ಸಂಜನಾ ಅರೆಸ್ಟ್: ಬೆಳಗ್ಗೆಯಿಂದ ಇಲ್ಲಿವರೆಗೂ ನಡೆದ ಬೆಳವಣಿಗೆಯ ವಿವರ

6.30ಕ್ಕೆ ಸಂಜನಾ ಮನೆಗೆ ಸಿಸಿಬಿ ಪ್ರವೇಶ

ನಟಿ ಸಂಜನಾ ಅವರ ಆಪ್ತ ರಾಹುಲ್ ಬಂಧನವಾದ ದಿನದಿಂದ ಈ ಪ್ರಕರಣದಲ್ಲಿ ಸಂಜನಾ ಹೆಸರು ತಳುಕು ಹಾಕಿಕೊಂಡಿತ್ತು. ಆದರೆ, ಸಿಸಿಬಿ ಅಧಿಕಾರಿಗಳು ಸಂಜನಾಗೆ ಯಾವುದೇ ನೋಟಿಸ್ ನೀಡಿರಲಿಲ್ಲ. ಆದ್ರೆ, ಮಂಗಳವಾರ ಬೆಳಗ್ಗೆ ದಿಢೀರ್ ಅಂತ ಇಂದಿರಾ ನಗರದಲ್ಲಿರುವ ಸಂಜನಾಗೆ ಸಿಸಿಬಿ ಎಂಟ್ರಿ ಕೊಟ್ಟು ಪರಿಶೀಲನೆ ಮಾಡಿದ್ದಾರೆ.

ಸರ್ಚ್ ವಾರೆಂಟ್ ಇದ್ಯಾ?

ಬೆಳ್ಳಂಬೆಳಗ್ಗೆ ಮನೆಗೆ ಸಿಸಿಬಿ ಅಧಿಕಾರಿಗಳು ಬಂದಿರುವುದರಿಂದ ಗಾಬರಿಯಾದ ನಟಿ ಸಂಜನಾ, ಆರಂಭದಲ್ಲಿ ನೀವು ಯಾರು? ಮನೆಗೆ ಬರಬೇಡಿ, ಸರ್ಚ್ ವಾರೆಂಟ್ ಇದ್ಯಾ? ಎಂದು ಪ್ರಶ್ನಿಸಿದ್ದಾರೆ. ನಂತರ ಕೋರ್ಟ್‌ನಿಂದ ಪಡೆದುಕೊಂಡಿರುವ ವಾರೆಂಟ್ ತೋರಿಸಿದ ಬಳಿಕ ಸಂಜನಾ ಸುಮ್ಮನಾಗ್ತಾರೆ ಎಂದು ತಿಳಿದು ಬಂದಿದೆ.

ಅಧಿಕಾರಿಗಳಿಂದ ತೀವ್ರ ಶೋಧ

8 ಜನರ ಸಿಸಿಬಿ ತಂಡ ಸಂಜನಾಗೆ ಸಂಬಂಧಿಸಿದ ಮನೆಯಲ್ಲಿ ಸಂಪೂರ್ಣವಾಗಿ ಶೋಧ ನಡೆಸಿದ್ದಾರೆ. ಈ ವೇಳೆ ಕೆಲವು ವಸ್ತುಗಳನ್ನು ಸಹ ವಶಕ್ಕೆ ಪಡೆದುಕೊಳ್ಳಲಾಗಿದೆ ಎಂದು ಸಿಸಿಬಿ ಮುಖ್ಯಸ್ಥ ಸಂದೀಪ್ ಪಾಟೀಲ್ ಮಾಧ್ಯಮಗಳಿಗೆ ತಿಳಿಸಿದ್ದರು. ಸಂಜನಾ ಅವರ ಸುತ್ತಮುತ್ತ ಮನೆಯವರ ಬಳಿ ಸಹ ಮಾಹಿತಿ ಕಲೆ ಹಾಕಿದ್ದಾರೆ ಎಂದು ತಿಳಿದು ಬಂದಿದೆ.

ಸಂಜನಾ ಅರೆಸ್ಟ್!

ಸುಮಾರು 10 ಗಂಟೆ ಅಥವಾ 10.30 ರ ಸಮಯಕ್ಕೆ ನಟಿ ಸಂಜನಾ ಅವರನ್ನು ಹೆಚ್ಚಿನ ವಿಚಾರಣೆಗಾಗಿ ಸಿಸಿಬಿ ವಶಕ್ಕೆ ಪಡೆದುಕೊಂಡರು. ಪೊಲೀಸರ ವಾಹನದಲ್ಲಿ ಸಿಸಿಬಿ ಕಚೇರಿಗೆ ಕರೆದುಕೊಂಡು ಸಂಜನಾ ಅವರನ್ನು ಬಂಧಿಸಲಾಯಿತು.

ಕೋರ್ಟ್‌ ಮುಂದೆ ಹಾಜರ್

ಸಂಜೆ ವೇಳೆಗೆ 8ನೇ ಎಸಿಎಂಎಂ ಕೋರ್ಟ್‌ ಮುಂದೆ ನಟಿ ಸಂಜನಾ ಅವರನ್ನು ಹಾಜರು ಪಡಿಸಲಾಯಿತು. ಈ ವೇಳೆ 8 ದಿನಗಳ ಕಾಲ ಸಿಸಿಬಿ ವಶಕ್ಕೆ ಬೇಕು ಎಂದು ನ್ಯಾಯಾಧೀಶರ ಮುಂದೆ ಪೊಲೀಸರು ಮನವಿ ಮಾಡಿದರು. ಆದರೆ, ಐದು ದಿನಗಳ ಕಾಲ ನ್ಯಾಯಾಧೀಶರು ಸಿಸಿಬಿ ವಶಕ್ಕೆ ನೀಡುವಂತೆ ಆದೇಶಿಸಿದರು.

ಮಹಿಳಾ ಸಾಂತ್ವನ ಕೇಂದ್ರಕ್ಕೆ ಶಿಫ್ಟ್

ಐದು ದಿನಗಳ ಸಂಜನಾರನ್ನು ಸಿಸಿಬಿ ವಶಕ್ಕೆ ನೀಡಿದ ಹಿನ್ನೆಲೆ ಅವರನ್ನು ಸಂಜೆ ವೇಳೆ ಮಡಿವಾಳದಲ್ಲಿರುವ ಮಹಿಳಾ ಸಾಂತ್ವನ ಕೇಂದ್ರಕ್ಕೆ ಶಿಫ್ಟ್ ಮಾಡಲಾಗಿದೆ. ಈ ಮಧ್ಯೆ ವೈದ್ಯಕೀಯ ತಪಾಸಣೆ ಸಹ ಮಾಡಲಾಗಿದ್ದು, ಮುಂದಿನ ವಿಚಾರಣೆ ನಾಳೆ ಮುಂದುವರಿಯಲಿದೆ.