ಸಿಸಿಬಿ ಕೈ ಸೇರಿತು 'ಇಂದ್ರಜಿತ್ ಫೈಲ್': 15 ತಾರೆಯರ ವಿವರ ಹಸ್ತಾಂತರ

ಹದಿನೈದು ಜನರ ಹೆಸರು-ವಿವರ ನೀಡಿದ್ದೇನೆ

''ಡ್ರಗ್ಸ್ ಜಾಲಕ್ಕೆ ಸಂಬಂಧಪಟ್ಟಂತೆ ನನ್ನ ಬಳಿ ಇದ್ದ ಎಲ್ಲ ಮಾಹಿತಿಗಳನ್ನು ಪೊಲೀಸರಿಗೆ ನೀಡಿದ್ದೇನೆ. ನಾನು ನೀಡಿರುವ ಮಾಹಿತಿ ಸಿಸಿಬಿ ಅವರಿಗೆ ಸಂಪೂರ್ಣವಾಗಿ ನೆರವಾಗಲಿದೆ. ಹತ್ತರಿಂದ ಹದಿನೈದು ಜನರ ಹೆಸರು, ಅವರ ಜೊತೆ ಸಂಬಂಧ ಹೊಂದಿದ್ದವರು, ಸ್ಥಳಗಳು, ಫೋಟೋಗಳು, ವಿಡಿಯೋ ಸಹ ನೀಡಿದ್ದೇನೆ'' ಎಂದು ಸಿಸಿಬಿ ಕಚೇರಿಯಿಂದ ಹೊರಬಂದ ಬಳಿಕ ಮಾಧ್ಯಮಗಳಿಗೆ ತಿಳಿಸಿದ್ದಾರೆ.

ಓರ್ವ ನಟಿಯ ವಿಡಿಯೋ ಇದೆ

ಓರ್ವ ನಟಿ ಪಾರ್ಟಿಯಲ್ಲಿ ನಶೆ ಏರಿಸಿಕೊಂಡು ಅಸಭ್ಯವಾಗಿ ಡ್ಯಾನ್ಸ್ ಮಾಡುತ್ತಿರುವ ವಿಡಿಯೋ ಇದೆ ಎಂದು ಹೇಳಲಾಗಿತ್ತು. ಈ ವಿಡಿಯೋವನ್ನು ಸಹ ಇಂದ್ರಜಿತ್ ಲಂಕೇಶ್ ಅವರು ಸಿಸಿಬಿ ಪೊಲೀಸರಿಗೆ ನೀಡಿದ್ದಾರೆ.

ನಿನ್ನೆ ಮೊನ್ನೆ ಬಂದವರು ರಾಯಭಾರಿಗಳಿದ್ದಂತೆ

ಕನ್ನಡ ಚಿತ್ರರಂಗಕ್ಕೆ ಹಾಗೂ ಕಿರುತೆರೆಗೆ ಕಳಂಕವಾಗಿರುವ ಈ ಡ್ರಗ್ಸ್ ಜಾಲದಲ್ಲಿ ಹೊಸ ಕಲಾವಿದರು ಹೆಚ್ಚಿದ್ದಾರೆ ಹಾಗೂ ನಿನ್ನೆ ಮೊನ್ನೆ ಬಂದವರು ರಾಯಭಾರಿಗಳಿದ್ದಂತೆ ಎಂದು ಇಂದ್ರಜಿತ್ ಲಂಕೇಶ್ ಹೇಳಿದ್ದಾರೆ. ಪೊಲೀಸರ ಮುಂದೆ ಸಹ ಅಂತವರ ಬಗ್ಗೆ ಮಾಹಿತಿ ನೀಡಿದ್ದಾರೆ.

ಹೆಸರು ಹೇಳುವುದರಿಂದ ತನಿಖೆಗೆ ಅಡ್ಡಿಯಾಗುತ್ತೆ

ಡ್ರಗ್ಸ್ ಜಾಲದಲ್ಲಿರುವ ನಟ-ನಟಿಯರ ಹೆಸರು ಬಹಿರಂಗವಾಗಿ ಹೇಳುವುದರಿಂದ ಪೊಲೀಸರ ತನಿಖೆಗೆ ಅಡ್ಡಿ ಆಗುತ್ತೆ. ಇದನ್ನು ನಾನು ಇಂಡಸ್ಟ್ರಿಯ ಒಳಿತಿಗಾಗಿ ಮತ್ತು ಮುಂದಿನ ಪೀಳಿಗೆಯ ಒಳಿತಿಗಾಗಿ ಮಾಡುತ್ತಿದ್ದೇನೆ. ಹೆಸರು ಬಹಿರಂಗಪಡಿಸಿ ವೈಯಕ್ತಿಕವಾಗಿ ಅವರಿಗೆ ನೋವು ಉಂಟು ಮಾಡುವುದು ಅಥವಾ ಇನ್ನೊಂದು ಮಾಡುವುದು ನನ್ನ ಉದ್ದೇಶವಲ್ಲ'' ಎಂದು ಇಂದ್ರಜಿತ್ ಮಾಹಿತಿ ನೀಡಿದ್ದಾರೆ.

ಪೊಲೀಸರ ಮಾಹಿತಿ ಕಲೆ ಹಾಕಿದ್ದಾರೆ

''ನಾನು ನೀಡಿದ ವಿವರಕ್ಕೂ ಮೊದಲೇ ಸಿಸಿಬಿ ಪೊಲೀಸರೇ ಹೆಚ್ಚಿನ ಮಾಹಿತಿ ಕಲೆ ಹಾಕಿದ್ದಾರೆ. ನನ್ನ ಸಾಕ್ಷ್ಯ ಮತ್ತು ವಿವರಗಳ ಸಹಕಾರದೊಂದಿಗೆ ಈ ಬಗ್ಗೆ ತನಿಖೆ ಮಾಡಲಿದ್ದಾರೆ. ಈ ವಿಚಾರದಲ್ಲಿ ಪೊಲೀಸರು ಯಶಸ್ಸು ಸಾಧಿಸುತ್ತಾರೆ ಎಂಬ ನನಗೆ ನಂಬಿಕೆ ಇದೆ' ಎಂದು ಇಂದ್ರಜಿತ್ ಆತ್ಮವಿಶ್ವಾಸ ವ್ಯಕ್ತಪಡಿಸಿದ್ದಾರೆ.