ಮೊದಲ ಮಗುವಿನ ನಿರೀಕ್ಷೆಯಲ್ಲಿರುವ ಸಂಜನಾ ಗಲ್ರಾನಿ ಹೇಳಿದ್ದೇನು?: ಗಂಡು ಮಗು ಎಂದಿದ್ದೇಕೆ?

ಸಂಜನಾ ಈಗ 5 ತಿಂಗಳ ಗರ್ಭಿಣಿ

'ಗಂಡ ಹೆಂಡತಿ' ಖ್ಯಾತಿಯ ಸಂಜನಾ ಗಲ್ರಾನಿ ತಾಯಿಯಾಗುತ್ತಿರುವ ವಿಷಯವನ್ನು ಅವರೇ ಸ್ಪಷ್ಟಪಡಿಸಿದ್ದಾರೆ. ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿರುವ ಸಂಜನಾ 'ನಾನೀಗ 5 ತಿಂಗಳ ಗರ್ಭಿಣಿ" ಎಂದು ಹೇಳಿಕೊಂಡಿದ್ದಾರೆ. " ನನಗೆ ನನ್ನ ಬದುಕಿಗೆ ತುಂಬಾನೇ ಧನ್ಯತೆ ಇದೆ. ಇದೊಂದು ಸುಂದರ ಜರ್ನಿ. ನನಗೆ ಗಂಡು ಮಗು ಆಗಲಿದೆ ಎನ್ನುವ ಭಾವನೆ ನನಗೆ ಬರುತ್ತಿದೆ." ಎಂದು ಟೈಮ್ಸ್ ಆಫ್ ಇಂಡಿಯಾ ಜೊತೆ ಮಾಹಿತಿ ಹಂಚಿಕೊಂಡಿದ್ದಾರೆ. ಈ ಮೂಲಕ ಗಂಡು ಮಗುವೇ ಜನಿಸುತ್ತದೆ ಎಂಬ ಆತ್ಮವಿಶ್ವಾಸದಲ್ಲಿ ಇರುವುದೇಕೆ ಎಂದು ಸೋಶಿಯಲ್ ಮೀಡಿಯಾದಲ್ಲಿ ಚರ್ಚೆಯಾಗುತ್ತಿದೆ.

ಪ್ರೆಗ್ನೆನ್ಸಿ ಬಗ್ಗೆ ಭಯವಿತ್ತು

ಸಂಜನಾಗೆ ಮಕ್ಕಳು ಎಂದರೆ ತುಂಬಾನೇ ಇಷ್ಟವಂತೆ. ಹೀಗಾಗಿ ತಾನು ಗರ್ಭಿಣಿಯಾಗಿದ್ದೇನೆ ಎನ್ನುವ ವಿಷಯ ತಿಳಿಯುತ್ತಿದ್ದಂತೆ ಸಂತಸ ಪಟ್ಟರಂತೆ. " ಪ್ರೆಗ್ನೆನ್ಸಿ ಬಗ್ಗೆ ನನಗೆ ಭಯವಿತ್ತು. ಗರ್ಭಿಣಿಯಾದ ಬಳಿಕ ದೇಹದಲ್ಲಾಗುವ ಬದಲಾವಣೆ ಬಗ್ಗೆ ಆತಂಕವಿತ್ತು. ಹೀಗಾಗಿ ನಾನು ಪ್ರೆಗ್ನೆನ್ಸಿಯನ್ನು ಮುಂದೂಡುತ್ತಲೇ ಇದ್ದೆ. ನನ್ನ ಪೋಷಕರು ಯಾವಾಗಲೂ ಮಕ್ಕಳು ಯಾವಾಗ ಮಾಡಿಕೊಳ್ಳುತ್ತೀಯ ಎಂದು ಕೇಳುತ್ತಲೇ ಇದ್ದರು. ನನಗೀಗ 34 ವರ್ಷ ಇದು ಸರಿಯಾದ ಸಮಯ ಎಂದುಕೊಂಡು, ನಾನು, ನನ್ನ ಗಂಡ ಮಗು ಮಾಡಿಕೊಳ್ಳುವ ನಿರ್ಧಾರಕ್ಕೆ ಬಂದೆವು." ಎಂದು ಸಂಜನಾ ಹೇಳಿದ್ದಾರೆ.

