2002ರಲ್ಲೇ ಬೇರೆ ನಟರಿಗಾಗಿ ಸಿನಿಮಾ ನಿರ್ಮಿಸಲು ಬಯಸಿದ್ದರು ಪುನೀತ್

2002ರಿಂದಲೂ ಕನಸು

ನಾನು 2002ರಲ್ಲಿ ನಟನೆ ಆರಂಭಿಸಿದಾಗಿನಿಂದಲೂ ಬೇರೆ ನಟರಿಗೆ ಸಿನಿಮಾ ನಿರ್ಮಿಸಬೇಕೆಂಬ ಕನಸು ಕಂಡಿದ್ದೆ. ಯಾವಾಗಲೂ ಆ ಬಯಕೆ ಇತ್ತು. ಇತರೆ ನಟರಿಗೆ, ಸಿನಿಮಾ ನಿರ್ದೇಶಕರಿಗಾಗಿ ಸಿನಿಮಾ ಮಾಡಬೇಕೆಂಬುದು ಯಾವಾಗಲೂ ಮನಸಿನಲ್ಲಿ ಇತ್ತು.

ಉತ್ತಮ ಕಂಟೆಂಟ್, ಸ್ಕ್ರಿಪ್ಟ್‌ಗೆ ಆದ್ಯತೆ

2017ರಲ್ಲಿ ಈ ಆಲೋಚನೆಗೆ ಒಂದು ರೂಪ ಸಿಕ್ಕಿತು. ಹಾಗಾಗಿ ಇದೇ ಪ್ರೊಡಕ್ಷನ್ ಕಂಪೆನಿ ಅಡಿಯಲ್ಲಿ ಸಣ್ಣದೊಂದು ಬ್ರ್ಯಾಂಡ್ ಆರಂಭಿಸಲು ಯೋಚಿಸಿದೆ. ಅದೇ ಪಿಆರ್‌ಕೆ. ಉತ್ತಮ ಕಂಟೆಂಟ್, ಒಳ್ಳೆಯ ಸ್ಕ್ರಿಪ್ಟ್ ಹಾಗೂ ಸ್ಕ್ರೀನ್ ಪ್ಲೇ ಹೊಂದಿರುವ ಚಿತ್ರಗಳೊಂದಿಗೆ ಸಾಗುವುದು ಇದರ ಗುರಿ. ಒಳ್ಳೆಯ ಸಿನಿಮಾಗಳನ್ನು ಮಾಡಲು ಪ್ರಯತ್ನಿಸಿದೆವು. ದೇವರ ದಯೆಯಿಂದ 'ಕವಲು ದಾರಿ' ಬಂದಿತು. ಅದು ಚೆನ್ನಾಗಿ ನಡೆಯಿತು.

83 ಸಿನಿಮಾಗಳಲ್ಲಿ 65 ಗೆಲುವು

ನಮ್ಮ ವಜ್ರೇಶ್ವರಿ ಪ್ರೊಡಕ್ಷನ್ ಕಂಪೆನಿ 40 ವರ್ಷದಷ್ಟು ಹಳೆಯದು. ನಮ್ಮ ಅಮ್ಮ 1975-96ರಲ್ಲಿ 'ಶ್ರೀನಿವಾಸ ಕಲ್ಯಾಣ'ದೊಂದಿಗೆ ನಿರ್ಮಾಣ ಸಂಸ್ಥೆ ಆರಂಭಿಸಿದ್ದರು. ಬಳಿಕ ನಮ್ಮ ನಿರ್ಮಾಣವು 2013ರ 'ಯಾರೇ ಕೂಗಾಡಲಿ' ವರೆಗೂ ಮುಂದುವರಿಯಿತು. ನಮ್ಮ ಕುಟುಂಬಕ್ಕೆ ನಿರ್ಮಾಣದ ಹಿನ್ನೆಲೆಯಿದೆ. ಇದುವರೆಗೂ 83 ಸಿನಿಮಾಗಳನ್ನು ನೀಡಿದ್ದೇವೆ. ಅವುಗಳಲ್ಲಿ 65 ಸಿನಿಮಾಗಳು ಬಾಕ್ಸಾಫೀಸ್‌ನಲ್ಲಿ ಅತ್ಯುತ್ತಮವಾಗಿ ಕೆಲಸ ಮಾಡಿವೆ. ಹೀಗಾಗಿ ನಮ್ಮ ಸಂಸ್ಥೆಯ ಯಶಸ್ಸಿನ ಪ್ರಮಾಣ ಅಧಿಕ.

