ಕನ್ನಡದಲ್ಲಿ ಸಿನಿಮಾ ಮಾಡುವ ಬಗ್ಗೆ ತುಟಿ ಬಿಚ್ಚಿದ ಕೃತಿ ಶೆಟ್ಟಿ; ಇಂಥ ಸಿನಿಮಾಗಾಗಿ ವೈಟಿಂಗ್!

ಕನ್ನಡ ಸಿನಿಮಾದಲ್ಲಿ ಅಭಿನಯಿಸುವುದರ ಕುರಿತು ಮಾತನಾಡಿದ ಕೃತಿ

ನಿನ್ನೆಯಷ್ಟೇ ( ಅಕ್ಟೋಬರ್ 10 ) ಬೆಂಗಳೂರಿನಲ್ಲಿ 67ನೇ ಫಿಲ್ಮ್‌ಫೇರ್ ಪ್ರಶಸ್ತಿ ಸೌತ್ ಕಾರ್ಯಕ್ರಮ ನಡೆಯಿತು. ಈ ಕಾರ್ಯಕ್ರಮಕ್ಕಾಗಿ ಆಗಮಿಸಿದ್ದ ಕೃತಿ ಶೆಟ್ಟಿ ಮಾಧ್ಯಮದವರೊಂದಿಗೆ ಮಾತನಾಡಿದರು. ಈ ವೇಳೆ ಕನ್ನಡದಲ್ಲಿ ಸಿನಿಮಾ ಯಾವಾಗ ಮಾಡ್ತೀರ ಎಂಬ ಪ್ರಶ್ನೆ ಕೃತಿ ಶೆಟ್ಟಿಗೆ ಎದುರಾಯಿತು. ಈ ಪ್ರಶ್ನೆಗೆ ಉತ್ತರಿಸಿದ ಕೃತಿ ಶೆಟ್ಟಿ 'ನಾನು ಕರ್ನಾಟಕದ ಹುಡುಗಿ ಆದ ಕಾರಣ ನಾನು ಅಭಿನಯಿಸಲಿರುವ ಮೊದಲ ಕನ್ನಡ ಸಿನಿಮಾ ತುಂಬಾ ವಿಶೇಷವಾಗಿರಬೇಕು, ಅಂಥ ಕತೆಗೋಸ್ಕರ ಕಾಯುತ್ತಿದ್ದೇನೆ' ಎಂದರು. ಈ ಮೂಲಕ ದೊಡ್ಡ ಚಿತ್ರದ ಮೂಲಕ ತಾನು ಶೀಘ್ರದಲ್ಲಿಯೇ ಚಂದನವನಕ್ಕೆ ಕಾಲಿಡುವ ಸೂಚನೆಯನ್ನು ನೀಡಿದ್ದಾರೆ ನಟಿ ಕೃತಿ ಶೆಟ್ಟಿ.

ಸೂರ್ಯ ಜತೆ ನಟನೆ

ಇನ್ನು ತಮಿಳಿನಲ್ಲಿ ಸದ್ಯ ಸಾಲು ಸಾಲು ಒಳ್ಳೆಯ ಕಂಟೆಂಟ್ ಇರುವ ಚಿತ್ರಗಳಲ್ಲಿ ಅಭಿನಯಿಸುತ್ತಿರುವ ನಟನೆಂದರೆ ಅದು ಸೂರ್ಯ. ಇತ್ತೀಚೆಗಷ್ಟೆ ರಾಷ್ಟ್ರ ಪ್ರಶಸ್ತಿಯನ್ನೂ ಸಹ ಪಡೆದ ನಟ ಸೂರ್ಯ ಅಭಿನಯದ 41ನೇ ಚಿತ್ರಕ್ಕೆ ಕೃತಿ ಶೆಟ್ಟಿ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಈ ಮೂಲಕ ಕೃತಿ ಶೆಟ್ಟಿ ಕಾಲಿವುಡ್‌ಗೆ ದೊಡ್ಡ ನಟನ ಚಿತ್ರದ ಮೂಲಕ ಭರ್ಜರಿ ಎಂಟ್ರಿ ಕೊಡಲಿದ್ದಾರೆ.

ಸಾಲು ಸಾಲು ಸಿನಿಮಾಗಳ ಸೋಲು

ಇನ್ನು ಉಪ್ಪೆನಾ ಚಿತ್ರದ ಮೂಲಕ ತೆಲುಗು ಚಿತ್ರರಂಗಕ್ಕೆ ಪದಾರ್ಪಣೆ ಮಾಡಿ ಗೆದ್ದ ಕೃತಿ ಶೆಟ್ಟಿ ನಂತರ ತೆರೆಕಂಡ ಚಿತ್ರಗಳಲ್ಲಿ ಉಪ್ಪೆನಾ ರೀತಿಯ ಯಶಸ್ಸು ಕಾಣುವಲ್ಲಿ ಸಫಲರಾಗಲಿಲ್ಲ. ಕೃತಿ ಶೆಟ್ಟಿ ಅಭಿನಯದ ಶ್ಯಾಮ್ ಸಿಂಗಾ ರಾಯ್ ಹಾಗೂ ಬಂಗಾರ್ರಾಜು ಸಾಮಾನ್ಯ ಗೆಲುವು ಕಂಡರೆ, ದ ವಾರಿಯರ್, ಮಾಚೆರ್ಲಾ ನಿಯೋಜಕವರ್ಗಮ್ ಹಾಗೂ ಆ ಅಮ್ಮಾಯಿ ಗುರುಂಚಿ ಮೀಕು ಚೆಪ್ಪಾಲಿ ಚಿತ್ರಗಳು ಬಾಕ್ಸ್ ಆಫೀಸ್‌ನಲ್ಲಿ ಮಕಾಡೆ ಮಲಗಿದವು. ಹೀಗೆ ಸಾಲು ಸಾಲು ಸೋಲು ಕಂಡಿರುವ ಕೃತಿ ಶೆಟ್ಟಿ ಮುಂದಿನ ಚಿತ್ರದಲ್ಲಿ ಗೆದ್ದ ಕಮ್‌ಬ್ಯಾಕ್ ಮಾಡಬೇಕಿದೆ.

ಸೂಪರ್ 30 ಮೊದಲ ಚಿತ್ರ

ಇನ್ನು ಕೃತಿ ಶೆಟ್ಟಿ ಮೊದಲ ಬಾರಿಗೆ ಬೆಳ್ಳೆ ತೆರೆಯಲ್ಲಿ ಕಾಣಿಸಿಕೊಂಡಿದ್ದು ಹೃತಿಕ್ ರೋಷನ್ ಹಾಗೂ ಮೃಣಾಲ್ ಠಾಕೂರ್ ಅಭಿನಯದ ಬಾಲಿವುಡ್ ಸಿನಿಮಾ ಸೂಪರ್ 30 ಮೂಲಕ. ಈ ಚಿತ್ರದಲ್ಲಿ ನಟಿ ಕೃತಿ ಶೆಟ್ಟಿ ವಿದ್ಯಾರ್ಥಿನಿ ಪಾತ್ರ ನಿರ್ವಹಿಸಿದ್ದರು.