ಕಾನ್ಸ್ ಟೇಬಲ್ ಸರೋಜಗೆ ಪೈಪೋಟಿ ನೀಡಲು ಬಂದ 'ಜಾಗ್ವಾರ್' ಜಾಣೆ

'ರಾಜಮಾರ್ತಾಂಡ' ಚಿತ್ರದಲ್ಲಿ ಮೂವರು ನಾಯಕಿಯರು.!

ನೀವೆಲ್ಲ ಭಾವಿಸಿರುವ ಹಾಗೆ, 'ರಾಜಮಾರ್ತಾಂಡ' ಚಿತ್ರದಲ್ಲಿ ಕಾನ್ಸ್ ಟೇಬಲ್ ಸರೋಜ ಅಲಿಯಾಸ್ ತ್ರಿವೇಣಿ ಏಕೈಕ ನಾಯಕಿ ಅಲ್ಲ. ಅಷ್ಟಕ್ಕೂ, ಸಿನಿಮಾದಲ್ಲಿ ತ್ರಿವೇಣಿಗೆ ಲಭಿಸಿರುವುದು ಎರಡನೇ ನಾಯಕಿಯ ಪಾತ್ರ.

ಮೊದಲನೇ ನಾಯಕಿ ಯಾರು ಗೊತ್ತಾ.?

'ರಾಜಮಾರ್ತಾಂಡ' ಚಿತ್ರದಲ್ಲಿ ನಟನೆಯ ವಿಚಾರದಲ್ಲಿ ತ್ರಿವೇಣಿಗೆ ಪೈಪೋಟಿ ನೀಡಲು ಮೊದಲನೇ ನಾಯಕಿ ಆಗಿ ಆಯ್ಕೆ ಆಗಿರುವುದು ದೀಪ್ತಿ ಸತಿ. ಯಾರಪ್ಪಾ ಈ ದೀಪ್ತಿ ಸತಿ ಅಂತ ತಲೆಗೆ ಹುಳ ಬಿಟ್ಟುಕೊಳ್ತಿದ್ರೆ, ಮೊದಲು 'ಜಾಗ್ವಾರ್' ಸಿನಿಮಾ ನೆನಪಿಸಿಕೊಳ್ಳಿ....

ಮತ್ತೆ ಕನ್ನಡಕ್ಕೆ ಬಂದ 'ಜಾಗ್ವಾರ್' ನಾಯಕಿ

ಮಾಜಿ ಮುಖ್ಯಮಂತ್ರಿ ಎಚ್.ಡಿ.ಕುಮಾರಸ್ವಾಮಿ ಪುತ್ರ ನಿಖಿಲ್ ಕುಮಾರ್ ಅಭಿನಯದ ಚೊಚ್ಚಲ ಚಿತ್ರ 'ಜಾಗ್ವಾರ್'ನಲ್ಲಿ ನಾಯಕಿ ಆಗಿದ್ದವರು ಇದೇ ದೀಪ್ತಿ ಸತಿ. 'ಜಾಗ್ವಾರ್' ನಂತರ ಮತ್ತೆ ಸ್ಯಾಂಡಲ್ ವುಡ್ ಕಡೆಗೆ ಮುಖ ಮಾಡಲು ಮನಸ್ಸು ಮಾಡಿರುವ ದೀಪ್ತಿ 'ರಾಜಮಾರ್ತಾಂಡ' ಚಿತ್ರಕ್ಕೆ ಗ್ರೀನ್ ಸಿಗ್ನಲ್ ಕೊಟ್ಟಿದ್ದಾರೆ.

ಮೂರನೇ ಹೀರೋಯಿನ್ ಕೂಡ ಇರ್ತಾರೆ.!

'ರಾಜಮಾರ್ತಾಂಡ' ಸಿನಿಮಾದಲ್ಲಿ ಮೂವರು ಹೀರೋಯಿನ್ ಗಳು ಇರ್ತಾರಂತೆ. ಈಗಾಗಲೇ ಮೊದಲನೇ ನಾಯಕಿಯಾಗಿ ದೀಪ್ತಿ ಸತಿ ಹಾಗೂ ಎರಡನೇ ನಾಯಕಿ ಆಗಿ ತ್ರಿವೇಣಿ ಫೈನಲ್ ಆಗಿದ್ದಾರೆ. ಮೂರನೇ ಹೀರೋಯಿನ್ ಗಾಗಿ ನಿರ್ದೇಶಕ ರಾಮ್ ನಾರಾಯಣ್ ಹುಡುಕಾಟ ಮುಂದುವರೆಸಿದ್ದಾರೆ.

ಚಿರಂಜೀವಿ ಸರ್ಜಾ ಹೀರೋ

ಈಗಾಗಲೇ 'ಟೈಸನ್', 'ಕ್ರ್ಯಾಕ್' ಅಂತಹ ಸಿನಿಮಾಗಳನ್ನು ನಿರ್ದೇಶಿಸಿರುವ ರಾಮ್ ನಾರಾಯಣ್ ಆಕ್ಷನ್ ಕಟ್ ಹೇಳುತ್ತಿರುವ ಹೊಸ ಸಿನಿಮಾ 'ರಾಜಮಾರ್ತಾಂಡ'ಗೆ ಚಿರಂಜೀವಿ ಸರ್ಜಾ ಹೀರೋ. ಸಿನಿಮಾದಲ್ಲಿ ದೇವರಾಜ್ ಕೂಡ ಪ್ರಮುಖ ಪಾತ್ರದಲ್ಲಿ ಮಿಂಚಲಿದ್ದಾರೆ. ಅರ್ಜುನ್ ಜನ್ಯ ಸಂಗೀತ ಸಂಯೋಜಿಸುವ ಈ ಚಿತ್ರ ಸದ್ಯದಲ್ಲೇ ಸೆಟ್ಟೇರಲಿದೆ.