ದಕ್ಷಿಣ ಭಾರತದ ಮೊದಲ ಜೋಂಬಿ ಸಿನಿಮಾಗೆ 'ಜೋಗಿ ಪ್ರೇಮ್' ಹೀರೊ: ಧ್ರುವ ಸಿನಿಮಾ ಕಥೆಯೇನು?

ದಕ್ಷಿಣ ಭಾರತದ ಮೊದಲ ಜೋಂಬಿ ಸಿನಿಮಾ

ಏಳು ವರ್ಷಗಳ ಬಳಿಕ ಜೋಗಿ ಪ್ರೇಮ್ ಮತ್ತೆ ಹೀರೊ ಆಗಲು ಒಪ್ಪಿರುವುದಕ್ಕೆ ಕಾರಣವಿದೆ. ನಟನೆಯನ್ನೇ ಮರೆತು ನಿರ್ದೇಶನದಲ್ಲಿ ಮುಳುಗಿ ಹೋಗಿದ್ದ ಪ್ರೇಮ್ ಮತ್ತೆ ಬಣ್ಣ ಹಚ್ಚಲು ಕಾರಣ ಕಥೆ. ಇದು ಸೌತ್ ಇಂಡಿಯಾದ ಮೊಟ್ಟ ಮೊದಲ ಜೋಂಬಿ ಸಿನಿಮಾ. ಜೊತೆಗೆ ಸೈಕಾಲಾಜಿಕಲ್ ಥ್ರಿಲ್ಲರ್ ಕೂಡ ಹೌದು. ಇನ್ನೂ ಹೆಸರಿಡದ ಈ ಸಿನಿಮಾವನ್ನು ಪ್ಯಾನ್ ಇಂಡಿಯಾ ಮಾಡಲು ಚಿತ್ರ ತಂಡ ಭರ್ಜರಿ ತಯಾರಿ ನಡೆಸುತ್ತಿದೆ. ಹಾಗೇ ಈ ಸಿನಿಮಾದಲ್ಲಿ ಬೇರೆ ಬೇರೆ ಭಾಷೆಯ ದೊಡ್ಡ ಸ್ಟಾರ್‌ಕಾಸ್ಟ್‌ ಇದೆ.

VFXನಲ್ಲಿ ಪರಿಣಿತಿ ಹೊಂದಿರೋ ನಿರ್ದೇಶಕ

ಜೋಗಿ ಪ್ರೇಮ್ ಇದೇ ಮೊದಲ ಬಾರಿಗೆ ಯುವ ನಿರ್ದೇಶಕನ ಡೈರೆಕ್ಷನ್‌ನಲ್ಲಿ ನಟಿಸಲಿದ್ದಾರೆ. ಅಂದ್ಹಾಗೆ ಮೈಸೂರಿನ 28 ವರ್ಷದ ಯುವ ಎಂ. ಶಶಿಧರ್ ಈ ಸಿನಿಮಾವನ್ನು ನಿರ್ದೇಶನ ಮಾಡುತ್ತಿದ್ದಾರೆ. ಫಿಲ್ಮ್‌ ಮೇಕಿಂಗ್ ಕಲಿಯೋದರ ಜೊತೆಗೆ VFXನಲ್ಲಿ ಪರಿಣಿತಿ ಪಡೆದಿದ್ದಾರೆ. ಇದೊಂದು ಜೋಂಬಿ ಸಿನಿಮಾ ಆಗಿರುವುದರಿಂದ ವಿಎಫ್‌ಎಕ್ಸ್‌ಗೆ ಹೆಚ್ಚಿನ ಮಹತ್ವವಿದೆ. ಈಗಾಗಲೇ ಶಶಿಧರ್ 'ಘಾರ್ಗಾ' ಎಂಬ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ. ಈ ಚಿತ್ರದಲ್ಲಿ ಸಾಯಿ ಕುಮಾರ್, ಸಂಪತ್ ರಾಜ್, ಅರುಣ್ ಸಾಗರ್, ದೇವಗಿಲ್, ರಾಹುಲ್ ದೇವ್ ಜೊತೆಗೆ ಸ್ಯಾಂಡಲ್‌ವುಡ್ ನಿರ್ಮಾಪಕ ಅಶ್ವಿನಿ ರಾಮ್ ಪ್ರಸಾದ್ ಪುತ್ರ ಅರುಣ್ ರಾಮ್ ಪ್ರಸಾದ್ ಮೊದಲ ಬಾರಿಗೆ ನಾಯಕನಾಗಿ ಎಂಟ್ರಿ ಕೊಡುತ್ತಿದ್ದಾರೆ.

