ಹೊಸ ವರ್ಷಕ್ಕೆ ಪುನೀತ್ ರಾಜ್‌ಕುಮಾರ್ ಶುಭಾಶಯ: ಅಪ್ಪು ಆಡಿಯೋ ವೈರಲ್!

ನ್ಯೂ ಇಯರ್‌ಗೆ ಅಪ್ಪು ಶುಭಾಶಯ

ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ಇಂದು ಇದ್ದಿದ್ದರೆ ಹೊಸ ವರ್ಷವನ್ನು ಅಭಿಮಾನಿಗಳ ಜೊತೆ, ಕುಟುಂಬದ ಜೊತೆ ಆಚರಿಸುತ್ತಿದ್ದರು. ಜೀವನದಲ್ಲಿ ಯಾವಾಗಲೂ ನಗುತ್ತಲೇ ಇರಬೇಕು ಅಂತ ಹೇಳುತ್ತಿದ್ದರು. ಅದರಂತೆ ನಗುನಗುತ್ತಲೇ ಬದುಕಿದರು. ನಗುಮುಖದ ಈ ರಾಜಕುಮಾರ ಅಪಾರ ಅಭಿಮಾನಿಗಳನ್ನು ಅಗಲಿದರೂ, ಅವರ ಧ್ವನಿ ಮಾತ್ರ ಕೇಳಿಸದೆ ಇರಲು ಸಾಧ್ಯವೇ ಇಲ್ಲ. ಈಗ 2023 ಹೊಸ್ತಿಲ್ಲಿ ಅಪ್ಪು ಕನ್ನಡಿಗರಿಗೆ ಅಭಿಮಾನಿಗಳಿಗೆ ಶುಭ ಕೋರಿದ ಆಡಿಯೋ ಒಂದು ಎಲ್ಲೆಡೆ ಸದ್ದು ಮಾಡುತ್ತಿದೆ.

ಮಕ್ಕಳಿಂದ ಹಿಡಿದು ದೊಡ್ಡವರವರೆಗೂ ಸಂಭ್ರಮ

ವೈರಲ್ ಆಗುತ್ತಿರುವ ಅಪ್ಪು ಆಡಿಯೋದಲ್ಲಿ ಹೊಸ ವರ್ಷದ ಬಗ್ಗೆ ಅರ್ಥಪೂರ್ಣವಾದ ಮಾತುಗಳನ್ನು ಆಡಿದ್ದಾರೆ. "ಹೊಸತು ಅಂದ್ರೇನೆ ಹಾಗೆ. ಮಕ್ಳಿಂದ ಹಿಡಿದು ದೊಡ್ಡವರ ತನಕ ಏನೋ ಸಂಭ್ರಮ. ಹಳೆ ವರ್ಷದ ಕೊನೆಯ ದಿನ ಇವತ್ತು. ನಾಳೆಯಿಂದ ಹೊಸ ವರ್ಷ. ಹೊಸ ವರ್ಷ ಅಂದ್ಮೇಲೆ ಹೊಸ ಹೊಸ ರೆಸಲ್ಯೂಷನ್. ಹೊಸ ವರ್ಷ ಬಂದ್ರೆ ಫ್ಯಾಮಿಲಿ ಒಳಗೆ ಸಂಭ್ರಮ ಜಾಸ್ತಿ." ಎಂದು ಪುನೀತ್ ರಾಜ್‌ಕುಮಾರ್ ಆಡಿಯೋದಲ್ಲಿ ಹೇಳಿದ್ದಾರೆ.

'ಪ್ರಕೃತಿ ಮೇಲೆ ಗಮನವಿಡಿ ಎಂದಿರೋ ಅಪ್ಪು'

ಈ ಆಡಿಯೋದಲ್ಲಿ ಪವರ್‌ಸ್ಟಾರ್ ಪುನೀತ್ ರಾಜ್‌ಕುಮಾರ್ ತಮ್ಮ ಕೆಲಸದ ಬಗ್ಗೆ, ಪ್ರಕೃತಿ ಬಗ್ಗೆ ಗಮನ ಇಟ್ಟುಕೊಳ್ಳುವಂತೆ ಹೇಳಿದ್ದಾರೆ. "ನಾವು ನಮ್ಮ ಕುಟುಂಬದ ಮೇಲೆ ನಮ್ಮಗಳ ಮೇಲೆ ನಾವು ಮಾಡುವ ಕೆಲಸದ ಮೇಲೆ ಹಾಗೂ ಪ್ರಕೃತಿ ಮೇಲೆ ಗಮನ ಇಟ್ಕೊಂಡು ನಮ್ಮ ಕೆಲಸವನ್ನು ನಾವು ಶ್ರದ್ಧೆಯಿಂದ ಮಾಡೋಣ. ಈ ವರ್ಷ ಎಲ್ಲರಿಗೂ ಒಳ್ಳೆಯದು ಮಾಡಲಿ ಅಂತ ಆ ಭಗವಂತನಲ್ಲಿ ಕೇಳಿಕೊಳ್ಳುತ್ತೇನೆ. ವಿಶ್ ಯು ಆಲ್ ಎ ವೆರಿ ಹ್ಯಾಪಿ ನ್ಯೂ ಇಯರ್." ಎಂದು ಅಪ್ಪು ಹೇಳಿದ್ದಾರೆ.

ಪುನೀತ್ ರಾಜ್‌ಕುಮಾರ್ 3 ಸಿನಿಮಾ ಬಿಡುಗಡೆ

ಪುನೀತ್ ರಾಜ್‌ಕುಮಾರ್ ಅಭಿನಯದ ಕೊನೆಯ ಮೂರು ಸಿನಿಮಾಗಳು ಈ ವರ್ಷ ಬಿಡುಗಡೆಯಾಗಿದೆ. ಚೇತನ್ ಕುಮಾರ್ ನಿರ್ದೇಶನದ 'ಜೇಮ್ಸ್'. ಡಾರ್ಲಿಂಗ್ ಕೃಷ್ಣ ಅಭಿನಯದ 'ಲಕ್ಕಿ ಮ್ಯಾನ್' ಹಾಗೂ 'ಗಂಧದ ಗುಡಿ' ಸಿನಿಮಾಗಳು ತೆರೆಕಂಡಿದೆ. ಮೂರು ಸಿನಿಮಾಗಳಲ್ಲೂ ಪುನೀತ್ ರಾಜ್‌ಕುಮಾರ್ ಅನ್ನು ಅಭಿಮಾನಿಗಳು ಕಣ್ತುಂಬಿಕೊಂಡಿದ್ದಾರೆ. ಈಗ ವರ್ಷದ ಕೊನೆಯಲ್ಲಿ ಅಪ್ಪು ಧ್ವನಿ ವೈರಲ್ ಆಗುತ್ತಿದೆ.