ಬೇರೆ ಭಾಷೆಗಳಲ್ಲಿ 'ಕುರುಕ್ಷೇತ್ರ' ಬರೋದು ಅನುಮಾನ?

ಪರಭಾಷೆಯಲ್ಲಿ ಕುರುಕ್ಷೇತ್ರ ಅನುಮಾನ

ಕುರುಕ್ಷೇತ್ರ ಸಿನಿಮಾ ತಂಡ ಮಾಡುತ್ತಿರುವ ಪ್ರಮೋಷನ್ ನೋಡುತ್ತಿದ್ರೆ ಬೇರೆ ಭಾಷೆಯಲ್ಲಿ ಕುರುಕ್ಷೇತ್ರ ರಿಲೀಸ್ ಆಗುವುದು ಅನುಮಾನ ಮೂಡಿಸಿದೆ. ಯಾಕಂದ್ರೆ ಚಿತ್ರ ರಿಲೀಸ್ ಡೇಟ್ ಸಮೀಪಿಸುತ್ತಿದೆ. ಅಲ್ಲದೆ ಪ್ರಮೋಷನ್ ಚಟುವಟಿಕೆಗಳು ಈಗಾಗಲೆ ಭರ್ಜರಿಯಾಗಿ ಶುರುವಾಗಬೇಕಿತ್ತು. ಕನ್ನಡದಲ್ಲೆ ಸರಿಯಾಗಿ ಪ್ರಮೋಷನ್ ಮಾಡದ ಚಿತ್ರತಂಡ ಇನ್ನು ಬೇರೆ ಭಾಷೆಯ ಕಡೆ ಎಲ್ಲಿ ಮುಖ ಮಾಡಿದೆ. ಕುರುಕ್ಷೇತ್ರ ರಿಲೀಸ್ ಆಗುತ್ತಿದೆ ಎನ್ನುವುದು ಬೇರೆ ಭಾಷೆಯ ಚಿತ್ರಾಭಿಮಾನಿಗಳಿಗೆ ಗೊತ್ತಾಗುವುದಾದರು ಹೇಗೆ. ಹಾಗಾಗಿ ಆಗಸ್ಟ್ 2ಕ್ಕೆ ಕುರುಕ್ಷೇತ್ರ ಬೇರೆ ಬೇರೆ ಭಾಷೆಯಲ್ಲಿ ರಿಲೀಸ್ ಆಗುತ್ತಾ ಎನ್ನುವುದೆ ಅನುಮಾನ.

ಬೇರೆ ಭಾಷೆಯ ಟ್ರೈಲರ್ ಯಾಕೆ ರಿಲೀಸ್ ಆಗಿಲ್ಲ

ಸದ್ಯ ಕುರುಕ್ಷೇತ್ರ ಚಿತ್ರದಿಂದ ಎರಡು ಟೀಸರ್ ಮತ್ತು ಎರಡು ಟ್ರೈಲರ್ ರಿಲೀಸ್ ಆಗಿದೆ. ಮತ್ತು ಹಾಡುಗಳು ಸಹ ತೆರೆಗೆ ಬಂದಿವೆ. ಆದ್ರೆ ಇವೆಲ್ಲ ಕನ್ನಡ ವರ್ಶನ್ ಮಾತ್ರ ಆಗಿವೆ. ಬೇರೆ ಬೇರೆ ಭಾಷೆಯಲ್ಲಿ ಚಿತ್ರ ರಿಲೀಸ್ ಆಗಬೇಕಾದ್ರೆ ಮೊದಲು ಟೀಸರ್ ಮತ್ತು ಟ್ರೈಲರ್ ಅನ್ನು ಅದೆ ಭಾಷೆಯಲ್ಲಿ ರಿಲೀಸ್ ಮಾಡಿದ್ರೆನೆ ಅಲ್ಲಿನ ಚಿತ್ರಾಭಿಮಾನಿಗಳಿಗೂ ಚಿತ್ರದ ಬಗ್ಗೆ ಗೊತ್ತಾಗಲಿದೆ ಮತ್ತು ಕುತೂಹಲ ಕೂಡ ಹೆಚ್ಚಾಗಿರುತ್ತೆ. ಆದ್ರೆ ಬೇರೆ ಯಾವ ಭಾಷೆಯಲ್ಲೂ ಟ್ರೈಲರ್ ರಿಲೀಸ್ ಆಗದೆ ಇರುವುದು ಚಿತ್ರ ಬೇರೆ ಭಾಷೆಯಲ್ಲಿ ತೆರೆಗೆ ಬರುತ್ತಾ ಎನ್ನುವ ಅನುಮಾನ ಮೂಡಲು ಕಾರಣವಾಗಿದೆ.