ಇದೊಂದು ಬಿಗ್ ಬಜೆಟ್ ಸಿನಿಮಾ

ಅಂದ್ಹಾಗೆ ದಕ್ಷಿಣ ಭಾರತದ ಮೊದಲ ಜೋಂಬಿ ಸಿನಿಮಾಗೆ ಎರಡು ನಿರ್ಮಾಣ ಸಂಸ್ಥೆಗಳು ಕೈ ಜೋಡಿಸಿವೆ. 'ಜೋಗಿ' ಸಿನಿಮಾದ ನಿರ್ಮಾಪಕ ಹಾಗೂ ಪ್ರೇಮ್ ಡ್ರೀಮ್ಸ್ ಎರಡೂ ಸಂಸ್ಥೆಗಳೂ ಬಂಡವಾಳ ಹೂಡುತ್ತಿವೆ. ಬಹುಭಾಷೆಯ ನಟ-ನಟಿಯರು ಈ ಸಿನಿಮಾದಲ್ಲಿ ಇರುವ ಕಾರಣ ಬಜೆಟ್ ಕೂಡ ದುಬಾರಿ ಎನ್ನಲಾಗಿದೆ. ಹೀಗಾಗಿ ಜೋಂಬಿ ಸಿನಿಮಾದಲ್ಲಿ ಪ್ರೇಮ್ ಹೇಗೆ ಕಾಣಿಸಿಕೊಳ್ಳುತ್ತಾರೆ? ಸಿನಿಮಾ ಹೇಗೆ ಇರುತ್ತೆ ಅನ್ನೋದು ಕುತೂಹಲವಿದೆ.

ಧ್ರುವ ಸರ್ಜಾ ಸಿನಿಮಾ ಕಥೆಯೇನು?

ಜೋಗಿ ಪ್ರೇಮ್ ಕೆವಿಎನ್‌ ಸಂಸ್ಥೆ ನಿರ್ಮಿಸುತ್ತಿರುವ ಬಿಗ್ ಬಜೆಟ್ ಸಿನಿಮಾವನ್ನು ನಿರ್ದೇಶಿಸುತ್ತಿದ್ದಾರೆ. ಧ್ರುವ ಸರ್ಜಾ ನಟಿಸುತ್ತಿರುವ ಈ ಸಿನಿಮಾದ ಟೈಟಲ್ ಲಾಂಚ್ ಅನ್ನೇ ದೊಡ್ಡ ಮಟ್ಟದಲ್ಲಿ ರಿಲೀಸ್ ಮಾಡಲು ಸುಮಾರು ಒಂದು ತಿಂಗಳಿನಿಂದ ಹರಸಾಹಸ ನಡೆಸಿದ್ದಾರೆ. ಮೋಹನ್ ಲಾಲ್, ಪೃಥ್ವಿರಾಜ್ ಸುಕುಮಾರನ್, ವಿಜಯ್ ಸೇತುಪತಿ, ಸಂಜಯ್ ದತ್, ಸೆಂಚುರಿ ಸ್ಟಾರ್ ಶಿವಣ್ಣ ಸೇರಿದಂತೆ ಭಾರತೀಯ ಚಿತ್ರರಂಗದ ದಿಗ್ಗಜರು ಈ ಟೈಟಲ್‌ ಲಾಂಚ್‌ಗೆ ಬೆಂಬಲ ನೀಡಲಿದ್ದಾರೆ.