ಫ್ಯಾನ್ಸ್‌ಗಾಗಿ 'ನಟಸಾರ್ವಭೌಮ' ಚಿತ್ರದ ಅಸಲಿ ಟೈಟಲ್ ಟ್ರ್ಯಾಕ್: ಸಾಂಗ್‌ನಲ್ಲಿ ಅಪ್ಪುವಿನ 42 ಸಿನಿಮಾ ಶೀರ್ಷಿಕೆ

ಒರಿಜಿನಲ್ ಟೈಟಲ್ ಟ್ರ್ಯಾಕ್ ಯಾವಾಗ?

'ನಟಸಾರ್ವಭೌಮ' ಸಿನಿಮಾದ ಟೈಟಲ್ ಟ್ರ್ಯಾಕ್‌ ಅನ್ನು ಕೇಳಿ ಅಪ್ಪು ಅಭಿಮಾನಿಗಳು ಫಿದಾ ಆಗಿದ್ದರು. ಪುನೀತ್ ಡ್ಯಾನ್ಸ್ ಮೂವ್ಮೆಂಟ್ಸ್‌ಗೆ ತಕ್ಕಂತೆ ಟ್ಯೂನ್ ಹಾಕಿ ಸಾಹಿತ್ಯ ರಚಿಸಲಾಗಿತ್ತು. ನಿರ್ದೇಶಕ ಪವನ್ ಒಡೆಯರ್ ಅವರೇ ಈ ಹಾಡನ್ನು ಬರೆದಿದ್ದರು. ಸಿನಿಮಾದಲ್ಲಿರುವ ಹಾಡಿನ ಸಾಹಿತ್ಯ 'ನಟಸಾರ್ವಭೌಮ ಹಿ ಈಸ್ ಕಿಂಗ್ ಆಫ್ ದಿ ಸಿನಿಮಾ' ಎಂದು ಆರಂಭ ಆಗುತ್ತೆ. ಆದರೆ, ಈ ಹಾಡಿಗೆ ಮೊದಲು ಬೇರೆಯದ್ದೇ ಸಾಹಿತ್ಯವಿತ್ತು. ಅಪ್ಪು ಅಭಿನಯದ ಎಲ್ಲಾ ಸಿನಿಮಾ ಟೈಟಲ್‌ಗಳನ್ನು ಇಟ್ಟುಕೊಂಡು ಪವನ್ ಒಡೆಯರ್ ಸಾಹಿತ್ಯ ರಚಿಸಿದ್ದರು. ಆದರೆ, ಅಪ್ಪು ಸಾಹಿತ್ಯವೇ ಬೇಡ ಎಂದು ನಿರಾಕರಿಸಿದ್ದರು.

ಟೈಟಲ್‌ ಟ್ರ್ಯಾಕ್‌ನಲ್ಲಿತ್ತು 42 ಸಿನಿಮಾ ಟೈಟಲ್

'ನಟಸಾರ್ವಭೌಮ' ಟೈಟಲ್‌ ಟ್ರ್ಯಾಕ್‌ಗೆ ಪವನ್ ಒಡೆಯರ್ ಪುನೀತ್ ಅಭಿನಯಿಸಿದ 42 ಸಿನಿಮಾಗಳ ಟೈಟಲ್ ಅನ್ನು ಬಳಸಿದ್ದರು. ಪ್ರೇಮದ ಕಾಣಿಕೆ ಚಿತ್ರದಿಂದ 'ಅಂಜನಿಪುತ್ರ' ಚಿತ್ರದ ಟೈಟಲ್‌ಗಳನ್ನೇ ಬಳಸಿ ಸಾಹಿತ್ಯ ರಚಿಸಿದ್ದರು. "ಪ್ರೇಮದ ಕಾಣಿಕೆಯಿಂದ ಭಾಗ್ಯವಂತನಾದ, ಬೆಟ್ಟದ ಹೂವು ಪಡೆದ ಭಕ್ತಪ್ರಹ್ಲಾದ" ಅಲ್ಲದೆ "ಆಕಾಶದಿ ಅಭಿಯಾಗಿ, ಕನ್ನಡ ಪೃಥ್ವಿಗೆ ನೀ ಅರಸು, ಅಣ್ಣಾ ಬಾಂಡ್ ದೊಡ್ಮನೆ ಹುಡುಗನ ನಾನ್ ಸ್ಟಾಟ್ ಸ್ಟೆಪ್ಪು ಡ್ಯಾನ್ಸ್ ವಿಥ್ ಅಪ್ಪು" ಹೀಗೆ ಅಪ್ಪು ಸಿನಿಮಾ ಟೈಟಲ್ ಬಳಸಿ ಸಾಂಗ್ ರೆಡಿ ಮಾಡಿದ್ದರು. ಆದರೆ, ಹಾಡು ಕೇಳಿದ ಬಳಿಕ ಪುನೀತ್ ರಾಜ್‌ಕುಮಾರ್ ಸಾಹಿತ್ಯವನ್ನು ಬದಲಾಯಿಸುವಂತೆ ಮನವಿ ಮಾಡಿಕೊಂಡಿದ್ದರು. ಮತ್ತೆ ಇದೇ ಟ್ಯೂನ್‌ಗೆ ಹೊಸದಾಗಿ ಸಾಹಿತ್ಯ ರಚಿಸಲಾಗಿತ್ತು.

