ನೆಟ್‌ಫ್ಲಿಕ್ಸ್‌ನಲ್ಲಿ ಎಚ್‌ಡಿ ಗುಣಮಟ್ಟದ ವಿಡಿಯೋ ಪ್ರಸಾರಕ್ಕೆ ಬ್ರೇಕ್?

ಇಂಟರ್ನೆಟ್ ಮೇಲೆ ಒತ್ತಡ

ಅನೇಕ ದೇಶಗಳು ವೈರಸ್ ಹರಡುವಿಕೆಯ ಭೀತಿಯಿಂದ ವಿಮಾನಗಳ ಹಾರಾಟ ಸ್ಥಗಿತಗೊಳಿಸಿವೆ. ಶಾಲೆಗಳಿಗೆ ರಜೆ ನೀಡಲಾಗಿದೆ. ಲಕ್ಷಾಂತರ ಜನರಿಗೆ ಮನೆಯಿಂದಲೇ ಕೆಲಸ ಮಾಡುವಂತೆ ಸೂಚಿಸಲಾಗುತ್ತಿದೆ. ಈ ನಡುವೆ ಅಂತರ್ಜಾಲದ ವಿಪರೀತ ಬಳಕೆಯಿಂದ ಅದರ ವ್ಯವಸ್ಥೆ ಮೇಲೆ ಅತೀವ ಒತ್ತಡ ಬೀಳುತ್ತಿದೆ ಎಂದು ಯುರೋಪಿಯನ್ ಒಕ್ಕೂಟ ಅಭಿಪ್ರಾಯಪಟ್ಟಿದೆ.

ಬದಲಿಸಲು ವ್ಯವಸ್ಥೆ ಮಾಡಿ

ಈ ಬಗ್ಗೆ ತಾವು ನೆಟ್‌ಫ್ಲಿಕ್ಸ್ ಸಿಇಒ ರೀಡ್ ಹಾಸ್ಟಿಂಗ್ಸ್ ಅವರೊಂದಿಗೆ ಮಾತನಾಡಿರುವುದಾಗಿ ಯುರೋಪಿಯನ್ ಕಮಿಷನರ್ ಥಿಯೆರ್ರಿ ಬ್ರೆಟನ್ ತಿಳಿಸಿದ್ದಾರೆ. ಸುಮಾರು 450 ಮಿಲಿಯನ್‌ಗೂ ಅಧಿಕ ಜನರಿಗೆ ಯುರೋಪಿಯನ್ ಒಕ್ಕೂಟದ ಅಂತರ್ಜಾಲ ಮಾರುಕಟ್ಟೆಯ ಹೊಣೆಗಾರಿಕೆ ಹೊತ್ತಿರುವ ಅವರು, ಎಚ್‌ಡಿ ಗುಣಮಟ್ಟ ಅಗತ್ಯವಿಲ್ಲದೆ ಇರುವ ಜನರು ಮತ್ತು ಕಂಪೆನಿಗಳು ಸಾಮಾನ್ಯ ಗುಣಮಟ್ಟಕ್ಕೆ ಆಯ್ಕೆ ಬದಲಿಸಿಕೊಳ್ಳುವಂತೆ ಸಲಹೆ ನೀಡಿದ್ದಾರೆ.

ಅನುಕೂಲಕರವಾಗಬೇಕು

'ಬ್ರೆಟನ್ ಹೇಳಿರುವುದು ಸೂಕ್ತವಾಗಿದೆ. ಇಂತಹ ಸಂದಿಗ್ಧ ಪರಿಸ್ಥಿತಿಯಲ್ಲಿ ಇಂಟರ್ನೆಟ್ ಸರಾಗ ನಿರ್ವಹಣೆಗೆ ಅನುಕೂಲವಾಗುವಂತೆ ಇರಬೇಕು. ದೂರ ಸಂಪರ್ಕ ಸಂವಹನ ಕಂಪೆನಿಗಳಿಗೆ ಉಚಿತವಾಗಿ ನಮ್ಮ ಮುಕ್ತ ಸಂಪರ್ಕ ಸೇವೆಯನ್ನು ಒದಗಿಸುವುದು ಸೇರಿದಂತೆ ಹಲವು ವರ್ಷಗಳಿಂದ ನೆಟ್‌ಫ್ಲಿಕ್ಸ್‌ನ ದಕ್ಷತೆಯ ಮೇಲೆ ಗಮನ ಹರಿಸುತ್ತಿದ್ದೇವೆ' ಎಂದು ನೆಟ್‌ಫ್ಲಿಕ್ಸ್ ವಕ್ತಾರರು ತಿಳಿಸಿದ್ದಾರೆ.

ಇಂಟರ್ನೆಟ್ ಬಳಕೆ ಕಡಿಮೆಯಾಗಲಿದೆ

ಲಭ್ಯವಿರುವ ನೆಟ್‌ವರ್ಕ್ ಸಾಮರ್ಥ್ಯಕ್ಕೆ ಅನುಗುಣವಾಗಿ ಈಗಾಗಲೇ ಸ್ಟ್ರೀಮಿಂಗ್ ಗುಣಮಟ್ಟವನ್ನು ಹೊಂದಿಸಲಾಗಿದೆ. ಬಳಕೆದಾರರು ನೆಟ್‌ಫ್ಲಿಕ್ಸ್ ಬಳಸುವಾಗ ಕಡಿಮೆ ಇಂಟರ್ನೆಟ್ ಬಳಕೆಯಾಗುವಂತೆ ಮಾಡಲು ಕೂಡ ವಿಶೇಷ ಡೆಲಿವರಿ ನೆಟ್‌ವರ್ಕ್ ಉಪಯೋಗಿಸಲಾಗಿದೆ ಎಂದು ಸಂಸ್ಥೆ ತಿಳಿಸಿದೆ.