ನಾಲ್ಕು ಭಾಷೆಯಲ್ಲಿ ಡಬ್ ಆಗಿದೆ

ನಿರ್ಮಾಪಕ ಮುನಿರತ್ನ ಹೇಳಿದ ಹಾಗೆ ಕುರುಕ್ಷೇತ್ರ ಬೇರೆ ಬೇರೆ ಅಂದ್ರೆ ತಮಿಳು, ತೆಲುಗು, ಮಲಯಾಳಂ ಮತ್ತು ಹಿಂದಿ ಭಾಷೆಯಲ್ಲಿ ಕುರುಕ್ಷೇತ್ರ ಡಬ್ ಆಗಿದೆ. ಬೇರೆ ಬೇರೆ ಭಾಷೆಯಲ್ಲಿ ಡಬ್ ಆಗುತ್ತಿರುವ ಕಾರಣದಿಂದನೆ ಚಿತ್ರ ರಿಲೀಸ್ ಕೂಡ ತಡವಾಗುತ್ತಿದೆ ಎಂದು ಮುನಿರತ್ನ ಹೇಳಿದ್ದರು. ಹಾಗಾಗಿ ಡಬ್ ಆದಮೇಲೆ ಬೇರೆ ಭಾಷೆಯ ಟ್ರೈಲರ್ ಯಾಕೆ ರಿಲೀಸ್ ಮಾಡುತ್ತಿಲ್ಲ ಎನ್ನುವುದು ಚಿತ್ರಾಭಿಮಾನಿಗಳ ಪ್ರಶ್ನೆ.

ಪ್ಯಾನ್ ಇಂಡಿಯಾ ರಿಲೀಸ್ ಗೆ ಪ್ಲಾನ್

ಕುರುಕ್ಷೇತ್ರ ಚಿತ್ರವನ್ನು ಪ್ಯಾನ್ ಇಂಡಿಯಾ ರಿಲೀಸ್ ಮಾಡಬೇಕೆಂದು ದೊಡ್ಡ ಮಟ್ಟದಲ್ಲಿ ಪ್ಲಾನ್ ಮಾಡಿದ್ದರು ಮುನಿರತ್ನ. ಅದ್ದೂರಿಯಾಗಿ ರಿಲೀಸ್ ಮಾಡಬೇಕೆಂದು ಯೋಜನೆಗಳನ್ನು ಹಾಕಿಕೊಂಡಿದ್ದ ಚಿತ್ರತಂಡ ಈಗ ಸೈಲೆಂಟ್ ಆಗಿರುವುದು ಚಿತ್ರಾಭಿಮಾನಿಗಳಲ್ಲಿ ಗೊಂದಲ ಮೂಡಿಸಿದೆ. ಮೊದಲು ಕನ್ನಡದಲ್ಲಿ ಮಾತ್ರ ರಿಲೀಸ್ ಮಾಡಲು ಪ್ಲಾನ್ ಮಾಡಿದ್ದ ಚಿತ್ರತಂಡ, ಯಾವಾಗ ಕೆಜಿಎಫ್ ಚಿತ್ರ ದೇಶ ವಿದೇಶದಲ್ಲಿ ದೊಡ್ಡ ಮಟ್ಟಿಗೆ ಸದ್ದು ಮಾಡಿತೊ, ಆಗ ಮುನಿರತ್ನ ಕುರುಕ್ಷೇತ್ರವನ್ನು ಸಹ ಬೇರೆ ಬೇರೆ ಭಾಷೆಯಲ್ಲಿ ರಿಲೀಸ್ ಮಾಡಬೇಕೆಂದು ಪ್ಲಾನ್ ಮಾಡಿ, ಐದು ಭಾಷೆಯಲ್ಲಿ ಡಬ್ ಮಾಡಿಸಿದ್ದಾರೆ.