ಮುಖಪುಟ

ಸಿನಿ ಸಮಾಚಾರ

ಪತ್ತೆದಾರಿ ಕಥೆಗಳೆಂದರೆ ಯಾರಿಗೆ ತಾನೆ ಇಷ್ಟವಿಲ್ಲ ಹೇಳಿ? ಚಿಕ್ಕಮಕ್ಕಳಿಂದ ಹಿಡಿದು ದೊಡ್ಡವರ ತನಕ ಎಲ್ಲರನ್ನೂ ಆದಿಯಿಂದ ಅಂತ್ಯದವರೆಗೂ ಓದಿಸಿಕೊಂಡು ಹೋಗುವ ಶಕ್ತಿ ಆ ಪುಸ್ತಕಗಳಿಗಿದೆ. ಅದರಲ್ಲೂ ನಮ್ಮ ನೆಚ್ಚಿನ ನಾಯಕನಟರ ಪತ್ತೆದಾರಿ ಕಥೆಗಳು ಕಾಮಿಕ್ ರೂಪದಲ್ಲಿ ಬಂದರೆ ಹೇಗೆ? ಅಭಿಮಾನಿಗಳಿಗೆ ಇದಕ್ಕಿಂತ ಖುಷಿ ಸಂಗತಿ ಇನ್ನೇನು ಇರಲಿಕ್ಕೆ ಸಾಧ್ಯ.

ಸಾಹಸಸಿಂಹ ಡಾ ವಿಷ್ಣುವರ್ಧನ್ ಅವರ ಕಾಮಿಕ್ ಸರಣಿಯ ಎರಡನೇ ಪುಸ್ತಕ ಇದೀಗ ಮಾರುಕಟ್ಟೆಯಲ್ಲಿ ಲಭ್ಯ. ಡಾ.ವಿಷ್ಣುವರ್ಧನ್ ಅವರ ಈ ಬಾರಿಯ ವಾರ್ಷಿಕ ಪುಣ್ಯ ಸ್ಮರಣೆಯಲ್ಲಿ (ಡಿಸೆಂಬರ್ 30) 'ಪತ್ತೇದಾರ ಸಾಹಸಸಿಂಹ - ಅರಣ್ಯದಲ್ಲಿ ಸಾಹಸ' ಕಾಮಿಕ್ ಸರಣಿಯನ್ನು ಮುಖ್ಯಮಂತ್ರಿ ಸಿದ್ದರಾಮಯ್ಯ ಬಿಡುಗಡೆ ಮಾಡಿದ್ದಾರೆ. [ಕಾಮಿಕ್ ಸ್ಟ್ರಿಪ್ ನಲ್ಲಿ ಮತ್ತೆ ಹುಟ್ಟಿಬಂದ ವಿಷ್ಣುವರ್ಧನ್]

ಎಸಿಕೆ ಮೀಡಿಯಾದವರು (ಅಮರ ಚಿತ್ರ ಕಥಾ) ಕಥೆ ಮತ್ತು ವಿನ್ಯಾಸಪಡಿಸಿರುವ ಕಾಮಿಕ್ ಸರಣಿಯಲ್ಲಿ ಡಾ.ವಿಷ್ಣುವರ್ಧನ್, ಡಾ.ಭಾರತಿ ವಿಷ್ಣುವರ್ಧನ್ ತಮ್ಮ ಮೊಮ್ಮಕ್ಕಳಾದ ಜ್ಯೇಷ್ಠಾ ಮತ್ತು ಶ್ಲೋಕಾ ಜೊತೆ ಸೇರಿಕೊಂಡು ಹಲವಾರು ರಹಸ್ಯಗಳನ್ನು ಭೇದಿಸುವುದೇ ಈ ವಿನೋದ ಚಿತ್ರಾವಳಿಯ ವಿಶೇಷ. ಇದಕ್ಕೆ ಅನಿರುದ್ಧ್ ಅವರ ಪರಿಕಲ್ಪನೆ ಇದ್ದು ಅವರ ಸಹಧರ್ಮಿಣಿ ಕೀರ್ತಿ ಅವರು ಪುಸ್ತಕವನ್ನು ಹೊರತಂದಿದ್ದಾರೆ.

ಕನ್ನಡ ಮತ್ತು ಇಂಗ್ಲಿಷ್ ಭಾಷೆಗಳಲ್ಲಿ ಹೊರತಂದಿರುವ 'ಪತ್ತೆದಾರ ಸಾಹಸಸಿಂಹ - ಅರಣ್ಯದಲ್ಲಿ ಸಾಹಸ' (Detective Sahasasimha - The Jungle Adventure) ಕಾಮಿಕ್ ಸರಣಿಯ ಎರಡನೇ ಭಾಗಕ್ಕೂ ನಾಡಿನಾದ್ಯಂತ ಅದ್ಭುತ ಪ್ರತಿಕ್ರಿಯೆ ವ್ಯಕ್ತವಾಗುತ್ತಿದೆ ಎನ್ನುತ್ತಾರೆ ನಟ ಅನಿರುದ್ಧ್.

ಬೆಂಗಳೂರಿನ ಸಪ್ನ ಪುಸ್ತಕ ಮಳಿಗೆ ಸೇರಿದಂತೆ ರಾಜ್ಯ ಪ್ರಮುಖ ಪುಸ್ತಕ ಮಳಿಗೆಗಳಲ್ಲಿ ಪ್ರತಿಗಳು ಲಭ್ಯ. ಕನ್ನಡ ಆವೃತ್ತಿ ಬೆಲೆ ರು.40 ಹಾಗೂ ಇಂಗ್ಲಿಷ್ ಆವೃತ್ತಿ ಬೆಲೆ ರು.50. ಇಂಗ್ಲಿಷ್ ಆವೃತ್ತಿ ಭಾರತದಾದ್ಯಂತ ಲಭ್ಯ ಎಂದು ಅನಿರುದ್ಧ್ ಅವರು ಫಿಲ್ಮಿಬೀಟ್ ಕನ್ನಡಕ್ಕೆ ತಿಳಿಸಿದರು.

ಈ ಕಾಮಿಕ್ ಸರಣಿಯ ಬಹುತೇಕ ಕಂತುಗಳು ಸಾಮಾಜಿಕ ಸಮಸ್ಯೆಗಳಿಗೆ ಪರಿಹಾರ ಹುಡುಕುವುದೇ ಆಗಿದೆ. ಈ ಮೂಲಕ ಮಕ್ಕಳಿಗೆ ಮನರಂಜನೆ ಜೊತೆಗೆ ಶಿಕ್ಷಣ ನೀಡುವುದೇ ಆಗಿದೆ ಎನ್ನುತ್ತಾರೆ ಅನಿರುದ್ಧ್. ಇನ್ನೇಕೆ ತಡ ನಡುರಾತ್ರಿಯ ದರೋಡೆಗಳು ಮತ್ತು ಕಾಣೆಯಾದ ನಾಯಿಗಳ ನಿಗೂಢವನ್ನು ಬಯಲು ಮಾಡಲು ಸಾಹಸಸಿಂಹ ಅವರು ಅರಣ್ಯದ ಮಧ್ಯೆ ನಡೆಸುವ ಶೋಧದಲ್ಲಿ ನೀವೂ ಭಾಗಿಯಾಗಿ. (ಫಿಲ್ಮಿಬೀಟ್ ಕನ್ನಡ)