ಮನೆ ನೋಡಿ ತುಂಬಾ ತಿಂಗಳಾಗಿತ್ತು, ಅಪ್ಪು ಸರ್ ಮನೆಗೆ ಕರೆಸಿ ಇಷ್ಟದ ಊಟ ಹಾಕಿಸಿದ್ರು: ರಾಜ್ ಬಿ ಶೆಟ್ಟಿ

ಫುಡ್ ಎಂಜಾಯ್ ಮಾಡುವವ ಒಳ್ಳೆ ಮನುಷ್ಯ

ಅಪ್ಪು ಫುಡ್ ಫೆಸ್ಟಿವಲ್ ಕುರಿತು ಮಾಹಿತಿ ನೀಡಲು ಆರಂಭಿಸಿದ ರಾಜ್ ಬಿ ಶೆಟ್ಟಿ 'ಅಪ್ಪು ಸರ್ ತುಂಬಾ ಇಷ್ಟ ಪಡ್ತಿದ್ದ ವಿಷಯಗಳಲ್ಲಿ ಫುಡ್ ಒಂದು. ಒಬ್ಬ ವ್ಯಕ್ತಿ ಊಟವನ್ನು ಎಷ್ಟು ಎಂಜಾಯ್ ಮಾಡ್ತಾನೋ ಆತ ಅಷ್ಟು ಒಳ್ಳೆಯವನು ಅನ್ನೋದು ಗೊತ್ತಾಗುತ್ತೆ, ಯಾಕಂದ್ರೆ ದಿನ ನಿತ್ಯ ಸೇವಿಸೋ ವಸ್ತುವನ್ನು ಸಂಭ್ರಮಿಸೋರು ಮಾತ್ರ ಬದುಕನ್ನು ಸಂಭ್ರಮಿಸೋಕೆ ಸಾಧ್ಯ. ಹೀಗಾಗಿ ಅವರ ಹೆಸರಲ್ಲಿ ಕರ್ನಾಟಕದ ಬೇರೆ ಬೇರೆ ಹೊಟೇಲ್‌ಗಳಲ್ಲಿ ಅವರು ಇಷ್ಟ ಪಡುತ್ತಿದ್ದ ತಿನಿಸುಗಳನ್ನು ಬರುವಂತ ಗ್ರಾಹಕರಿಗೆ ಕೊಡ್ತಾರೆ. ಈ ಮೂಲಕ ಅವರು ಇಷ್ಟ ಪಡುತ್ತಿದ್ದ ತಿನಿಸುಗಳನ್ನು ಸಂಭ್ರಮಿಸುವ ಕೆಲಸ ನಡೆಯಲಿದೆ' ಎಂದು ತಿಳಿಸಿದರು.

ಅಪ್ಪು ಸರ್ ಮನೆಗೆ ಕರೆಸಿ ಊಟ ಹಾಕಿದ್ರು

ಇನ್ನು ಇದೇ ಸಂದರ್ಭದಲ್ಲಿ ಪುನೀತ್ ರಾಜ್‌ಕುಮಾರ್ ತಮ್ಮನ್ನು ಮನೆಗೆ ಆಹ್ವಾನಿಸಿದ್ದ ಸಂದರ್ಭವನ್ನೂ ಸಹ ರಾಜ್ ಬಿ ಶೆಟ್ಟಿ ನೆನೆದರು. 'ಅಪ್ಪು ಸರ್ ಮನೆಗೆ ಕರೆದಾಗ, ನಾನು ಮಂಗಳೂರಿನವನು ಅನ್ನೋದನ್ನ ನೆನಪು ಮಾಡಿಕೊಂಡು ಹತ್ತಿರದ ಹೊಟೇಲ್‌ನಿಂದ ಒಳ್ಳೊಳ್ಳೆ ಮೀನುಗಳನ್ನು ತರಿಸಿದ್ರು. ಯಾಕಂದ್ರೆ ನಾನು ಮನೆಗೆ ಹೋಗಿ ತುಂಬಾ ದಿನಗಳಾಗಿತ್ತು. ಒಬ್ಬ ವ್ಯಕ್ತಿ ಮನೆಗೆ ಹೋಗದೇ ಇದ್ದಾಗ ಆತ ತನ್ನ ನೆಲದ ತಿನಿಸುಗಳನ್ನು ಎಷ್ಟು ಮಿಸ್ ಮಾಡಿಕೊಳ್ತಾನೆ ಹಾಗೂ ಆ ಫುಡ್ ಆತನ ಮನಸ್ಸಿಗೆ ಎಷ್ಟು ಹತ್ತಿರ ಎಂಬುದನ್ನು ಅವರು ಎಷ್ಟು ಚೆನ್ನಾಗಿ ಅರ್ಥ ಮಾಡಿಕೊಂಡಿದ್ರು. ಹೀಗಾಗಿ ಅವರನ್ನು ಹಾಗೂ ಅವರ ನೆಚ್ಚಿನ ತಿನಿಸುಗಳನ್ನು ನಾವು ಇಂದು ಸಂಭ್ರಮಿಸುತ್ತಿದ್ದೇವೆ ಮತ್ತು ಇದು ನಾವು ಅವರಿಗೆ ಕೊಡುವ ಗೌರವ' ಎಂದು ರಾಜ್ ಬಿ ಶೆಟ್ಟಿ ತಿಳಿಸಿದರು.

ಅಪ್ಪುಗೆ ಊಟವೆಂದರೆ ಬಲು ಇಷ್ಟ

ಇನ್ನು ಪುನೀತ್ ರಾಜ್‌ಕುಮಾರ್ ಅವರಿಗೆ ಊಟವೆಂದರೆ ಬಲು ಇಷ್ಟ. ಅದರಲ್ಲೂ ನಾನ್‌ವೆಜ್ ಎಂದರೆ ಪಂಚಪ್ರಾಣ ಎಂಬುದನ್ನು ಅಪ್ಪು ಹಲವಾರು ಬಾರಿ ಹೇಳಿಕೊಂಡಿದ್ದಾರೆ. ಚಿಕ್ಕ ವಯಸ್ಸಿನಲ್ಲಿ ನಟನೆ ಮಾಡಬೇಕೆಂದರೆ ತನ್ನ ನೆಚ್ಚಿನ ತಿನಿಸುಗಳನ್ನು ತರಿಸಲೇಬೇಕಿತ್ತು ಎಂದೂ ಸಹ ಅಪ್ಪು ಬಿಚ್ಚಿಟ್ಟಿದ್ದರು. ಇನ್ನು ಪುನೀತ್ ರಾಜ್‌ಕುಮಾರ್ ಐಶಾರಾಮಿ ಹೊಟೇಲ್ ತಿಂಡಿಗಳ ಪ್ರೇಮಿಯಲ್ಲ, ಹಳ್ಳಿ ಹೊಟೇಲ್‌ಗಳಲ್ಲೂ ಹಾಗೂ ನೆಲದ ಮೇಲೂ ಕುಳಿತು ಊಟ ಸೇವನೆ ಮಾಡುತ್ತಿದ್ದಂತಹ ಅಪ್ಪಟ ಊಟ ಪ್ರೇಮಿ.