ಹೊಸ ವರ್ಷದ ಮೊದಲ ಶುಕ್ರವಾರ ಬಿಡುಗಡೆ ಆಗುತ್ತಿರುವ ಕನ್ನಡ ಸಿನಿಮಾಗಳ ಪಟ್ಟಿ

'ಮಿ. ಬ್ಯಾಚುಲರ್' ಆಗಿ ಕೃಷ್ಣ ಎಂಟ್ರಿ

ನಾಯ್ಡು ಭಂಡಾರ್ ನಿರ್ದೇಶನದ 'ಮಿ. ಬ್ಯಾಚುಲರ್' ಸಿನಿಮಾ ಈ ವಾರ ಪ್ರೇಕ್ಷಕರ ಮುಂದೆ ಬರ್ತಿದೆ. ಚಿತ್ರದಲ್ಲಿ ಡಾರ್ಲಿಂಗ್ ಕೃಷ್ಣ ಹೀರೊ ಆಗಿ ನಟಿಸ್ತಿದ್ದು ನಿಮಿಕಾ ರತ್ನಾಕರ್ ಹಾಗೂ ಮಿಲನಾ ನಾಗರಾಜ್ ನಾಯಕಿಯರಾಗಿ ಸಾಥ್ ಕೊಟ್ಟಿದ್ದಾರೆ. ಆಕ್ಷನ್, ರೊಮ್ಯಾನ್ಸ್ , ಕಾಮಿಡಿ ಎಲ್ಲಾ ಸೇರಿಸಿ ಪಕ್ಕಾ ಎಂಟರ್‌ಟೈನರ್ ಸಿನಿಮಾ ಆಗಿ 'ಮಿ. ಬ್ಯಾಚುಲರ್' ಬರ್ತಿದೆ, ಮಣಿಕಾಂತ್ ಕದ್ರಿ ಸಂಗೀತ ಚಿತ್ರಕ್ಕಿದೆ.

'ಮಿಸ್ ನಂದಿನಿ' ಆಗಿ ಪ್ರಿಯಾಂಕಾ

ನಟಿ ಪ್ರಿಯಾಂಕ ಉಪೇಂದ್ರ ಶಾಲಾ ಶಿಕ್ಷಕಿ ಆಗಿ ನಟಿಸುತ್ತಿರುವ ಸಿನಿಮಾ 'ಮಿಸ್ ನಂದಿನಿ'. ಕಾನ್ವೆಂಟ್ ಶಾಲೆಗಳ ರೀತಿಯಲ್ಲೇ ಸರ್ಕಾರಿ ಶಾಲೆಗಳು ಬೆಳೆಯಬೇಕು ಎನ್ನುಗ ಆಶಯದೊಂದಿಗೆ ಈ ಸಿನಿಮಾ ನಿರ್ಮಾಣ ಆಗಿದೆ. ಎಸ್. ಆರ್ ಗುರುದತ್ತ ಚಿತ್ರಕ್ಕೆ ಆಕ್ಷನ್ ಕಟ್ ಹೇಳಿದ್ದಾರೆ. ಆರ್‌. ಕೆ ಬ್ಯಾನರ್‌ನಲ್ಲಿ ಸಿನಿಮಾ ನಿರ್ಮಾಣ ಆಗಿದ್ದು ಸಾಯಿ ಸರ್ವೇಶ್ ಸಂಗೀತ ಚಿತ್ರಕ್ಕಿದೆ. ವೀರೇಶ್ ಛಾಯಾಗ್ರಹಣದ ಜವಾಬ್ದಾರಿ ವಹಿಸಿಕೊಂಡಿದ್ದಾರೆ.

'ಸ್ಪೂಕಿ ಕಾಲೇಜ್' ರಿಲೀಸ್

ಭರತ್. ಜೆ ನಿರ್ದೇಶನದ 'ಸ್ಪೂಕಿ ಕಾಲೇಜ್' ಸಿನಿಮಾ ಕೂಡ ಈ ವಾರ ತೆರೆಗೆ ಬರ್ತಿದೆ. ವಿವೇಕ್ ಸಿಂಹ ಹಾಗೂ ದಿಯಾ ಖುಷಿ ಚಿತ್ರದ ಲೀಡ್ ರೋಲ್‌ಗಳಲ್ಲಿ ನಟಿಸಿದ್ದಾರೆ. ಅಜಯ್ ಪೃಥ್ವಿ, ಹನುಮಂತೇ ಗೌಡ, ಕೆ.ಪಿ.ಶ್ರೀಧರ್, ವಿಜಯ್ ಚೆಂಡೂರ್, ಶರಣ್ಯ ಶೆಟ್ಟಿ, ರಘು ರಮಣಕೊಪ್ಪ ಚಿತ್ರದ ತಾರಾಗಣದಲ್ಲಿದ್ದಾರೆ. ಧಾರಾವಾಡದ 100 ವರ್ಷಗಳ ಹಳೆಯ ಕಾಲೇಜಿನಲ್ಲಿ ಬಹುತೇಕ ಚಿತ್ರೀಕರಣ ನಡೆದಿದೆ. ಈ ಕಾಲೇಜು ಇಡೀ ಕಥೆಯ ಕೇಂದ್ರ ಬಿಂದು ಆಗಿದೆ.

ಹೊಸಬರ ಹೊಸ ಪ್ರಯತ್ನ

'ಮರೆಯದೆ ಕ್ಷಮಿಸು', 'ಥಗ್ಸ್ ಆಫ್ ರಾಮಘಡ', 'ಸದ್ಗುರು', 'ಕಾಕ್‌ಟೇಲ್', 'ಶ್ರೀ ಬಾಲಾಜಿ ಫೋಟೊ ಸ್ಟುಡಿಯೋ' ಸೇರಿ ಹೊಸಬರ ಸಿನಿಮಾಗಳು ಈ ವಾರ ರಿಲೀಸ್ ಆಗ್ತಿದೆ. 8 ಸಿನಿಮಾಗಳಲ್ಲಿ ಪ್ರೇಕ್ಷಕರು ಯಾವ ಚಿತ್ರಕ್ಕೆ ಎಷ್ಟು ಅಂಕ ಕೊಡುತ್ತಾರೆ ಎನ್ನುವುದನ್ನು ಕಾದು ನೋಡಬೇಕು.