'ಅವತಾರ್' ಸರಣಿ ವಿಚಾರದಲ್ಲಿ ಜೇಮ್ಸ್ ಕ್ಯಾಮರೂನ್ ಶಾಕಿಂಗ್ ನಿರ್ಧಾರ!

ಅವತಾರ್- 4, 5 ಇರುತ್ತಾ ಇರಲ್ವಾ?

ಸರಣಿಯ 2ನೇ ಸಿನಿಮಾ ಬಿಡುಗಡೆಗೂ ಮೊದಲೇ 4 ಹಾಗೂ 5ನೇ ಸಿನಿಮಾಗಳ ಬಗ್ಗೆ ನಿರ್ದೇಶಕ ಜೇಮ್ಸ್ ಕ್ಯಾಮರೂನ್ ಅಚ್ಚರಿಯ ಹೇಳಿಕೆ ನೀಡಿದ್ದಾರೆ. 'ಅವತಾರ್' ಸರಣಿ ಸಿನಿಮಾಗಳನ್ನು ಮುಂದುವರೆಸೋದಾಗಿ ಬಹಳ ಹಿಂದೆಯೇ ನಿರ್ದೇಶಕರು ಹೇಳಿದ್ದರು. ಇದೀಗ ಸರಣಿಯ 2ನೇ ಸಿನಿಮಾ ಬಿಡುಗಡೆಗೆ ಸಿದ್ಧವಾಗಿದೆ. 3ನೇ ಸಿನಿಮಾ ಕೂಡ ಬರುತ್ತೆ. ಆದರೆ 4 ಹಾಗೂ 5ನೇ ಸಿನಿಮಾ ಅನುಮಾನ ಎನ್ನುವಂತೆ ಮಾತನಾಡಿದ್ದಾರೆ. 2ನೇ ಸಿನಿಮಾ ರಿಲೀಸ್ ಆದರೆ ಮಾತ್ರ 4 ಹಾಗೂ 5ನೇ ಸಿನಿಮಾ ಇರುತ್ತದೆ. ಇಲ್ಲ ಅಂದರೆ 3ನೇ ಚಿತ್ರಕ್ಕೆ ಕಥೆಗೆ ಅಂತ್ಯ ಹಾಡುವುದಾಗಿ ಜೇಮ್ಸ್ ಕ್ಯಾಮರೂನ್ ಹೇಳಿದ್ದಾರೆ.

ಹಾಲಿವುಡ್ ಪ್ರೇಕ್ಷಕರಿಗೆ ಶಾಕ್

ಜೇಮ್ಸ್ ಕ್ಯಾಮರೂನ್ ಹೇಳಿಕೆ ಕೆಲವರಿಗೆ ಶಾಕ್ ತಂದಿದೆ. ಮತ್ತೆ ಕೆಲವರಿಗೆ ಅಚ್ಚರಿ ಉಂಟು ಮಾಡಿದೆ. 'ಅವತಾರ್' ಸರಣಿ ಸಿನಿಮಾಗಳ ಬಗ್ಗೆ ಪ್ರೇಕಕ್ಷರು ಬಹಳ ಕಾತರರಾಗಿದ್ದಾರೆ. ಆ ಕಥೆ, ಆ ಸಿನಿಮಾ ಅಂಥಾದೊಂದು ಟ್ರೆಂಡ್ ಸೆಟ್ ಮಾಡಿದೆ. 8 ವರ್ಷಗಳ ಹಿಂದೆಯೇ ನಿರ್ದೇಶಕರು ಸೀಕ್ವೆಲ್ ಘೋಷಿಸಿದ್ದರು. ಅಂದಿನಿಂದಲೂ ಯಾವಾಗ ಸಿನಿಮಾ ಬರುತ್ತೋ ಎಂದು ಕಾಯುತ್ತಿದ್ದಾರೆ. ಕಾರಣಾಂತರಗಳಿಂದ ತಡವಾಗುತ್ತಾ ಬಂದಿತ್ತು. ಕೊರೋನ ಹಾವಳಿಯಿಂದ ಮತ್ತಷ್ಟು ತಡವಾಗಿದೆ.

