ಮೊದಲ ಬಾರಿ ತೆಲುಗು ಕಿರುತೆರೆಯಲ್ಲಿ ಕೆಜಿಎಫ್ ಪ್ರಸಾರ: ಟಿಆರ್‌ಪಿ ಬಂದಿದ್ದೆಷ್ಟು?

ವ್ಯಾಪಕ ಪ್ರಚಾರ ಪಡೆದಿದ್ದ ಚಿತ್ರ

ಜುಲೈ 5ರಂದು 'ಕೆಜಿಎಫ್ ಚಾಪ್ಟರ್ 1' ತೆಲುಗು ಆವೃತ್ತಿ ಸ್ಟಾರ್ ಮಾ ಚಾನೆಲ್‌ನಲ್ಲಿ ಪ್ರಸಾರವಾಗಿತ್ತು. ಅಂದು ಟಿವಿ ಮುಂದೆ ಹೆಚ್ಚು ಜನರು ಕೂರುವಂತೆ ಅವರನ್ನು ಸೆಳೆಯಲು ನಟ ಯಶ್ ಮತ್ತು ನಿರ್ದೇಶಕ ಪ್ರಶಾಂತ್ ನೀಲ್, ವಿಡಿಯೋಗಳನ್ನು ಕೂಡ ಮಾಡಿ ಪ್ರಚಾರ ನಡೆಸಿದ್ದರು.

11.9 ಟಿಆರ್‌ಪಿ ಪಡೆದ ಕೆಜಿಎಫ್

ಜುಲೈ 5ರ ಭಾನುವಾರ ಪ್ರಸಾರವಾದ ಕೆಜಿಎಫ್ 1ರ ತೆಲುಗು ಅವತರಣಿಕೆಯ ಟೆಲಿವಿಷನ್ ರೇಟಿಂಗ್ ಬಹಿರಂಗವಾಗಿದ್ದು, 11.9 ಟಿಆರ್‌ಪಿ ಪಡೆದುಕೊಂಡಿದೆ. ಇದು ಕಿರುತೆರೆಯ ಹಲವಾರು ಚಾನೆಲ್‌ಗಳ ನೂರಾರು ಕಾರ್ಯಕ್ರಮಗಳ ಮಧ್ಯೆ ಒಟ್ಟಾರೆ ಉತ್ತಮ ಗಳಿಕೆಯಾದರೂ, ನಿರೀಕ್ಷಿತ ಮಟ್ಟವನ್ನು ತಲುಪಿಲ್ಲ.

ಸರಿಲೇರು ನೀಕೆವ್ವರು ದಾಖಲೆ

ಮಹೇಶ್ ಬಾಬು ಅಭಿನಯದ 'ಸರಿಲೇರು ನೀಕೆವ್ವರು' ಚಿತ್ರ ಮೊದಲ ಬಾರಿಗೆ ಪ್ರಸಾರವಾದ ಸಂದರ್ಭದಲ್ಲಿ ತೆಲುಗು ಚಿತ್ರರಂಗದ ಹಿಂದಿನ ಎಲ್ಲ ದಾಖಲೆಗಳನ್ನೂ ಮುರಿದು ಹಾಕಿ 23.4 ಟಿಆರ್‌ಪಿ ಪಡೆದು ದಾಖಲೆ ಸೃಷ್ಟಿಸಿತ್ತು. ಕೆಜಿಎಫ್‌ಗೆ ದೊರಕಿದ್ದ ಪ್ರಚಾರ ಮತ್ತು ಹೈಪ್ ಕಂಡು ಈ ದಾಖಲೆಯನ್ನು ಅದು ಮುರಿಯಲಿದೆ ಎಂದೇ ಭಾವಿಸಲಾಗಿತ್ತು. ಆದರೆ ಅದು ಹುಸಿಯಾಗಿದೆ.

ಟಿಆರ್‌ಪಿ ಕಡಿಮೆಯಾಗಲು ಕಾರಣ?

ಬಿಡುಗಡೆಯಾಗಿ ಒಂದೂವರೆ ವರ್ಷದ ನಂತರ ಕಿರುತೆರೆಯಲ್ಲಿ ಪ್ರಸಾರವಾಗಿದೆ. ಅಲ್ಲದೆ, ಒಟಿಟಿ ಹಾಗೂ ಕಳ್ಳಮಾರ್ಗಗಳಲ್ಲಿ ಸಾವಿರಾರು ಮಂದಿ ಈ ಚಿತ್ರವನ್ನು ವೀಕ್ಷಿಸಿದ್ದಾರೆ. ಈ ಕಾರಣದಿಂದ ಅದಕ್ಕೆ ನಿರೀಕ್ಷಿತ ಟಿಆರ್‌ಪಿ ಸಿಕ್ಕಿಲ್ಲ. ಆದರೆ ಇದು ಕೂಡ ಉತ್ತಮ ಸಂಖ್ಯೆಯೇ ಎಂದು ಅಭಿಮಾನಿಗಳು ಸಮಾಧಾನಪಟ್ಟಿದ್ದಾರೆ.

ಡಬ್ಬಿಂಗ್ ಚಿತ್ರಗಳ ಟಿಆರ್‌ಪಿ

ತೆಲುಗು ಚಿತ್ರರಂಗದಲ್ಲಿ ಡಬ್ ಆದ ಸಿನಿಮಾಗಳ ಕಿರುತೆರೆ ಪ್ರಸಾರದಲ್ಲಿನ ದಾಖಲೆಯನ್ನು ಕೂಡ ಸರಿಗಟ್ಟಲು ಕೆಜಿಎಫ್ 1ಕ್ಕೆ ಸಾಧ್ಯವಾಗಿಲ್ಲ. ರೋಬೋ- 19.04 ಟಿಆರ್‌ಪಿ, ಬಿಚಗಾಡು- 18.76, ಕಬಾಲಿ- 14.52, ಕಾಂಚನಾ- 13.1 ಟಿಆರ್‌ಪಿ ಪಡೆದುಕೊಂಡಿದ್ದವು. ಈಗ ಕೆಜಿಎಫ್ ಚಾಪ್ಟರ್ 1 ಚಿತ್ರ 11.9 ರೇಟಿಂಗ್ ಗಳಿಸಿದೆ.

4.5 ಕೋಟಿಗೆ ಮಾರಾಟ

ಕೆಜಿಎಫ್‌ನ ತೆಲುಗು ಉಪಗ್ರಹ ಹಕ್ಕುಗಳನ್ನು ಸ್ಟಾರ್ ಮಾ ವಾಹಿನಿ 4.5 ಕೋಟಿ ರೂ.ಗೆ ಖರೀದಿಸಿತ್ತು. ಅದು ವಿನಿಯೋಗಿಸಿರುವ ಹಣಕ್ಕೇನೂ ಮೋಸವಾಗುವುದಿಲ್ಲ ಎನ್ನಲಾಗಿದೆ. ತೆಲುಗಿನ ಚಿತ್ರಮಂದಿರಗಳಲ್ಲಿ ಕೆಜಿಎಫ್ 23ಕೋಟಿ ಮತ್ತು ಹಿಂದಿ ಆವೃತ್ತಿಯಿಂದ 45 ಕೋಟಿ ರೂ ಗಳಿಕೆ ಕಂಡಿತ್ತು ಎನ್ನಲಾಗಿದೆ.