ಬಿಡುಗಡೆಗೂ ಮುನ್ನ ಮತ್ತೊಂದು ದಾಖಲೆ ಬರೆದ 'ಕೆಜಿಎಫ್ ಚಾಪ್ಟರ್ 2'

ಕೆಜಿಎಫ್ 2 ಗಾಗಿ ಕಾದಿರುವ ಪ್ರೇಕ್ಷಕರು

ಕೆಜಿಎಫ್ ಚಾಪ್ಟರ್ 2 ಇದೇ ಅಕ್ಟೋಬರ್ 23ರಂದು ತೆರೆಗೆ ಬರಲಿದೆ ಎಂದು ಮಾರ್ಚ್ 13ರಂದು ಅಧಿಕೃತವಾಗಿ ಘೋಷಿಸಲಾಗಿತ್ತು. ಇದು ಅಭಿಮಾನಿಗಳಲ್ಲಿ ಕಾತರವನ್ನು ಹೆಚ್ಚಿಸಿದೆ. ಬಾಲಿವುಡ್‌ನಲ್ಲಿಯೂ ಅನೇಕ ಸ್ಟಾರ್ ನಟರ ದೊಡ್ಡ ದೊಡ್ಡ ಸಿನಿಮಾಗಳು ತೆರೆಕಾಣಲು ಸಜ್ಜಾಗಿವೆ. ಇನ್ನು ಕೆಲವು ಅರ್ಧ ಚಿತ್ರೀಕರಣ ಮುಗಿಸಿ ಉಳಿದರ್ಧ ಉಳಿಸಿಕೊಂಡಿವೆ. ಆದರೆ ಹಿಂದಿ ಸಿನಿಮಾ ಪ್ರೇಕ್ಷಕರು ಕೂಡ ಕಾದಿರುವುದು ಕನ್ನಡಿಗರ ಕೆಜಿಎಫ್ ಚಿತ್ರಕ್ಕಾಗಿ.

ಅತಿ ಹೆಚ್ಚು ಕಾದಿರುವ ಚಿತ್ರ

ಓರ್ಮ್ಯಾಕ್ಸ್ ಮೀಡಿಯಾ ಸಂಸ್ಥೆಯು ಪ್ರತಿ ತಿಂಗಳೂ ಒಂದು ಸಮೀಕ್ಷೆ ನಡೆಸುತ್ತದೆ. ಅದು ಹಿಂದಿ ಚಿತ್ರರಂಗದ ಸಿನಿಮಾಗಳಲ್ಲಿ ಯಾವ ಚಿತ್ರಕ್ಕೆ ನೀವು ಹೆಚ್ಚು ಕಾತರದಿಂದ ಕಾದಿದ್ದೀರಿ ಎಂದು. ವಿಶೇಷವೆಂದರೆ ಕಳೆದ ಫೆಬ್ರವರಿಯಿಂದಲೂ ಈ ಪಟ್ಟಿಯಲ್ಲಿ ಕೆಜಿಎಫ್ ಚಾಪ್ಟರ್ 2 ಮೊದಲ ಸ್ಥಾನದಲ್ಲಿದೆ.

ಆರು ತಿಂಗಳಿಂದ ಮೊದಲ ಸ್ಥಾನ

ಅಂದರೆ ಹಿಂದಿ ಪ್ರೇಕ್ಷಕರು ಅತಿ ಕಾತರದಿಂದ ಕಾದಿರುವ ಸಿನಿಮಾ ಎಂದರೆ ಕೆಜಿಎಫ್ 2 ಚಿತ್ರದ ಹಿಂದಿ ಆವೃತ್ತಿ. ಟಾಪ್ ಫೈವ್ ಸಿನಿಮಾಗಳ ಪಟ್ಟಿಯಲ್ಲಿ ಫೆಬ್ರವರಿಯಿಂದ ಜುಲೈವರೆಗೂ ಕೆಜಿಎಫ್ ಮೊದಲ ಸ್ಥಾನವನ್ನು ಕಾಪಾಡಿಕೊಂಡು ಬಂದಿದೆ. ಮುಖ್ಯ ಟ್ರೇಲರ್ ಬಿಡುಗಡೆಯಾಗದ ಚಿತ್ರಗಳನ್ನು ಇದರಲ್ಲಿ ಪರಿಗಣಿಸಲಾಗಿದೆ.

ಸ್ಥಾನ ಬದಲಿಸಿಕೊಂಡ ಚಿತ್ರಗಳು

ಅತಿ ಹೆಚ್ಚು ಕಾದಿರುವ ಹಿಂದಿ ಸಿನಿಮಾಗಳ ಪಟ್ಟಿಯಲ್ಲಿ ರಾಜಮೌಳಿ ನಿರ್ದೇಶನದ ಆರ್ಆರ್ಆರ್ ಕೂಡ ಫೆಬ್ರವರಿಯಲ್ಲಿ ಐದನೆಯ ಸ್ಥಾನ ಪಡೆದಿತ್ತು. ಆದರೆ ನಂತರ ಅದು ಸ್ಥಾನ ಕಳೆದುಕೊಂಡಿದೆ. ಗೋಲ್‌ ಮಾಲ್ 5, ಬ್ರಹ್ಮಾಸ್ತ್ರ, 83, ಲಾಲ್ ಸಿಂಗ್ ಛಡ್ಡಾ, ಸತ್ಯಮೇವ ಜಯತೇ 2 ಹಾಗೂ ಸೂರ್ಯವಂಶಿ ಚಿತ್ರಗಳು ಈ ಆರು ತಿಂಗಳಲ್ಲಿ ತಮ್ಮ ಸ್ಥಾನವನ್ನು ಬದಲಿಸಿಕೊಂಡಿವೆ. ಆದರೆ ಈ ಯಾವ ಚಿತ್ರವೂ ಕೆಜಿಎಫ್ 2ಅನ್ನು ಮೀರಿಸಿಲ್ಲ. ಸೂರ್ಯವಂಶಿ ಚಿತ್ರದ ಟ್ರೇಲರ್ ಬಿಡುಗಡೆಯಾಗಿರುವುದರಿಂದ ಅದನ್ನು ಪಟ್ಟಿಯಿಂದ ಹೊರಗಿಡಲಾಗಿದೆ.

ಸಂಜಯ್ ದತ್ ಜನ್ಮದಿನಕ್ಕೆ ಉಡುಗೊರೆ?

ಈ ನಡುವೆ ಕೆಜಿಎಫ್ ಚಿತ್ರತಂಡ 'ಅಧೀರ'ನ ಜನ್ಮದಿನಕ್ಕೆ ವಿಶೇಷ ಉಡುಗೊರೆ ನೀಡಲು ಮುಂದಾಗಿದೆ. ಜುಲೈ 29ರಂದು ಸಂಜಯ್ ದತ್ ಅವರ 61ನೇ ಜನ್ಮದಿನದಂದು ಕೆಜಿಎಫ್‌ನ ಅಧೀರನ ಲುಕ್ ಬಿಡುಗಡೆ ಮಾಡಲು ಚಿತ್ರತಂಡ ಉದ್ದೇಶಿಸಿದೆ ಎನ್ನಲಾಗಿದೆ. ಆದರೆ ಇದು ಪೋಸ್ಟರ್, ಟೀಸರ್ ಅಥವಾ ಟ್ರೇಲರ್ ರೂಪದಲ್ಲಿ ಇರಲಿದೆಯೇ ಎನ್ನುವುದು ಖಚಿತವಾಗಿಲ್ಲ.