಲ್ಲ

ಯಶ್ ಮಾತ್ರವಲ್ಲ, ಬಾಲಿವುಡ್‌ನಲ್ಲಿಯೂ ಕೆಲವು ನಟರು 'ಬ್ರಹ್ಮಾಸ್ತ್ರ 2' ಸಿನಿಮಾದಲ್ಲಿ ನಟಿಸಲು ನಿರಾಕರಿಸಿದ್ದಾರೆ. ನಟ ಹೃತಿಕ್ ರೋಷನ್‌ ಹಾಗೂ ನಟ ರಣ್ವೀರ್ ಸಿಂಗ್‌ಗೆ ಸಿನಿಮಾದಲ್ಲಿ ನಟಿಸುವಂತೆ ಕೇಳಿಕೊಳ್ಳಲಾಗಿತ್ತು. ಈ ಇಬ್ಬರೂ ನಟರು ತಾವು 'ಬ್ರಹ್ಮಾಸ್ತ್ರ 2' ಸಿನಿಮಾದಲ್ಲಿ ನಟಿಸುವುದಿಲ್ಲ ಎಂದಿದ್ದಾರೆ. ಆದರೆ ಈ ಸಿನಿಮಾದಲ್ಲಿ ದೀಪಿಕಾ ಪಡುಕೋಣೆ ನಟಿಸುತ್ತಿದ್ದಾರೆ ಎನ್ನಲಾಗುತ್ತಿದೆ. ಆದರೆ ಅದಿನ್ನೂ ಖಾತ್ರಿಯಾಗಿಲ್ಲ.

ಸೆಪ್ಟೆಂಬರ್ 09 ರಂದು ಬಿಡುಗಡೆ ಆಗಿದ್ದ ಸಿನಿಮಾ

'ಬ್ರಹ್ಮಾಸ್ತ್ರ' ಸಿನಿಮಾದ ಮೊದಲ ಭಾಗ 2022 ರ ಸೆಪ್ಟೆಂಬರ್ 9 ರಂದು ಬಿಡುಗಡೆ ಆಗಿತ್ತು. ಸಿನಿಮಾದಲ್ಲಿ ರಣ್ಬೀರ್ ಕಪೂರ್ ನಾಯಕನಾಗಿ ನಟಿಸಿದ್ದರು. ಆಲಿಯಾ ಭಟ್ ನಾಯಕಿಯಾಗಿದ್ದರು. ಸಿನಿಮಾವನ್ನು ಅಯಾನ್ ಮುಖರ್ಜಿ ನಿರ್ದೇಶನ ಮಾಡಿದ್ದರು. ಕರಣ್ ಜೋಹರ್, ರಣ್ಬೀರ್ ಕಪೂರ್, ಅಯಾನ್ ಮುಖರ್ಜಿ, ಅಪೂರ್ವ ಮೆಹ್ತ, ನಮಿತಾ ಮೆಹ್ತ ಅವರುಗಳು ಸಿನಿಮಾಕ್ಕೆ ಬಂಡವಾಳ ಹೂಡಿದ್ದರು. ಈ ಸಿನಿಮಾದ ಹಲವು ಭಾಗಗಳು ಮುಂದಿನ ಕೆಲ ವರ್ಷಗಳಲ್ಲಿ ಬಿಡುಗಡೆ ಆಗಲಿವೆ ಎನ್ನಲಾಗುತ್ತಿದೆ.