ಕೇರಳದಲ್ಲಿ 'ಮಾಸ್ಟರ್' ಜೊತೆ ಚಿತ್ರಮಂದಿರಗಳು ಪುನರಾರಂಭ

ಸುಮಾರು 11 ತಿಂಗಳ ಬಳಿಕ ಕೇರಳದಲ್ಲಿ ಸಿನಿಮಾ ಥಿಯೇಟರ್‌ಗಳು ಪುನರಾರಂಭವಾಗಿದೆ. ತಮಿಳು ನಟ ವಿಜಯ್ ನಟನೆಯ ಮಾಸ್ಟರ್ ಸಿನಿಮಾ ಬಿಡುಗಡೆಯಾಗುವ ಮೂಲಕ ಕೇರಳದಲ್ಲಿ ಚಿತ್ರಮಂದಿರಗಳನ್ನು ತೆರೆಯಲಾಗಿದೆ.

ಕೇರಳದ ಸುಮಾರು 200 ಥಿಯೇಟರ್‌ಗಳಲ್ಲಿ ಮಾಸ್ಟರ್ ಸಿನಿಮಾ ತೆರೆಕಂಡಿದೆ ಎಂಬ ಮಾಹಿತಿ ಇದೆ. ಕೊರೊನಾ ಲಾಕ್‌ಡೌನ್ ನಿಯಮಗಳ ಅಡಿಯಲ್ಲಿ ಚಿತ್ರಮಂದಿರ ಕಾರ್ಯನಿರ್ವಹಿಸಲು ಅನುಮತಿ ನೀಡಲಾಗಿದ್ದು, ಶೇಕಡಾ 50ರಷ್ಟು ಮಾಸ್ ಅವಕಾಶ ನೀಡಲಾಗಿದೆ.

50 ಪರ್ಸೆಂಟ್ ಆಸನ ಭರ್ತಿ ಮಾಡಿರುವ ಹಿನ್ನೆಲೆ ಟಿಕೆಟ್ ಬೆಲೆ ಏರಿಕೆಯಾಗಬಹುದು ಎಂದು ಹೇಳಲಾಗಿತ್ತು. ಆದ್ರೆ, ಟಿಕೆಟ್ ಬೆಲೆಯಲ್ಲಿ ಯಾವುದೇ ವ್ಯತ್ಯಾಸವಾಗಿಲ್ಲ. ಪ್ರತಿದಿನ 5 ಶೋ ನಡೆಸಲು ಕೇರಳ ಪ್ರದರ್ಶಕರ ಸಂಘ ನಿರ್ಧರಿಸಿದೆ. ಬೆಳಗ್ಗೆ 9 ಗಂಟೆಗೆ ಬಹುತೇಕ ಕಡೆ ಮಾರ್ನಿಂಗ್ ಶೋ ಆರಂಭವಾಗಲಿದೆ.

ಇನ್ನು ಜನವರಿ 22 ರಂದು ಮಲಯಾಳಂನ ಮೊದಲ ಸಿನಿಮಾ ಚಿತ್ರಮಂದಿರದಲ್ಲಿ ತೆರೆಕಾಣಲಿದೆ. ವೆಲ್ಲಂ ನಟನೆಯ ಜಯಸೂರ್ಯ ಸಿನಿಮಾ ಅಧಿಕೃತವಾಗಿ ಲಾಕ್‌ಡೌನ್ ಆದ ಬಳಿಕ ಥಿಯೇಟರ್‌ಗೆ ಬರ್ತಿದೆ.

ಇನ್ನುಳಿದಂತೆ ಮಾಸ್ಟರ್ ಸಿನಿಮಾ ತಮಿಳುನಾಡು, ಕರ್ನಾಟಕ, ಆಂಧ್ರಪ್ರದೇಶ, ತೆಲಂಗಾಣ ಸೇರಿದಂತೆ ಹಲವು ರಾಜ್ಯಗಳಲ್ಲಿ ಬಿಡುಗಡೆಯಾಗಿದೆ. ಲೋಕೇಶ್ ಕನಕರಾಜ್ ನಿರ್ದೇಶನದ ಈ ಚಿತ್ರದಲ್ಲಿ ವಿಜಯ್, ವಿಜಯ್ ಸೇತುಪತಿ, ಮಾಳವಿಕಾ ಮೋಹನ್ ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.