ತೆಲುಗು ಭಾಷೆಗೆ ರಿಯಲ್ ಸ್ಟಾರ್ ಉಪೇಂದ್ರ ಹಳೆ ಚಿತ್ರ ಡಬ್!

ಸೂಪರ್ ಸ್ಟಾರ್ ಉಪೇಂದ್ರ ಅವರಿಗೆ ಆಂಧ್ರದಲ್ಲಿ ತನ್ನದೇ ಆದಂತಹ ಪ್ರೇಕ್ಷಕ ವರ್ಗವಿದೆ. ನೆರೆಯ ಆಂಧ್ರದಲ್ಲಿ ಉಪೇಂದ್ರ ಚಿತ್ರಗಳಿಗೆ ಕೊಂಚ ಮಟ್ಟಿಗೆ ಡಿಮ್ಯಾಂಡು ಇದೆ. ಇದನ್ನು ಗಮನದಲ್ಲಿಟ್ಟುಕೊಂಡು ಐದು ವರ್ಷಗಳ ಹಿಂದೆ ತೆರೆಕಂಡಿದ್ದ ನಾನು ನಾನೇ ಚಿತ್ರ ಈಗ ತೆಲುಗಿಗೆ ಡಬ್ ಆಗಿದೆ. ಹೊಸ ಅಲೆ ಎಬ್ಬಿಸಿದ 'ಸೂಪರ್' ಚಿತ್ರದ ಬಳಿಕ ಉಪೇಂದ್ರ ಚಿತ್ರಗಳಿಗೆ ಜನ ಮುಗಿ ಬೀಳುವಂತಾಗಿದೆ.

ಅಂದಹಾಗೆ ನಾನು ನಾನೇ ಚಿತ್ರ ಏನೂ ಸ್ವಮೇಕ್ ಅಲ್ಲ. ಇದು ಹಿಂದಿಯ ಯಶಸ್ವಿ ಚಿತ್ರ 'ರಾಜಾ ಹಿಂದೂಸ್ತಾನಿ' ಚಿತ್ರದ ರೀಮೇಕ್. 1996ರಲ್ಲಿ ತೆರೆಕಂಡಿದ್ದ ಪ್ರೇಮ ಕಥಾನಕದ ಈ ಚಿತ್ರದಲ್ಲಿ ಅಮೀರ್ ಖಾನ್ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿದ್ದರು. ನಾನು ನಾನೇ ಚಿತ್ರಕ್ಕೆ ಡಿ ರಾಜೇಂದ್ರ ಬಾಬು ಆಕ್ಷನ್, ಕಟ್ ಹೇಳಿದ್ದರು.

ಈಗ ಇದೇ ಚಿತ್ರಕ್ಕೆ ಮುರಳಿ ಕೃಷ್ಣ ಅವರು ತೆಲುಗಿನಲ್ಲಿ ರಾಜಾಗಾಡಿ ಪೆಳ್ಳಾಂ ಎಂದು ಹೆಸರಿಟ್ಟಿದ್ದಾರೆ. ಉಪ್ಪಿಗೆ ಜತೆಯಾಗಿ ಸಾಕ್ಷಿ ಶಿವಾನಂದ್ ಅಭಿನಯಿಸಿರುವ ಚಿತ್ರದ ತಾರಾಬಳಗದಲ್ಲಿ ಅನಂತನಾಗ್ ಹಾಗೂ ರಮ್ಯಾ ಕೃಷ್ಣ ಇದ್ದಾರೆ. ಇತ್ತೀಚೆಗೆ ರಾಜಾಗಾಡಿ ಪೆಳ್ಳಾಂ ಚಿತ್ರದ ವಿಸಿಡಿಯನ್ನು ಬಿಡುಗಡೆ ಮಾಡಲಾಯಿತು.