Year Ender 2022 : ಈ ವರ್ಷದ ಟಾಪ್ ಹಾಡುಗಳು ಯಾವುವು? ಕನ್ನಡದ ಟಾಪ್ ಹಾಡು ಯಾವುದು?

ಹೆಚ್ಚು ಕೇಳಲಾದ ಹಾಡು ಯಾವುದು?

ಈ ವರ್ಷ ಅಮೆಜಾನ್ ಪ್ರೈಂನಲ್ಲಿ ಅತಿ ಹೆಚ್ಚು ಬಾರಿ ಕೇಳಲಾದ ಹಾಡು 'ಕೇಸರಿಯಾ'. 'ಬ್ರಹ್ಮಾಸ್ತ್ರ'ದ ಸಿನಿಮಾದ ಈ ಹಾಡನ್ನು ಅತಿ ಹೆಚ್ಚು ಬಾರಿ ಕೇಳಲಾಗಿದೆಯಂತೆ. ಅಮೆಜಾನ್ ಮ್ಯೂಸಿಕ್‌ನಲ್ಲಿ ಅತಿ ಹೆಚ್ಚು ಹುಡುಕಲ್ಪಟ್ಟ ಕಲಾವಿದ ಹಿಂದಿ ಗಾಯಕ ಅರಿಜಿತ್ ಸಿಂಗ್. ಅತಿ ಹೆಚ್ಚು ಹುಡುಕಲ್ಪಟ್ಟ ಅಥವಾ ಕೇಳಲ್ಪಟ್ಟ ಹಿಂದಿ ಆಲ್ಬಂ ಅಥವಾ ಸಿನಿಮಾ 'ಜುಗ್‌ಜುಗ್‌ ಜಿಯೋ'. ಭಾರತದಲ್ಲಿ ಈ ವರ್ಷ ಹಿಂದಿ, ಇಂಗ್ಲೀಷ್ ಹಾಗೂ ತಮಿಳು ಹಾಡುಗಳನ್ನು ಅಮೆಜಾನ್ ಮ್ಯೂಸಿಕ್‌ ನಲ್ಲಿ ಅತಿ ಹೆಚ್ಚು ಜನ ಕೇಳಿದ್ದಾರಂತೆ.

ಕನ್ನಡದ ಯಾವ ಹಾಡು ಟಾಪ್ ಒನ್?

ಕನ್ನಡದ ವಿಷಯಕ್ಕೆ ಬಂದರೆ, ಸುದೀಪ್ ನಟನೆಯ 'ವಿಕ್ರಾಂತ್ ರೋಣ' ಸಿನಿಮಾದ 'ರಾರಾ ರಕ್ಕಮ್ಮ' ಹಾಡನ್ನು ಅಮೆಜಾನ್ ಮ್ಯೂಸಿಕ್‌ನಲ್ಲಿ ಅತಿ ಹೆಚ್ಚು ಜನ ಈ ವರ್ಷ ಕೇಳಿದ್ದಾರೆ. ಆದರೆ ಅತಿ ಹೆಚ್ಚು ಹುಡುಕಾಟ ಮಾಡಿರುವುದು, ಕೇಳಿರುವುದು 'ಕೆಜಿಎಫ್ 2' ಸಿನಿಮಾದ ಹಾಡುಗಳನ್ನು. ಕಲಾವಿದನ ಹುಡುಕಾಟದಲ್ಲಿ ಸಂಗೀತ ನಿರ್ದೇಶಕ ರವಿ ಬಸ್ರೂರು ಟಾಪ್‌ನಲ್ಲಿದ್ದಾರೆ ಅವರ ಸಿನಿಮಾದ ಅತಿ ಹೆಚ್ಚು ಹಾಡುಗಳನ್ನು ಜನ ಕೇಳಿದ್ದಾರಂತೆ ಅಮೆಜಾನ್ ಮ್ಯೂಸಿಕ್‌ನಲ್ಲಿ.

