ಕೆಜಿಎಫ್‌ 2: ಅನಂತ್‌ನಾಗ್ ಪಾತ್ರಕ್ಕೆ ಪ್ರಕಾಶ್ ರೈ! ನಿರ್ದೇಶಕ ಪ್ರಶಾಂತ್ ನೀಲ್ ಹೇಳಿದ್ದೇನು?

ಅನಂತ್‌ನಾಗ್ ಪಾತ್ರದ ಬದಲಾವಣೆ ಇಲ್ಲ: ಪ್ರಶಾಂತ್ ನೀಲ್

ಕೆಜಿಎಫ್ 2 ಪ್ರಶಾಂತ್ ನೀಲ್ ಹೇಳಿರುವ ಪ್ರಕಾರ, ಅನಂತ್‌ನಾಗ್ ಪಾತ್ರವನ್ನು ಬದಲಾಯಿಸಿಲ್ಲ. ಅನಂತ್‌ನಾಗ್ ಪಾತ್ರವನ್ನು ಪ್ರಕಾಶ್‌ ರೈ ಮಾಡುತ್ತಿಲ್ಲ. ಬದಲಿಗೆ ಪ್ರಕಾಶ್ ರೈ ಅವರದ್ದು ಭಿನ್ನವಾದ ಪಾತ್ರ. ಕೆಜಿಎಫ್ 2 ಸಿನಿಮಾದಲ್ಲಿ ಸೇರಿಕೊಳ್ಳುತ್ತಿರುವ ಹೊಸ ಪಾತ್ರ ಎಂದಿದ್ದಾರೆ ಪ್ರಶಾಂತ್ ನೀಲ್.

ಅನುಮಾನ ಮೂಡಿದ್ದು ಏಕೆ?

ಕೆಜಿಎಫ್ ಮೊದಲ ಸಿನಿಮಾದಲ್ಲಿ ಅನಂತ್‌ನಾಗ್, ಮಾಳವಿಕಾ ಗೆ ಕತೆ ಹೇಳುವ ದೃಶ್ಯವನ್ನೇ ನೆನಪಿಸುವಂತಹಾ ಸೆಟ್‌ನಲ್ಲಿ ಅನಂತ್‌ನಾಗ್‌ ರೀತಿಯದ್ದೇ ಗೆಟಪ್‌ನಲ್ಲಿ, ಮಾಳವಿಕ ರನ್ನು ಹೋಲುತ್ತಿರುವ ಮಹಿಳೆಯ ಮುಂದೆ ಕುಳಿತಿರುವ ಚಿತ್ರವನ್ನು ಪ್ರಕಾಶ್ ರೈ ಟ್ವೀಟ್ ಮಾಡಿದ್ದರು. ಹಾಗಾಗಿ ಈ ಅನುಮಾನ ಉದ್ಭವವಾಯಿತು ಅಭಿಮಾನಿಗಳಿಗೆ. ಈಗ ಎಲ್ಲಾ ಸ್ಪಷ್ಟವಾಗಿದೆ.

25 ದಿನಗಳ ಶೆಡ್ಯೂಲ್‌

ಇಂದಿನಿಂದ ಕೆಜಿಎಫ್‌ 2 ಸಿನಿಮಾ ಚಿತ್ರೀಕರಣ ಪುನರ್‌ಪ್ರಾರಂಭವಾಗಿದ್ದು, ಪ್ರಕಾಶ್ ರೈ, ಮಾಳವಿಕಾ ಅವಿನಾಶ್, ನಾಗಾಭರಣ ಇನ್ನೂ ಕೆಲವು ನಟರು ಚಿತ್ರೀಕರಣದಲ್ಲಿ ಭಾಗವಹಿಸಿದ್ದಾರೆ. ಕಂಠೀರವ ಸ್ಟುಡಿಯೋದಲ್ಲಿ 25 ದಿನಗಳ ಶೆಡ್ಯೂಲ್‌ನಲ್ಲಿ ಚಿತ್ರೀಕರಣ ನಡೆಯಲಿದೆ. ಯಶ್ ಅವರ ದೃಶ್ಯಗಳೂ ಇದ್ದು ಕೆಲವೇ ದಿನಗಳಲ್ಲಿ ಯಶ್ ಸಹ ಚಿತ್ರೀಕರಣದಲ್ಲಿ ಭಾಗವಹಿಸಲಿದ್ದಾರೆ.

ಸಂಜಯ್ ದತ್ ಪಾತ್ರದ ಚಿತ್ರೀಕರಣ ಬಾಕಿ ಇದೆ

ಇನ್ನು ರವೀನಾ ಟಂಡನ್, ನಾಯಕಿ ಶ್ರೀನಿಧಿ ಶೆಟ್ಟಿ, ಸಂಜಯ್ ದತ್‌ ಪಾತ್ರಗಳ ಚಿತ್ರೀಕರಣ ಬಾಕಿ ಉಳಿದಿದ್ದು, ಸಂಜಯ್ ದತ್ ಆಸ್ಪತ್ರೆಯಲ್ಲಿರುವ ಕಾರಣ ಚಿತ್ರೀಕರಣ ತುಸು ತಡವಾಗಬಹುದು ಎನ್ನಲಾಗುತ್ತಿದೆ. ಸಂಜಯ್ ದತ್‌ ಪಾತ್ರದ ಚಿತ್ರೀಕರಣಕ್ಕೆ ಪ್ರಶಾಂತ್ ನೀಲ್ ಏನು ಮಾಡುತ್ತಾರೆ ಕಾದು ನೋಡಬೇಕಿದೆ.