ಕೇರಳ ಪೂರ್ತಿ ಒಂದೇ ಸಿನಿಮಾ! ದಾಖಲೆ ಬರೆಯಲು ಸಜ್ಜಾದ 'ಮರಕ್ಕರ್'

ಚಿತ್ರಮಂದಿರ ಪೂರ್ಣ ತೆರೆದಿಲ್ಲ

ಕೇರಳದಲ್ಲಿ ಚಿತ್ರಮಂದಿರಗಳು ಇನ್ನೂ ಪೂರ್ಣವಾಗಿ ತೆರೆದಿಲ್ಲ. ಚಿತ್ರಮಂದಿರಗಳು ಇನ್ನೇನು ತೆರೆಯಲಿವೆ ಎಂದುಕೊಳ್ಳುವಾಗಲೇ ಕೋವಿಡ್ ಹೊಸ ವೇರಿಯಂಟ್ ಆತಂಕ ಬಂದ ಕಾರಣ 50% ಆಕ್ಯುಪೆನ್ಸಿಯನ್ನೇ ಮುಂದುವರೆಸಲಾಗಿದೆ. ಇದರಿಂದ ಆಗಬಹುದಾದ ನಷ್ಟವನ್ನು ಸರಿತೂಗಿಸಲೆಂದು ಶೋಗಳ ಸಂಖ್ಯೆಯನ್ನು ಹೆಚ್ಚು ಮಾಡಿಕೊಳ್ಳಲಾಗಿದೆ. ಕೇರಳ ಹೊರತುಪಡಿಸಿದರೆ ಗಲ್ಫ್ ರಾಷ್ಟ್ರಗಳಲ್ಲಿ ಮೋಹನ್‌ಲಾಲ್ ಸಿನಿಮಾಗಳಿಗೆ ಭಾರಿ ಬೇಡಿಕೆ ಇದೆ. ಅಲ್ಲಿಯೂ ಸಹ ದೊಡ್ಡ ಸಂಖ್ಯೆಯಲ್ಲಿ ಶೋಗಳನ್ನು ಆಯೋಜಿಸಲಾಗಿದೆ.

ದುಪ್ಪಟ್ಟು ಅಡ್ವಾನ್ಸ್ ಹಣ ಪಡೆಯಲಾಗಿದೆ

ಇದು ಮಾತ್ರವೇ ಅಲ್ಲದೆ ಚಿತ್ರಮಂದಿರಗಳ ಮಾಲೀಕರು ಹಾಗೂ ವಿತರಕರಿಂದ ದುಪಟ್ಟು ಅಡ್ವಾನ್ಸ್ ಮೊತ್ತವನ್ನು ಸಹ ಪಡೆದುಕೊಳ್ಳಲಾಗಿದೆ. ಮೋಹನ್‌ಲಾಲ್‌ರ 'ಮರಕ್ಕರ್' ಸಿನಿಮಾಕ್ಕೆ ಕೇರಳದಲ್ಲಿ ಭಾರಿ ಕ್ರೇಜ್ ಇದ್ದು, ಅದೇ ಕಾರಣಕ್ಕೆ ಚಿತ್ರಮಂದಿರಗಳು, ವಿತರಕರಿಂದ ಹೆಚ್ಚು ಮೊತ್ತದ ಹಣ ಪಡೆದುಕೊಳ್ಳಲಾಗಿದೆ. ಈ ಸಿನಿಮಾ ಪಕ್ಕಾ ಬ್ಲಾಕ್ ಬಸ್ಟರ್ ಆಗಲಿದೆ ಎಂಬ ವಿಶ್ಲೇಷಣೆ ಈಗಾಗಲೇ ಕೇಳಿ ಬಂದಿದೆ.