ಕೊನೆ ಎರಡು ವಾರದವರೆಗೂ ಆ್ಯಕ್ಟಿವ್ ಆಗಿರುತ್ತೇನೆ

ಸಂಜನಾ ಗಲ್ರಾನಿ ಮಗು ಜನಿಸುವವರೆಗೂ ಆ್ಯಕ್ಟಿವ್ ಆಗಿರಲು ಚಿಂತಿಸಿದ್ದಾರೆ. "ಮಗು ಹುಟ್ಟುವವರೆಗೂ ತುಂಬಾನೇ ಆ್ಯಕ್ಟಿವ್ ಆಗಿರಲು ತೀರ್ಮಾನಿಸಿದ್ದೇನೆ. ಮಗು ಜನಿಸುವ ಎರಡು ವಾರಗಳವರೆಗೂ ಕೆಲಸ ಮಾಡಲು ನಾನು ನಿರ್ಧರಿಸಿದ್ದೇನೆ. ಕೆಲ ಮಹಿಳೆಯನ್ನು ನೋಡಿ, ಅವರಿಂದ ಪ್ರೇರಣೆ ಹೊಂದಿದ್ದೇನೆ. ನಾನು ವಾರದಲ್ಲಿ 3-4 ದಿನ ಕೆಲಸ ಮಾಡಿದರೂ, ನಾನು ಬ್ಯುಸಿಯಾಗಿರುತ್ತೇನೆ." ಎಂದು ಮಗು ಜನಿಸುವವರೆಗೂ ಕೆಲಸ ಮಾಡುತ್ತೇನೆ ಎಂದು ಸಂಜನಾ ಮಾಹಿತಿ ಹಂಚಿಕೊಂಡಿದ್ದಾರೆ.

ವೈದ್ಯನೊಂದಿಗೆ ಸಂಜನಾ ವಿವಾಹ

ಜೈಲಿನಿಂದ ಹೊರ ಬಂದ ಬಳಿಕವೂ ಸಂಜನಾ ತನ್ನ ಮದುವೆ ಬಗ್ಗೆ ಮಾತಾಡಿರಲಿಲ್ಲ. ಆದರೆ ಕಳೆದ ವರ್ಷ ಜೂನ್ ತಿಂಗಳಲ್ಲಿ ಸಂಜನಾ ಮದುವೆ ವಿವಾಹದ ಹುಟ್ಟನ್ನು ರಟ್ಟು ಮಾಡಿದ್ದರು. ಮೊದಲ ಲಾಕ್ ಡೌನ್‌ನಲ್ಲಿ ಮದುವೆಯಾಗಿದ್ದು, ಕೆಲವು ಕಾರಣಗಳಿಂದ ಆ ವಿಷಯವನ್ನು ಹಂಚಿಕೊಳ್ಳಲು ಸಾಧ್ಯವಾಗಿಲ್ಲವೆಂದು ಹೇಳಿದ್ದರು. ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ವೈದ್ಯರಾಗಿರುವ ಅಜೀಜ್ ಪಾಷಾರನ್ನು ಸಂಜನಾ ವಿವಾಹವಾಗಿದ್ದರು. ಸಂಜನಾ ಜೈಲಿನಲ್ಲಿದ್ದಾಗ, ಇಬ್ಬರೂ ಮದುವೆ ಆಗಿರುವ ಫೋಟೊಗಳು ಸೋಶಿಯಲ್ ಮೀಡಿಯಾದಲ್ಲಿ ಹರಿದಾಡಿದ್ದವು.