ಒರಿಜಿನಲ್ ಸಾಂಗ್ ತಿರಸ್ಕರಿಸಿದ್ದೇಕೆ?

41 ಟೈಟಲ್ ಇಟ್ಟುಕೊಂಡು ಬರೆದ ಸಾಂಗ್ ಕೇಳಿದ ಕೂಡಲೇ ಅಪ್ಪು ಬೇಡ ಅಂದಿದ್ದರು. ನನ್ನ ಬಗ್ಗೆನೇ ಹೊಗಳಿದರೆ ಚೆನ್ನಾಗಿ ಕಾಣುವುದಿಲ್ಲ. ಅದು ಅಭಾಸ ಅನಿಸಬಹುದು. ದಯವಿಟ್ಟು ಈ ಹಾಡಿನ ಸಾಹಿತ್ಯವನ್ನು ಬದಲಾಯಿಸಿ ಎಂದು ಪುನೀತ್ ರಾಜ್‌ಕುಮಾರ್ ಹೇಳಿದ್ದರಂ‍ತೆ. ನಿರ್ದೇಶಕ ಪವನ್ ಒಡೆಯರ್‌ಗೆ ಈ ಹಾಡು ಚೆನ್ನಾಗಿದೆ ಅಂತ ಅನಿಸಿದ್ದರೂ, ಅಪ್ಪು ಒತ್ತಾಯಕ್ಕೆ ಅದೇ ಟ್ಯೂನ್‌ಗೆ ಹೊಸದಾಗಿ ಸಾಹಿತ್ಯ ರಚಿಸಿ, ಸಂಜಿತ್ ಹೆಗ್ಡೆ ಹಾಗೂ ಅಂಟೋನಿ ದಾಸನ್ ಅವರಿಂದ ಹಾಡಿಸಲಾಗಿತ್ತು. ಈಗ ಅಪ್ಪು ನೆನಪಿಗಾಗಿ ಆ ಒರಿಜಿನಲ್ ಸಾಂಗ್ ಮತ್ತೆ ಬಿಡುಗಡೆ ಮಾಡಲಾಗುತ್ತಿದೆ.

ಅಪ್ಪು ಟೈಟಲ್‌ಗಳ ಟ್ರ್ಯಾಕ್ ಯಾವಾಗ?

'ಪ್ರೇಮದ ಕಾಣಿಕೆ'ಯಿಂದ 'ಅಂಜನಿಪುತ್ರ'ದವರೆಗೂ 41 ಸಿನಿಮಾಗಳಲ್ಲಿ ನಟಿಸಿದ್ದರು. ನಟಸಾರ್ವಭೌಮ ಸಿನಿಮಾನೂ ಸೇರಿದರೆ 42 ಸಿನಿಮಾ ಆಗುತ್ತೆ. ಇಷ್ಟೂ ಟೈಟಲ್‌ಗಳು ಒಂದೇ ಹಾಡಿನಲ್ಲಿ ಇರುವ ಹಾಡು ಮಾರ್ಚ್ 15ಕ್ಕೆ ರಿಲೀಸ್ ಆಗುತ್ತಿದೆ. ನಿರ್ಮಾಪಕ ರಾಕ್‌ಲೈನ್ ವೆಂಕಟೇಶ್ ಕೂಡ ಈ ಹಾಡನ್ನು ಬಿಡುಗಡೆ ಮಾಡಲು ಒಪ್ಪಿಗೆ ಸೂಚಿಸಿದ್ದಾರೆ. ಈ ಮೂಲಕ ಪುನೀತ್ ಅಭಿಮಾನಿಗಳಿಗೆ ಪವನ್ ಒಡೆಯರ್ ಹಾಗೂ ತಂಡ ಈ ಹಾಡನ್ನು ಅರ್ಪಿಸಲಿದ್ದಾರೆ.