ಡ್ರಗ್ಸ್ ಬಗ್ಗೆ ಕೇಳುತ್ತಿದ್ದಂತೆ ಉರಿದುಬಿದ್ದ ನಟಿ ರಚಿತಾ ರಾಮ್

ರಚಿತಾ ರಾಮ್ ಪ್ರತಿಕ್ರಿಯೆ

ಸ್ಯಾಂಡಲ್ ವುಡ್ ಡ್ರಗ್ ನಂಟಿನ ಬಗ್ಗೆ ರಚಿತಾ, "ಯಾರೋ ಮಾಡ್ತಾರೆ ಅಂತ ನಾನು ಯಾಕೆ ಆ ಬಗ್ಗೆ ಕಾಮೆಂಟ್ ಮಾಡಬೇಕು, ನನಗೆ ಅದು ಗೊತ್ತಿಲ್ಲದೆ ಇರುವ ವಿಷಯ, ನನಗೆ ಅದು ಬೇಡದೇ ಇರುವ ವಿಷಯ, ಬೇಡದೆ ಇರುವ ವಿಷಯದ ಬಗ್ಗೆ ನಾನು ಮಾತನಾಡುವುದಿಲ್ಲ" ಎಂದಿದ್ದಾರೆ.

'ನಾನು ಭಾಗಿಯಾಗಿದ್ದರೆ ಮಾತನಾಡುತ್ತಿದ್ದೆ...'

ಹಾಗಾದರೆ ಸ್ಯಾಂಡಲ್ ವುಡ್ ನಲ್ಲಿ ಆಗುತ್ತಿರುವ ಬೆಳವಣಿಗೆ ಬಗ್ಗೆ ಮಾಹಿತಿ ಇಲ್ಲವಾ? ಎಂದು ಪತ್ರಕರ್ತರು ಕೇಳಿದ್ದಕ್ಕೆ, "ನಾನು ಇದರಲ್ಲಿ ಭಾಗಿಯಾಗಿದ್ದರೆ ಮಾತನಾಡುತ್ತಿದ್ದೆ, ನನಗೆ ಬೇಡದೆ ಇರುವ ವಿಷಯದ ಬಗ್ಗೆ ನಾನು ಮಾತನಾಡಲ್ಲ, ಬೇಡದೆ ಇರುವ ಪ್ರಶ್ನೆ ಕೇಳಿದರೆ ಯಾರು ಕೂಡ ಉತ್ತರಿಸಲ್ಲ" ಎಂದು ಮಾಧ್ಯಮದವರ ಮೇಲೆ ಸಿಟ್ಟಾಗಿದ್ದಾರೆ.

ನನಗೆ ಗೊತ್ತಿದ್ದರೂ ಅದು ನನಗೆ ಬೇಡವಾದ ವಿಷಯ

"ನನ್ನ ಸಂಬಂಧವಾಗಿ ಏನಾದರೂ ಇದ್ದರೆ ಮಾತ್ರ ನಾನು ಮಾತನಾಡುತ್ತೇನೆ. ಬೇಡದೆ ಇರುವ ವಿಚಾರ ಏನೇ ಇದ್ದರು ನಾನು ಕಾಮೆಂಟ್ ಮಾಡಲ್ಲ. ನನಗೆ ಗೊತ್ತಿದ್ದರೂ, ನೋಡಿದ್ದರೂ ಅದು ನನಗೆ ಬೇಡವಾದ ವಿಷಯ. ನೆಗೆಟಿವ್ ಸುದ್ದಿಗಳ ಬಗ್ಗೆ ತಲೆ ಕೂಡ ಹಾಕಲ್ಲ, ಅದು ನನಗೆ ಸಂಬಂಧಿಸಿದ ಸುದ್ದಿ ಆದರೂ ನಾನು ನೋಡಲ್ಲ. ನನಗೆ ತುಂಬಾ ಕೆಲಸವಿದೆ. ಬೇರೆಯವರು ಯಾರೋ ಏನೋ ಮಾಡ್ತಿದ್ದಾರೆ ಅಂದರೆ ನಾನು ಯಾಕೆ ಭಾಗಿಯಾಗಬೇಕು. ಅವರ ಹಣೆಬರಹ ಅವರು ನೋಡಿಕೊಳ್ಳುತ್ತಾರೆ." ಎಂದಿದ್ದಾರೆ.

'ಕಸ್ತೂರಿ ನಿವಾಸ' ಸಿನಿಮಾದಲ್ಲಿ ರಚಿತಾ

ರಚಿತಾ ರಾಮ್ ಅಭಿನಯದ ಹೊಸ ಸಿನಿಮಾಗೆ ಕಸ್ತೂರಿ ನಿವಾಸ ಎಂದು ಟೈಟಲ್ ಇಡಲಾಗಿದೆ. ಈ ಸಿನಿಮಾದ ಟೈಟಲ್ ಲಾಂಚ್ ಕಾರ್ಯಕ್ರಮದಲ್ಲಿ ರಚಿತಾ ಭಾಗಿಯಾಗಿದ್ದರು. ಅಣ್ಣಾವ್ರ ಸಿನಿಮಾ ಹೆಸರನ್ನೇ ರಚಿತಾ ರಾಮ್ ಸಿನಿಮಾಗೂ ಇಟ್ಟಿರುವುದು ಅಚ್ಚರಿ ಮೂಡಿಸಿತ್ತು. ಆದರೆ ಅಣ್ಣಾವ್ರ ಅಭಿಮಾನಿಗಳ ಮನವಿಯ ಮೇರೆಗೆ 'ಕಸ್ತೂರಿ ನಿವಾಸ' ಹೆಸರನ್ನು ಬದಲಾಯಿಸಲಾಗಿದೆಯಂತೆ. ಚಿತ್ರಕ್ಕೆ ಸದ್ಯ 'ಕಸ್ತೂರಿ' ಎಂದು ಟೈಟಲ್ ಇಡಲಾಗಿದೆ ಎನ್ನುವ ಮಾತು ಕೇಳಿಬರುತ್ತಿದೆ.