ಡಾ.ರಾಜ್ ನಿಧನದ ದಿನ ಸುದ್ದಿ ಪತ್ರಿಕೆಗಳಲ್ಲಿ ಕಂಡು ಬಂದ ಶೀರ್ಷಿಕೆಗಳು

ದೈವ ಸನ್ನಿಧಿಗೆ ದೇವತಾ ಮನುಷ್ಯಾ

'ದೈವ ಸನ್ನಿಧಿಗೆ ದೇವತಾ ಮನುಷ್ಯಾ' ಎನ್ನುವ ಶೀರ್ಷಿಕೆ ಯೊಂದಿಗೆ ಉದಯವಾಣಿ ದಿನಪತ್ರಿಕೆ ಸುದ್ದಿ ಬಿತ್ತರಿಸಿತ್ತು. ಈ ಶೀರ್ಷಿಕೆ ಜೊತೆಗೆ ಮುಗಿಯದ ಒಂದು ಮುತ್ತಿನ ಕಥೆ ಎನ್ನುವ ಸಬ್ ಟೈಟಲ್ ಕೂಡ ಹಾಕಲಾಗಿತ್ತು. 2006 ಏಪ್ರಿಲ್ 12 ರಂದು ವರನಟ ಡಾ ರಾಜ್ ಕುಮಾರ್ ಅಪಾರ ಸಂಖ್ಯೆಯ ಅಭಿಮಾನಿಗಳನ್ನು ಅಗಲಿ ಬಾರದ ಲೋಕಕ್ಕೆ ಪಯಣ ಬೆಳೆಸಿದ್ದರು.

ಕನ್ನಡ ಕಣ್ಮಣಿ ಕಣ್ಮರೆ

'ಕನ್ನಡ ಕಣ್ಮಣಿ ಕಣ್ಮರೆ' ಟೈಟಲ್ ನೀಡಿ ವಿಜಯ ಕರ್ನಾಟಕ ಸುದ್ದಿ ಪತ್ರಿಕೆ ಡಾ ರಾಜ್ ಕುಮಾರ್ ನಿಧನದ ಸುದ್ದಿಯನ್ನು ಪ್ರಕಟ ಮಾಡಿತ್ತು. ಜೊತೆಗೆ ಬೆಂಗಳೂರು ಉದ್ರಿಕ್ತ, ಅಘೋಷಿತ ಬಂದ್ ಎನ್ನುವ ಸಬ್ ಟೈಟಲ್ ಕೂಡ ಬಿತ್ತರಿಸಿತ್ತು. ಚಿರನಿದ್ರೆಗೆ ಜಾರಿರುವ ಡಾ ರಾಜ್ ಕುಮಾರ್ ಅವರನ್ನು ಪತ್ನಿ ಪಾರ್ವತಮ್ಮ ರಾಜ್ ಕುಮಾರ್ ಬಿಗಿ ದಪ್ಪಿ ಕಣ್ಣೀರಿಡುತ್ತಿರುವ ಮನ ಕಲುವಂತಹ ಫೋಟೋವನ್ನು ಪ್ರಕಟಮಾಡಿತ್ತು.

ಕರ್ನಾಟಕ ರತ್ನ ಕಳಚಿ ಬಿತ್ತು

'ಕರ್ನಾಟಕ ರತ್ನ ಕಳಚಿ ಬಿತ್ತು' ಶೀರ್ಷಿಕೆಯೊಂದಿಗೆ 5 ಕೋಟಿ ಕನ್ನಡಿಗರು ತಬ್ಬಲಿಗಳಾದರು ಎನ್ನುವ ಸಬ್ ಟೈಟಲ್ ಜೊತೆಗೆ ಸಂಜೆ ವಾಣಿ ಸುದ್ದಿ ಪತ್ರಿಕೆಯಲ್ಲಿ ರಾಜ್ ಕುಮಾರ್ ನಿಧನದ ಸುದ್ದಿ ಪ್ರಕಟವಾಗಿತ್ತು.

ಅಣ್ಣಾವ್ರು ಭೂತಾಯಿ ಮಡಿಲಿಗೆ

ಪದ್ಮ ಭೂಷಣ ಡಾ ರಾಜ್ ಕುಮಾರ್ ನಿಧನದ ದಿನ ಸಂಭವಿಸಿದ ಘಟನೆಗಳಾದ ಆಕ್ರೋಶವಾಗಿ ಮಾರ್ಪಟ್ಟ ಅಭಿಮಾನ, ಕಲ್ಲು ತೂರಾಟ, ಪೊಲೀಸ್ ಮೇಲೆ ಹಲ್ಲೆ, ಲಾಠಿ ಪ್ರಹಾರ, ಅಶ್ರುವಾಯು ಶೆಲ್ ಸಿಡಿತ, ಕಂಠೀರವ ಸ್ಟುಡಿಯೋ ಆವರಣದಲ್ಲಿ ಗೋಲಿಬಾರ್ ಎಲ್ಲವನ್ನು ಸೇರಿಸಿ ಉಷಾ ಕಿರಮ ದಿನಪತ್ರಿಕೆ 'ಅಣ್ಣಾವ್ರು ಭೂತಾಯಿ ಮಡಿಲಿಗೆ' ಎನ್ನುವ ಟೈಟಲ್ ನೊಂದಿಗೆ ರಾಜ್ ಕುಮಾರ್ ಅಗಲಿಕೆಯ ಸುದ್ದಿ ಬಿತ್ತರಿಸಿತ್ತು.