167 ಭಾಷೆಗಳಲ್ಲಿ ಬಿಡುಗಡೆ ಆಗಲಿದೆ 'ಅವತಾರ್ 2' ಸಿನಿಮಾ

167 ಭಾಷೆಗಳಲ್ಲಿ ಡಬ್ ಮಾಡಲಾಗುತ್ತದೆ

ಈ ಹಿಂದೆ ಹಾಲಿವುಡ್ ಸಿನಿಮಾಗಳನ್ನು ಕೆಲವು ಭಾಷೆಗಳಲ್ಲಿ ಮಾತ್ರವೇ ಡಬ್ ಮಾಡಲಾಗುತ್ತಿತ್ತು, ಚೈನೀಸ್, ಫ್ರೆಂಚ್, ಹಿಂದಿ, ತೆಲುಗು ಇನ್ನಿತರ ಕೆಲವು ಭಾಷೆಗಳಿಗೆ ಡಬ್ ಮಾಡಿ ಅಷ್ಟೆ ಸಿನಿಮಾವನ್ನು ಬಿಡುಗಡೆ ಮಾಡಲಾಗುತ್ತಿತ್ತು. ಆದರೆ ಇದೇ ಮೊದಲ ಬಾರಿಗೆ 'ಅವತಾರ್ 2' ಸಿನಿಮಾವನ್ನು ಬರೋಬ್ಬರಿ 167 ಭಾಷೆಗಳಿಗೆ ಡಬ್ ಮಾಡಿ ಬಿಡುಗಡೆ ಮಾಡಲಾಗುತ್ತಿದೆ.

ಸಿನಿಮಾ ಬಿಡುಗಡೆ ಯಾವಾಗ?

ವಿಶ್ವದ ಅತಿ ದೊಡ್ಡ ಬಜೆಟ್‌ನ ಸಿನಿಮಾ ಎಂದೇ ಕರೆಸಿಕೊಳ್ಳುತ್ತಿರುವ 'ಅವತಾರ್ 2' ಇದೇ ವರ್ಷ ಡಿಸೆಂಬರ್ 16 ರಂದು ಬಿಡುಗಡೆ ಆಗಲಿದೆ. ಸಿನಿಮಾದ ಟೀಸರ್ ಮೇ 06ರಂದು ಬಿಡುಗಡೆ ಆಗಲಿದೆ. ಟೀಸರ್‌ ಬಿಡುಗಡೆಯ ಮತ್ತೊಂದು ವಿಶೇಷತೆಯೆಂದರೆ 'ಅವತಾರ್ 2' ಸಿನಿಮಾದ ಟೀಸರ್ ಅನ್ನು ಮಾರ್ವೆಲ್ ಸಿನಿಮಾಸ್‌ನ 'ಡಾಕ್ಟರ್ ಸ್ಟ್ರೇಂಜ್‌' ಸಿನಿಮಾ ಸರಣಿಯ ಹೊಸ ಸಿನಿಮಾದೊಟ್ಟಿಗೆ ಬಿಡುಗಡೆ ಮಾಡಲಾಗುತ್ತಿದೆ. ಇದು ಸಹ ಕುತೂಹಲ ಕೆರಳಿಸಿದೆ. 'ಅವತಾರ್ 2' ಸಿನಿಮಾವನ್ನು ಸಿನಿಮಾದ ನಿರ್ದೇಶಕರೂ ಆಗಿರುವ ಜೇಮ್ಸ್ ಕ್ಯಾಮರೂನ್ ನಿರ್ಮಾಣ ಮಾಡಿದ್ದಾರೆ. ಇವರ ಜೊತೆಗೆ 'ಟೈಟಾನಿಕ್' ಸಿನಿಮಾಕ್ಕೆ ಬಂಡವಾಳ ಹೂಡಿದ್ದ ಜೇಮ್ಸ್ ಲಾಂಡೌ ಸಹ ಇದ್ದಾರೆ. ಸಿನಿಮಾವನ್ನು ಲೈಟ್‌ಸ್ಟ್ರಾಮ್ ನಿರ್ಮಾಣ ಸಂಸ್ಥೆಯ ವತಿಯಿಂದ ನಿರ್ಮಾಣ ಮಾಡಲಾಗುತ್ತಿದೆ. ವಿತರಣೆ ಮಾಡಲಿರುವುದು 20 ಸೆಂಚುರಿ ಫಾಕ್ಸ್.