ತಮಿಳಿನ ಯಾವ ಹಾಡು ನಂಬರ್ 1?

ಇನ್ನು ತಮಿಳಿಗೆ ಈ ಬಾರಿ ಅಮೆಜಾನ್ ಮ್ಯೂಸಿಕ್‌ನಲ್ಲಿ ಮೂರನೇ ಸ್ಥಾನ ಲಭಿಸಿದೆ. 'ಬೀಸ್ಟ್' ಸಿನಿಮಾದ 'ಅರೆಬಿಕ್ ಕುತ್ತು' ಹಾಡನ್ನು ಹೆಚ್ಚು ಬಾರಿ ಕೇಳಿದ್ದಾರಂತೆ ಜನ. ಅಮೆಜಾನ್ ಮ್ಯೂಸಿಕ್‌ನಲ್ಲಿ ತಮಿಳಿನ ಸಂಗೀತ ನಿರ್ದೇಶಕ ಅನಿರುದ್ಧ್ ರವಿಚಂದ್ರನ್ ನಿರ್ದೇಶಿಸಿರುವ ಹಾಡುಗಳನ್ನು ಜನ ಹೆಚ್ಚು ಕೇಳಿದ್ದಾರೆ ಈ ವರ್ಷ. ಇನ್ನು ಈ ವರ್ಷ ಅತಿ ಹೆಚ್ಚು ಹುಡುಕಿ ಕೇಳಿದ ಹಾಡು 'ಬೀಸ್ಟ್' ತಮಿಳು ಸಿನಿಮಾದ್ದು. ಹಾಡುಗಳು ಹಿಟ್ ಆದರೂ ಪಾಪ ಸಿನಿಮಾ ಫ್ಲಾಪ್ ಆಗಿಬಿಟ್ಟಿದೆ.

ತೆಲುಗಿನ ಟಾಪ್ ಹಾಡು ಯಾವುದು?

ತೆಲುಗು ಭಾಷೆಯಲ್ಲಿ ಅತಿ ಹೆಚ್ಚು ಜನ ಈ ವರ್ಷ ಕೇಳಿರುವುದು 'ಊ ಅಂಟಾವ ಊಹು ಅಂಟಾವ' ಹಾಡನ್ನು. ವಿಶೇಷವೆಂದರೆ ಈ ಹಾಡು ಬಿಡುಗಡೆ ಆಗಿದ್ದು ಕಳೆದ ವರ್ಷ. ಆದರೆ ಅಮೆಜಾನ್ ಮ್ಯೂಸಿಕ್‌ನಲ್ಲಿ ಈ ವರ್ಷವೂ ಇದೇ ಹಾಡು ಟಾಪ್ ಒನ್ ತೆಲುಗು ಹಾಡಾಗಿದೆ. ಈ ವರ್ಷ ಅತಿ ಹೆಚ್ಚು ಹುಡುಕಲ್ಪಟ್ಟ ತೆಲುಗಿನ ಸಂಗೀತ ಕಲಾವಿದ ದೇವಿಶ್ರೀ ಪ್ರಸಾದ್. ಅತಿ ಹೆಚ್ಚು ಹುಡುಕಲ್ಪಟ್ಟ ಹಾಗೂ ಕೇಳಲ್ಪಟ್ಟ ಆಲ್ಬಂ 'ಪುಷ್ಪ', RRR ಗಿಂತಲೂ ಹೆಚ್ಚು 'ಪುಷ್ಪ' ಹಿಟ್ ಆಗಿದೆ ಅಮೆಜಾನ್ ಮ್ಯೂಸಿಕ್‌ನಲ್ಲಿ ಎಂಬುದು ವಿಶೇಷ. ಅಂದಹಾಗೆ 'ಪುಷ್ಪ' ಈ ವರ್ಷ ಬಿಡುಗಡೆ ಆದ ಸಿನಿಮಾ ಅಲ್ಲ. ಕಳೆದ ವರ್ಷದ ಸಿನಿಮಾ ಅದು.