'ಅವತಾರ್: ದಿ ವೇ ಆಫ್ ವಾಟರ್'

2009ರಲ್ಲಿ ತೆರೆಮೇಲೆ ಅವತಾರ್ ಎನ್ನುವ ಅದ್ಭುತವನ್ನು ನಿರ್ದೇಶಕ ಜೇಮ್ಸ್ ಕ್ಯಾಮರೂನ್ ಸೃಷ್ಟಿಸಿದ್ದರು. ಇದೀಗ ಅದರ ಸೀಕ್ವೆಲ್ 'ಅವತಾರ್: ದಿ ವೇ ಆಫ್ ವಾಟರ್' ಮತ್ತಷ್ಟು ರೋಚಕವಾಗಿ ತಿದ್ದಿ ತೀಡಿದ್ದಾರೆ. ಗ್ರಾಫಿಕ್ಸ್‌ನಲ್ಲಿ ತೆರೆಮೇಲೆ ಮ್ಯಾಜಿಕ್ ಮಾಡುವ ಸುಳಿವು ಸಿಕ್ಕಿದೆ. ಜೇಕ್ ಸುಲ್ಲಿ ಮಗಳನ್ನು ಪರಿಚಯಿಸಿದ್ದು, ಬಹಳ ರೋಚಕ ಹಾಗೂ ಭಾವನಾತ್ಮಕ ಕಥೆಯನ್ನು ಹೇಳೊಕೆ ಬರುತ್ತಿರುವುದು ಗೊತ್ತಾಗುತ್ತಿದೆ. 3Dಯಲ್ಲಿ ಸಿನಿಮಾ ಹೊಸ ಲೋಕಕ್ಕೆ ಕರೆದುಕೊಂಡು ಹೋಗಲಿದೆ.

ಕನ್ನಡದಲ್ಲಿ ಡಬ್ ಆಗಿಲ್ಲ ಸೀಕ್ವೆಲ್

ಪ್ರಪಂಚದ 160ಕ್ಕೂ ಅಧಿಕ ಭಾಷೆಗಳಲ್ಲಿ 'ಅವತಾರ್'-2 ಚಿತ್ರವನ್ನು ಬಿಡುಗಡೆ ಮಾಡುವುದಾಗಿ ಚಿತ್ರತಂಡ ಹೇಳಿದೆ. ದಕ್ಷಣ ಭಾರತದ ಭಾಷೆಗಳಿಗೂ ಡಬ್ ಆಗುತ್ತಿದೆ. ಆದರೆ ಕನ್ನಡಕ್ಕೆ ಸಿನಿಮಾ ಡಬ್ ಆಗಿಲ್ಲ. ಈ ಬಗ್ಗೆ ಸೋಶಿಯಲ್ ಮೀಡಿಯಾದಲ್ಲಿ ಅಸಮಾಧಾನ ವ್ಯಕ್ತವಾಗುತ್ತಿದೆ. ಕನ್ನಡ ಸಿನಿಮಾಗಳು ಪ್ರಪಂಚದಾದ್ಯಂತ ಸದ್ದು ಮಾಡುತ್ತಿರುವಾಗ 'ಅವತಾರ್‌'- 2 ಯಾಕೆ ಡಬ್ ಆಗುತ್ತಿಲ್ಲ ಎಂದು ಕೆಲವರು ಕೇಳುತ್ತಿದ್ದಾರೆ. ಇನ್ನು 2024ರ ಡಿಸೆಂಬರ್‌ನಲ್ಲಿ 'ಅವತಾರ್' - 3 ರಿಲೀಸ್ ಆಗುವ ಸಾಧ್ಯತೆಯಿದೆ.