ಕುಟುಂಬದ ಸಿನಿಮಾಗಳೇ ನಿರ್ಮಾಣ

ಈ 83 ಸಿನಿಮಾಗಳ ಸಂಪೂರ್ಣ ನಿರ್ಮಾಣವನ್ನು ಕುಟುಂಬವೇ ನಿರ್ವಹಿಸಿದೆ. ಹೆಚ್ಚಿನ ಸಿನಿಮಾಗಳು ಡಾ. ರಾಜ್ಕುಮಾರ್, ಶಿವರಾಜ್ ಕುಮಾರ್, ರಾಘವೇಂದ್ರ ರಾಜ್ ಕುಮಾರ್, ಪುನೀತ್ ರಾಜ್ ಕುಮಾರ್ ಅವರಿಗಾಗಿ ಮಾಡಲಾಗಿದೆ. ವಿನಯ್ ರಾಘವೇಂದ್ರ ರಾಜ್‌ಕುಮಾರ್ ಎರಡು ಸಿನಿಮಾ ಮಾಡಿದ್ದಾನೆ. ಈ ಎಲ್ಲ ಸಿನಿಮಾಗಳು ನಿರ್ದಿಷ್ಟ ಬ್ಯಾನರ್ ಅಡಿ ನಿರ್ಮಾಣವಾಗಿವೆ ಎಂದು ತಮ್ಮ ಕುಟುಂಬದವರಲ್ಲದ ನಟರಿಗಾಗಿಯೇ ನಿರ್ಮಾಣ ಸಂಸ್ಥೆ ಹುಟ್ಟುಹಾಕಿದ ಉದ್ದೇಶವನ್ನು ಅವರು ವಿವರಿಸಿದ್ದಾರೆ.

ಕಥೆ ಚರ್ಚಿಸಲು ಮುಕ್ತ ಅವಕಾಶ

ಪಿಆರ್‌ಕೆ ಪ್ರೊಡಕ್ಷನ್ಸ್‌ನ ಆಡಿಯೋ, ಮ್ಯಾನೇಜ್‌ಮೆಂಟ್ ಎಲ್ಲವೂ ನನ್ನ ಪತ್ನಿಯದ್ದೇ. ಅಶ್ವಿನಿಯೇ ನಿರ್ಮಾಪಕಿ. ಎಲ್ಲ ಜವಾಬ್ದಾರಿಗಳನ್ನೂ ಆಕೆಯೇ ನಿರ್ವಹಿಸುತ್ತಾಳೆ. ನಾನು ಸ್ಕ್ರಿಪ್ಟ್ ಆಯ್ಕೆಯಲ್ಲಿ ಇರುತ್ತೇನೆ. ಕಥೆ ಕೇಳುವಾಗ ನಿರ್ದೇಶಕರ ಜತೆಗೆ ನಾವೆಲ್ಲರೂ ಕೂರುತ್ತೇವೆ. ಈ ವಿಚಾರದಲ್ಲಿ ನಾವು ಬಹಳ ಮುಕ್ತ. ಎಲ್ಲರೂ ಬಂದು ಓದಲು ಕೂರುತ್ತಾರೆ. ಎಲ್ಲರೂ ಅಭಿಪ್ರಾಯ ಹೇಳುವುದರಿಂದ ಸಿನಿಮಾದಲ್ಲಿ ತಿದ್ದುಪಡಿ ಮಾಡಿ ಇನ್ನಷ್ಟು ಅಂದಗೊಳಿಸಲು ಸಹಾಯವಾಗುತ್ತದೆ ಎಂದು ಪುನೀತ್ ತಿಳಿಸಿದ್ದಾರೆ.