Recommended Video

KGF 2 Collection | KGF2 ಖಜಾನೆಗೆ ಶೀಘ್ರದಲ್ಲಿಯೇ 1000 ಕೋಟಿ | Yash | Prashanth Neel | Srinidhi Shetty

'ಅವತಾರ್' ಸರಣಿಯ ಐದು ಸಿನಿಮಾಗಳು ತೆರೆಗೆ ಬರಲಿವೆ

'ಅವತಾರ್ 2' ಹಾಗೂ 'ಅವತಾರ್ 3' ಸಿನಿಮಾ ಏಕಕಾಲದಲ್ಲಿ ಚಿತ್ರೀಕರಣ ಪ್ರಾರಂಭಿಸಿದವು. 2017 ರಲ್ಲಿ ಪ್ರಾರಂಭವಾದ ಚಿತ್ರೀಕರಣ ಇದೀಗ ಐದು ವರ್ಷಗಳ ಬಳಿಕ ಬಹುತೇಕ ಪೂರ್ಣವಾಗಿದ್ದು ಕೆಲವು ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳ ಬಳಿಕ ಮೊದಲಿಗೆ 'ಅವತಾರ್ 2' ಸಿನಿಮಾ ಇದೇ ವರ್ಷದ ಡಿಸೆಂಬರ್ ತಿಂಗಳಲ್ಲಿ ಬಿಡುಗಡೆ ಆಗಲಿದೆ. ನಂತರ 2024ರ ಡಿಸೆಂಬರ್ ವೇಳೆಗೆ 'ಅವತಾರ್ 3' ಸಿನಿಮಾ ಬಿಡುಗಡೆ ಆಗಲಿದೆ. ಆ ಬಳಿಕ ಅವತಾರ್ ಸಿನಿಮಾ ಸರಣಿಯ ನಾಲ್ಕನೇ ಸಿನಿಮಾ 'ಅವತಾರ್: ಟಲ್ಕನ್ ರೈಡರ್' ಸಿನಿಮಾ 2026 ಕ್ಕೆ ಬಿಡುಗಡೆ ಆಗಲಿದೆ. ಬಳಿಕ 2028 ಕ್ಕೆ 'ಅವತಾರ್ 5' ಬಿಡುಗಡೆ ಆಗಲಿದೆ. ಈ ಎಲ್ಲ ಸಿನಿಮಾಗಳನ್ನು ಜೇಮ್ಸ್ ಕ್ಯಾಮರನ್ ಅವರೇ ನಿರ್ದೇಶಿಸಲಿದ್ದಾರೆ.

ನಿರ್ದೇಶಕ ಜೇಮ್ಸ್ ಕ್ಯಾಮೆರಾನ್

ಜೇಮ್ಸ್ ಕ್ಯಾಮೆರಾನ್ ವಿಶ್ವದ ಅತ್ಯುತ್ತಮ ನಿರ್ದೇಶಕರಲ್ಲಿ ಒಬ್ಬರೆನಿಸಿಕೊಂಡಿದ್ದಾರೆ. 1982 ರಲ್ಲಿ 'ಫಿರ್ಹಾನಾ 2' ಸಿನಿಮಾ ಮೂಲಕ ನಿರ್ದೇಶನ ಆರಂಭಿಸಿದ ಜೇಮ್ಸ್, ಆ ಬಳಿಕ ಆಲ್‌ ಟೈಮ್ ಬ್ಲಾಕ್‌ ಬಸ್ಟರ್ 'ಟರ್ಮಿನೇಟರ್', 'ಟರ್ಮಿನೇಟರ್ 2' ಸಿನಿಮಾಗಳನ್ನು ನಿರ್ದೇಶಿಸಿದರು. ಅದರ ಜೊತೆ 'ಏಲಿಯನ್ಸ್', 'ದಿ ಅಬಿಸ್', 'ಟ್ರು ಲೈಸ್', 'ಗೋಸ್ಟ್ಸ್ ಆಫ್‌ ದಿ ಅಬೀಸ್', 'ಏಲಿಯನ್ಸ್ ಆಫ್‌ ದಿ ಡೀಪ್', 'ಅವತಾರ್' ಸಿನಿಮಾಗಳನ್ನು ನಿರ್ದೇಶನ ಮಾಡಿದ್ದಾರೆ. 2009 ರಲ್ಲಿ ಬಿಡುಗಡೆ ಆದ 'ಅವತಾರ್' ಸಿನಿಮಾದ ಬಳಿಕ ಇನ್ಯಾವ ಸಿನಿಮಾವನ್ನು ಜೇಮ್ಸ್ ನಿರ್ದೇಶಿಸಿಲ್ಲ. ತಮ್ಮನ್ನು ಸಂಪೂರ್ಣವಾಗಿ 'ಅವತಾರ್' ಸಿನಿಮಾ ಸರಣಿಗೆ ಸಮರ್ಪಿಸಿಕೊಂಡಿದ್ದಾರೆ ಜೇಮ್ಸ್.