ನೂರು ಕೋಟಿ ವೆಚ್ಚದಲ್ಲಿ 2ಡಿ ಚಿತ್ರ ಲವಕುಶ

ಇಂಗ್ಲಿಷ್, ಹಿಂದಿ ಸೇರಿದಂತೆ ನಾಲ್ಕು ಭಾಷೆಗಳಲ್ಲಿ ಭಾರತದ ಪ್ರಥಮ ಆನಿಮೇಷನ್ ಚಿತ್ರ 'ಲವ ಕುಶ ದಿ ವಾರಿಯರ್ ಟ್ವಿನ್ಸ್' ಬಿಡುಗಡೆಗೆ ಸಿದ್ಧವಾಗಿದೆ. ಈ 2ಡಿ ಆನಿಮೇಷನ್ ಚಿತ್ರವನ್ನು ಹೈದರಾಬಾದಿನ ರಾಯುಡು ವಿಷನ್ ಮೀಡಿಯಾ ಲಿಮಿಟೆಡ್ (ಆರ್ ವಿಎಂಎಲ್) ನಿರ್ಮಿಸಿದೆ.

ಮೇ ತಿಂಗಳಲ್ಲಿ ತೆರೆಕಾಣಲಿರುವ ಈ ಚಿತ್ರವನ್ನು ಧವಳ ಸತ್ಯಂ ಎಂಬುವವರು ನಿರ್ದೇಶಿಸಿದ್ದಾರೆ. ಆನಿಮೇಷನ್ ನಲ್ಲಿ ಮೂಡಿಬಂದಿರುವ ಈ ಅದ್ಭುತ ದೃಶ್ಯಕಾವ್ಯವನ್ನು ಸಂಪೂರ್ಣವಾಗಿ ಆರ್ ವಿ ಎಂಎಲ್ ಲ್ಯಾಬ್ ನಲ್ಲಿ ಸಿದ್ಧಪಡಿಸಿರುವುದು ವಿಶೇಷ. ಒಟ್ಟು 400 ಮಂದಿ ನುರಿತ ಆನಿಮೇಷನ್ ತಜ್ಞರು 'ಲವ ಕುಶ' ಚಿತ್ರಕ್ಕಾಗಿ ಕೆಲಸ ಮಾಡಿದ್ದಾರೆ.

ಸುಮಾರು ರು.100 ಕೋಟಿ ವೆಚ್ಚದಲ್ಲಿ ಈ ಚಿತ್ರವನ್ನುನಿರ್ಮಿಸಿರುವುದು ಮತ್ತೊಂದು ವಿಶೇಷ. ಎಸ್ ಎಲ್ ವೈದ್ಯನಾಥನ್ ಅವರ ಸಂಗೀತ ಸಂಯೋಜನೆ ಚಿತ್ರಕ್ಕಿದ್ದು ಭಾರತದ ಸಾಂಪ್ರದಾಯಿಕ ಹಾಗೂ ಪಾಶ್ಚಿಮಾತ್ಯ ವಾದ್ಯಗಳನ್ನು ಬಳಸಿಕೊಳ್ಳಲಾಗಿದೆ. ಚಿತ್ರದಲ್ಲಿ ಒಟ್ಟು ಐದು ಹಾಡುಗಳಿದ್ದು ಕೆ ಜೆ ಯೇಸುದಾಸ್, ಶಂಕರ್ ಮಹದೇವನ್, ಚಿತ್ರಾ ಮತ್ತು ಸಾಧನಾ ಸರಗಂ ಹಾಡಿದ್ದಾರೆ.