ಕನ್ನಡ ತಾರೆ ರಾಧಿಕಾ ನಿರ್ಮಾಣದಲ್ಲಿ ರಮ್ಯಾ ಚಿತ್ರ

ಕನ್ನಡ ಸಿನಿಮಾ ತಾರೆ ರಾಧಿಕಾ ಸದ್ದಿಲ್ಲದಂತೆ ಚಿತ್ರವೊಂದನ್ನು ಕೈಗೆತ್ತಿಕೊಂಡಿದ್ದಾರೆ. ರಾಧಿಕಾ ನಿರ್ಮಿಸುತ್ತಿರುವ ಚಿತ್ರಕ್ಕೆ ನಾಯಕಿ ಯಾರು ಗೊತ್ತೆ? ಗೋಲ್ಡನ್ ಗರ್ಲ್ ರಮ್ಯಾ. ಹೌದು ಈ ವಿಷಯವನ್ನು ಸ್ವತಃ ರಮ್ಯಾ ಅವರೇ ಸ್ಪಷ್ಟಪಡಿಸಿದ್ದಾರೆ ತಮ್ಮ ಟ್ವಿಟ್ಟರ್ ಖಾತೆಯಲ್ಲಿ.

ಈ ಚಿತ್ರಕ್ಕೆ 'ಲಕ್ಕಿ' ಎಂದೂ ಹೆಸರಿಟ್ಟಿದ್ದಾರೆ. ಚಿತ್ರದ ನಾಯಕ ನಟ ಯಶ್. ಚಿತ್ರದಲ್ಲಿ ಸಿಕ್ಕಾಪಟ್ಟೆ ಗ್ರಾಫಿಕ್ಸ್ ಇರುತ್ತದಂತೆ. ಕತೆ ಪುಸ್ತಕ ಓದಿದಂತೆ ಚಿತ್ರಕತೆ ಸಾಗುತ್ತದೆ. ಸಿಕ್ಕಾಪಟ್ಟೆ ತಮಾಷೆ ಪ್ರಸಂಗಗಳಿರುವ ಈ ಚಿತ್ರ ರಾಧಿಕಾ ನಿರ್ಮಾಣದ ಚೊಚ್ಚಲ ಚಿತ್ರ ಎಂದಿದ್ದಾರೆ ರಮ್ಯಾ.

ಆಗಸ್ಟ್‌ನಲ್ಲಿ ಲಕ್ಕಿ ಚಿತ್ರ ಸೆಟ್ಟೇರಲಿದ್ದು, ನಾಯಿ ಹಾಗೂ ಅದಕ್ಕೆ 'ಲಕ್ಕಿ' ಎಂದು ಹೆಸರಿಟ್ಟ ಹುಡುಗ ಹಾಗೂ ಅವನ ಕನಸಿನ ಕನ್ಯೆ ಸುತ್ತ ಕತೆ ಸುತ್ತುತ್ತದೆ. ಈ ಚಿತ್ರಕ್ಕೆ ಇತ್ತೀಚೆಗಷ್ಟೆ ಸಹಿ ಹಾಕಿದ್ದಾಗಿ ರಮ್ಯಾ ಹೇಳಿದ್ದಾರೆ.

ನಟಿ ರಾಧಿಕಾ ತಾಯಿಯಾದ ಬಳಿಕ ಚಿತ್ರರಂಗದಿಂದ ಕೊಂಚ ದೂರ ಸರಿದಿದ್ದರು. ಈಗ ಮತ್ತೆ ಅವರ ಆಗಮನ ಗಾಂಧಿನಗರದಲ್ಲಿ ಹೊಸ ಉತ್ಸಾಹಕ್ಕೆ ಕಾರಣವಾಗಿದೆ. (ದಟ್ಸ್‌ಕನ್ನಡ ಸಿನಿವಾರ್ತೆ)