ವಿಡಿಯೋ: ಕೊರೊನಾ ವಿರುದ್ಧ ಪ್ರಾಣ ಪಣಕ್ಕಿಟ್ಟವರಿಗೆ ತಾರೆಯರ ಹಾಡಿನ ಸಲಾಂ

ಕನ್ನಡದ ತಾರೆಯರು ಸಲ್ಲಿಸಿದ್ದಾರೆ ವಂದನೆ

ಪುನೀತ್ ರಾಜ್‌ಕುಮಾರ್, ರಮೇಶ್ ಅರವಿಂದ್, ರಕ್ಷಿತಾ, ಶ್ರೀಮುರುಳಿ, ವಿಜಯ್ ರಾಘವೇಂದ್ರ, ಡಾಲಿ ಧನಂಜಯ್, ಶ್ರದ್ಧಾ ಶ್ರೀನಾಥ್, ಹರಿಪ್ರಿಯಾ, ಪ್ರಣಿತಾ, ಐಂದ್ರಿತಾ ರೇ, ದಿಗಂತ್, ಪ್ರಜ್ವಲ್ ದೇವರಾಜ್, ಮೇಘನಾ ರಾಜ್ ಸಾಲು-ಸಾಲು ನಟ-ನಟಿಯರು ಒಟ್ಟುಗೂಡಿ ಕೊರೊನಾ ಯೋಧರಿಗೆ ವಂದಿಸಿದ್ದಾರೆ. ಅವರ ಕಾರ್ಯವನ್ನು ಶ್ಲಾಘಿಸಿದ್ದಾರೆ.

ಪುನೀತ್ ಹಾಡಿನಿಂದ ಆರಂಭವಾಗುವ ಹಾಡು

''ನೀನೇ ತಾಯಿ ನೀನೆ ತಂದೆ, ಭೂಮಿ ತಾಯಿ ಎಲ್ಲಾ ನಿಂದೆ..'' ಎಂದು ಪುನೀತ್ ರಾಜ್‌ಕುಮಾರ್ ಅವರು ತಮ್ಮ ತಂದೆ-ತಾಯಿಯ ಚಿತ್ರದ ಮುಂದೆ ನಿಂತು ಹಾಡುವಲ್ಲಿಂದ ಹಾಡು ಪ್ರಾರಂಭವಾಗಿ, ಕನ್ನಡದ ಎಲ್ಲಾ ಪ್ರಮುಖ ತಾರೆಯರು ಹಾಡನ್ನು ಗುನುಗುತ್ತಾ ಮುಂದುವರೆಯುತ್ತಾರೆ. ಎಲ್ಲರೂ ತಾವಿದ್ದ ಜಾಗದಲ್ಲಿಯೇ ತಾವುಗಳೇ ಶೂಟ್ ಮಾಡಿದ ವಿಡಿಯೋಗಳ ಕೊಲ್ಯಾಜ್ ಈ ಹಾಡು.

ಕಣ್ಣು ಒದ್ದೆ ಮಾಡುವ ಚಿತ್ರಗಳು, ವಿಡಿಯೋ ತುಣುಕು

ಕೊರೊನಾ ದಿಂದಾಗಿ ಬದಲಾದ ಪರಿಸ್ಥಿತಿಯ ಚಿತ್ರಗಳು, ವಿಡಿಯೋಗಳು ಮನಸ್ಸನ್ನು ಆರ್ದ್ರಗೊಳಿಸುತ್ತವೆ. ರಸ್ತೆಯಲ್ಲಿ ನಿಂತು ಊಟ ಮಾಡುತ್ತಿರುವ ಪೊಲೀಸರ ವಿಡಿಯೋ, ಜನರಲ್ಲಿ ಜಾಗೃತಿ ಮೂಡಿಸಲು ಅವರು ಮಾಡುತ್ತಿರುವ ಪ್ರಯತ್ನಗಳು, ವೈದ್ಯರು, ಆರೋಗ್ಯ ಕಾರ್ಯಕರ್ತರ ಚಿತ್ರಗಳು ಕಣ್ಣು ಒದ್ದೆ ಮಾಡುತ್ತವೆ.

ಹಾಡಿನ ಹಿಂದಿರುವ ಕ್ರಿಯಾಶೀಲ ಮನಸ್ಸುಗಳು

ಈ ಸುಂದರವಾದ ಹಾಡನ್ನು ಬರೆದಿರುವುದು ಸತ್ಯ ಪ್ರಕಾಶ್, ಗಾಯನ ಮತ್ತು ಸಂಗೀತ ಸಂಯೋಜನೆ ವಾಸುಕಿ ವೈಭವ್, ವಾದ್ಯ ವ್ಯವಸ್ಥೆ ನೊಬಿನ್ ಪೌಲ್, ಸಂಕಲನ ಮಾಡಿರುವವರು ರವಿ ಆರಾಧ್ಯ, ಹಾಡಿನ ಐಡಿಯಾ ಮತ್ತು ನಿರ್ದೇಶನ ಮಾಡಿರುವುದು ಪನ್ನಗಾಭರಣ.