ಬಿವಿಕೆ ಅಯ್ಯಂಗಾರ್ ರಸ್ತೆಯಲ್ಲೊಂದು ಅಣ್ಣಾವ್ರಗುಡಿ

ಅಣ್ಣಾವ್ರ ಗಂಧದಗುಡಿ ಚಿತ್ರ ನೋಡಿರುತ್ತೀರಿ. ಆದರೆ ಅಣ್ಣಾವ್ರ ಗುಡಿ ಎಂದಾದರೂ ನೋಡಿದ್ದೀರಾ? ಬೆಂಗಳೂರು ಬಿವಿಕೆ ಅಯ್ಯಂಗಾರ್ ರಸ್ತೆಗೆ ಒಮ್ಮೆ ಬಂದರೆ ಅಭಿನಯ ಚಿತ್ರಮಂದಿರದ ಎದುರುಗಡೆ ಕಣ್ಣಾಯಿಸಿ ನೋಡಿ. ಶ್ರೀ ಲಕ್ಷ್ಮಿ ವೆಂಕಟೇಶ್ವರ ಫ್ರೇಮ್ ವರ್ಕ್ಸ್ ಎಂಬ ಬೋರ್ಡ್ ಕಾಣುತ್ತದೆ. ಆದರಲ್ಲಿ ಲಕ್ಷ್ಮಿ ಮತ್ತು ವೆಂಕಟೇಶ್ವರ ಫೋಟೋಗಳು ಅಷ್ಟಾಗಿ ಕಾಣ ಸಿಗುವುದಿಲ್ಲ. ಆದರೆ ಅಣ್ಣಾವ್ರ ಅಪರೂಪದಲ್ಲಿ ಅಪರೂಪ ಎಂಬಂತಹ ಫೋಟೋಗಳು ನಿಮ್ಮ ಕಣ್ಮನ ಸೆಳೆಯುತ್ತವೆ.

ಕಳೆದ ಏಳೆಂಟು ವರ್ಷಗಳಿಂದ ನಾಡಿನಾದ್ಯಂತ ಸಂಚರಿಸಿ ಅಣ್ಣಾವ್ರ ಅಪರೂಪ ಫೋಟೋಗಳನ್ನು ಸಂಗ್ರಹಿಸುವ ಕಾರ್ಯವನ್ನು ಮಾಡುತ್ತಿರುವವರು ಸುರೇಶ್ ಬಾಬು. ಈ ಫೋಟೋಗಳ ಸಂಗ್ರಹಕ್ಕಾಗಿ ಅವರು ಪಟ್ಟ ಶ್ರಮ ಅಷ್ಟಿಷ್ಟಲ್ಲ. ಸ್ಟುಡಿಯೋಗಳಿಂದ ಹಿಡಿದು ಶಿವಾಜಿನಗರದ ಗುಜರಿ ಅಂಗಡಿಗಳ ತನಕ ಚಪ್ಪಲಿ ಸವೆಸಿದ್ದಾರೆ.

ಅಣ್ಣಾವ್ರು ಆಟೋ ಚಾಲೂ ಮಾಡುತ್ತಿರುವ ಫೋಟೋ ಬೇಕಾ? ಯೋಗಾಸನ ಫೋಟೋ, ರಜನಿಕಾಂತ್, ಎಂಜಿ ರಾಮಚಂದ್ರನ್, ಧರ್ಮೇಂದ್ರ ಜೊತೆಗಿನ ಫೋಟೋ, ಅಣ್ಣಾವ್ರ ನವರಸಭರಿತ ಫೋಟೋಗಳನ್ನು ನೋಡಬೇಕೆ? ಕಸ್ತೂರಿ ನಿವಾಸ, ಎರಡು ಕನಸು, ಲಗ್ನಪತ್ರಿಕೆ, ಪ್ರೇಮದ ಕಾಣಿಕೆ, ಪ್ರತಿಧ್ವನಿ...ಹೀಗೆ ಅವರ ಸಂಗ್ರಹದಲ್ಲಿ ರಾಶಿ ರಾಶಿ ಫೋಟೋಗಳು ಲಭ್ಯ.

ರಾಜ್ ಅವರು ಶಲ್ಯ ಹೊದ್ದಿರುವ ಫೋಟೋ, ಗಂಧದಗುಡಿ ಚಿತ್ರದ ಆನೆ ದಂತದ ಮೇಲೆ ಕೂತಿರುವ ಭಾವಚಿತ್ರ, ಕಸ್ತೂರಿ ನಿವಾಸದ ಪಾರಿವಾಳದ ಫೋಟೋ ಇದುವರೆಗೂ ಅತ್ಯಧಿಕವಾಗಿ ಮಾರಾಟವಾಗಿವೆ ಎನ್ನುತ್ತಾರೆ ಬಾಬು. ತಮ್ಮ ಬಳಿ ಇರುವ ಅಪರೂಪದ ಫೋಟೋಗಳ ಪ್ರಿಂಟ್ ತೆಗೆದು ಅದಕ್ಕೊಂದು ಕಟ್ಟುಹಾಕಿ ಕೊಡುತ್ತಾರೆ.