ಮಲಯಾಳಂನ ಮೊದಲ 100 ಕೋಟಿ ಬಜೆಟ್‌ನ ಸಿನಿಮಾ

ಪ್ರಿಯದರ್ಶನ್ ನಿರ್ದೇಶನದ 'ಮರಕ್ಕರ್' ಸಿನಿಮಾ ಕೇರಳದ ಮೊದಲ 100 ಕೋಟಿ ಬಜೆಟ್ ಸಿನಿಮಾ ಆಗಿದೆ. ಹಾಗಾಗಿ ಈ ಸಿನಿಮಾದಲ್ಲಿ ಹಣ ಗಳಿಸುವುದು ನಿರ್ಮಾಪಕರರಿಗೆ ಅತ್ಯವಶ್ಯವಾಗಿದೆ. ಸಿನಿಮಾವನ್ನು ಒಟಿಟಿಯೊಂದಕ್ಕೆ ಭಾರಿ ದೊಡ್ಡ ಮೊತ್ತಕ್ಕೆ ಮಾರಾಟ ಮಾಡಲಾಗಿತ್ತು. ಆದರೆ ಕೇರಳದ ಚಿತ್ರಮಂದಿರ ಮಾಲೀಕರು, ವಿತರಕರ ಸಂಘ ಹಾಗೂ ಸರ್ಕಾರ ಸಹ ಇದಕ್ಕೆ ಆಕ್ಷೇಪ ವ್ಯಕ್ತಪಡಿಸಿತು. ಸರ್ಕಾರವೇ ಮಧ್ಯ ಪ್ರವೇಶಿಸಿ 'ಮರಕ್ಕರ್' ಸಿನಿಮಾ ನಿರ್ಮಾಪಕ ಆಂಟೊನಿ ಪೆರುಂಬವೂರ್ ಹಾಗೂ ಮೋಹನ್‌ಲಾಲ್ ಅವರೊಟ್ಟಿಗೆ ಮಾತುಕತೆ ನಡೆಸಿ ಸಿನಿಮಾವು ಚಿತ್ರಮಂದಿರದಲ್ಲಿಯೇ ಬಿಡುಗಡೆ ಆಗುವಂತೆ ಮಾಡಿದ್ದಾರೆ. ಸಿನಿಮಾಕ್ಕೆ 100 ಕೋಟಿ ಬಂಡವಾಳ ಹಾಕಿದ್ದಲ್ಲದೆ ಎರಡು ವರ್ಷ ಕಾದಿದ್ದಾರೆ ನಿರ್ಮಾಪಕ ಆಂಟೊನಿ ಪೆರವಂಬೂರ್.

ಕುಂಜಳಿ ಮರಕ್ಕರ್ ಕುರಿತಾದ ಸಿನಿಮಾ

'ಮರಕ್ಕರ್' ಸಿನಿಮಾವು ಕುಂಜಳಿ ಮರಕ್ಕರ್ ಜೀವನ ಕುರಿತಾದ ಕತೆಯಾಗಿದ್ದು, ಸಿನಿಮಾದಲ್ಲಿ ಮೋಹನ್‌ಲಾಲ್ ಕುಂಜಳಿ ಮರಕ್ಕರ್ ಪಾತ್ರದಲ್ಲಿ ನಟಿಸಿದ್ದಾರೆ. ಜೊತೆಗೆ ಬಾಲಿವುಡ್‌ನ ಸುನಿಲ್ ಶೆಟ್ಟಿ, ಅರ್ಜುನ್ ಸರ್ಜಾ ಸಹ ಸಿನಿಮಾದಲ್ಲಿದ್ದಾರೆ. ನಾಯಕಿಯಾಗಿ ಕೀರ್ತಿ ಸುರೇಶ್, ಸುಹಾಸಿನಿ ಅವರುಗಳು ಇದ್ದಾರೆ. ಸಿನಿಮಾವನ್ನು ಪ್ರಿಯದರ್ಶನ್ ನಿರ್ದೇಶನ ಮಾಡಿದ್ದು, ಸಿನಿಮಾವು ಮಲಯಾಳಂ, ಕನ್ನಡ, ತೆಲುಗು, ತಮಿಳು ಹಾಗೂ ಹಿಂದಿ ಭಾಷೆಯಲ್ಲಿ ಬಿಡುಗಡೆಗೊಳ್ಳಲಿದೆ.