ಮುಖಪುಟ

ಹಾಡೊಂದ ಕೇಳಿ

ಸ್ಯಾಂಡಲ್ ವುಡ್ ನಲ್ಲಿ ಎಣ್ಣೆ ಹಾಕಿ ಡ್ಯಾನ್ಸ್ ಮಾಡೋ ಸಂಪ್ರದಾಯ ನಿನ್ನೆ ಮೊನ್ನೆಯದಲ್ಲ. ಎಲ್ಲಾ ಸಿನಿಮಾಗಳಲ್ಲಿ ಒಂದು ಪೆಗ್ ಏರಿಸಿ ತೂರಾಡುತ್ತಾ ಕುಣಿಯೋ ಹಾಡು-ಡ್ಯಾನ್ಸು ಇರಲೇಬೇಕು. ಕೆಲವು ಸಿನಿಮಾಗಳಲ್ಲಿ ಲವ್ ಫೆಲ್ಯೂರು ಆಗಿ ಎಣ್ಣೆ ಹಾಕೋದು ಇದ್ದೇ ಇರುತ್ತೆ.

ಇದೀಗ ಈ ಎಲ್ಲಾ ಎಣ್ಣೆ ಹಾಡಿಗೆ ಹೊಸ ಸೇರ್ಪಡೆ ಹೊಸಬರ 'ಲೈಫು ಸೂಪರ್' ಚಿತ್ರದ 'ಬಿಲ್ಲು ಆಮೇಲೆ ನೋಡೋಣ ಕೊಟ್ಬಿಡಿ ಬೀರು' ಅನ್ನೋ ಹಾಡು.

ಗಾಯಕ ನವೀನ್ ಸಜ್ಜು ಹಾಡಿರುವ ಈ ಹಾಡನ್ನು ನಮ್ಮ ಸ್ಯಾಂಡಲ್ ವುಡ್ ನ ಸ್ಟಾರ್ ನಟರಾದ ಶ್ರೀಮುರಳಿ, ಧ್ರುವ ಸರ್ಜಾ, ಲೂಸ್ ಮಾದ ಯೋಗೇಶ್ ಮತ್ತವರ ಸಹೋದರ ಮಹೇಶ್, ಸಂಚಾರಿ ವಿಜಯ್, ನಿನಾಸಂ ಸತೀಶ್, ಚಿಕ್ಕಣ್ಣ ಮುಂತಾದವರು ಡಬ್ ಸ್ಮ್ಯಾಶ್ ಮಾಡಿದ್ದು, ಅದನ್ನು ಈ ಹಾಡಿನ ಮೇಕಿಂಗ್ ವಿಡಿಯೋ ನಡು-ನಡುವೆ ಸೇರಿಸಲಾಗಿರುವುದು ವಿಶೇಷ.

ಈ ಮೊದಲು ಶರಣ್ ಅವರ 'ವಿಕ್ಟರಿ' ಚಿತ್ರದ 'ಖಾಲಿ ಕ್ವಾಟ್ರು ಬಾಟ್ಲಿ ಹಂಗೆ ಲೈಫು' ಹಾಡು ಕೂಡ ಸಖತ್ ಫೇಮಸ್ ಆಗಿತ್ತು. ಈ ಹಾಡನ್ನು ಕೂಡ ಸ್ಯಾಂಡಲ್ ವುಡ್ ನ ಸ್ಟಾರ್ ನಟನರೆಲ್ಲರೂ ಮೆಚ್ಚಿಕೊಂಡು ಕೊಂಡಾಡಿದ್ದರು.

ಇದೀಗ ಅದೇ ಸಾಲಿನಲ್ಲಿ 'ಬಿಲ್ಲು ಆಮೇಲೆ ನೋಡೋಣ ಕೊಟ್ಬಿಡಿ ಬೀರು' ಕೂಡ ಫೇಮಸ್ ಆಗುತ್ತಿದೆ. ಎಲ್ಲಾ ಹೊಸಬರೇ ಸೇರಿಕೊಂಡು ಮಾಡುತ್ತಿರುವ ಚಿತ್ರಕ್ಕೆ ಈ ಮೂಲಕ ಕನ್ನಡ ಚಿತ್ರರಂಗದ ಸ್ಟಾರ್ ನಟರು ಪ್ರೋತ್ಸಾಹ ಕೊಡುತ್ತಿದ್ದಾರೆ.

ಈಗಾಗಲೇ ಈ ಹಾಡಿನ ಮೇಕಿಂಗ್ ವಿಡಿಯೋ ರಿಲೀಸ್ ಆಗಿದ್ದು, ನೋಡುಗರಿಗೆ ತುಂಬಾನೇ ಮನರಂಜನೆ ನೀಡುತ್ತಿದೆ. ಈ ವಿಡಿಯೋ ನೀವೂ ನೋಡಿ ಎಂಜಾಯ್ ಮಾಡಿ...

ನಿರ್ದೇಶಕ ಆರ್.ವಿನೋದ್ ಕುಮಾರ್ ಅವರು ಆಕ್ಷನ್-ಕಟ್ ಹೇಳಿರುವ ಈ ಸಿನಿಮಾದಲ್ಲಿ ಎಲ್ಲಾ ಹೊಸ ಪ್ರತಿಭೆಗಳೇ ಮಿಂಚಿದ್ದಾರೆ. ನಟ ಲಿಖಿತ್ ಸೂರ್ಯ, ನಟಿ ಮೇಘನಾ, ನಟಿ ಅನು ಚಿನ್ನಪ್ಪ ಮತ್ತು ನಟ ನಿರಂತ್ ಅವರು ಈ ಚಿತ್ರದ ಮುಖ್ಯ ಭೂಮಿಕೆಯಲ್ಲಿ ಕಾಣಿಸಿಕೊಂಡಿದ್ದಾರೆ.