ಸಂದೇಶ್, ಪೂಜಾ ಗಾಂಧಿಯ 'ಜೈ ಹಿಂದ್' ಬಿಡುಗಡೆ

ಬರುವ ಶುಕ್ರವಾರ (14 ಸೆಪ್ಟೆಂಬರ್ 2012) 'ಜೈ ಹಿಂದ್' ಎಂಬ ಚಿತ್ರ ತೆರೆಕಾಣಲು ಸಿದ್ಧವಾಗಿದೆ. ತುಂಬಾ ಹಿಂದೆಯೇ ತೆರೆಕಾಣಬೇಕಿದ್ದ ಈ ಚಿತ್ರ, ಕಾರಣಾಂತರಗಳಿಂದ ಈಗ ಬಿಡುಗಡೆಯಾಗುತ್ತಿದೆ. 'ಈ ಸಂಭಾಷಣೆ' ಚಿತ್ರದ ಮೂಲಕ ಸ್ಯಾಂಡಲ್ ವುಡ್ ಅಂಗಳಕ್ಕೆ ನಟನಾಗಿ ಕಾಲಿಟ್ಟಿದ್ದ ನಟ ಸಂದೇಶ್, ಈ 'ಜೈ ಹಿಂದ್' ಚಿತ್ರದ ನಾಯಕರು. ನಾಯಕಿಯಾಗಿ ಪೂಜಾ ಗಾಂಧಿ ನಟಿಸಿದ್ದಾರೆ. ಚಿತ್ರದ ನಿರ್ಮಾಪಕರು ನಾಯಕ ನಟ ಸಂದೇಶ್ ತಂದೆ ಮೇಜರ್ ಶ್ರೀನಿವಾಸ್ ಪೂಜಾರ್.

ವೇಣು ಗೋಪಾಲ್ ನಿರ್ದೇಶನದ ಈ ಚಿತ್ರ, ಕರ್ನಾಟಕದಾದ್ಯಂತ 60 ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ. ಹೆಸರಿಗೆ ತಕ್ಕಂತೆ ಈ ಚಿತ್ರವು ದೇಶಪ್ರೇಮದ ಕಥೆ ಹೊಂದಿದೆ. ಇದಕ್ಕೆ ಅತ್ಯಂತ ಸಹಜವಾದ ಕಾರಣವಿದೆ. ಅದೇನೆಂದರೆ, ಚಿತ್ರದ ನಿರ್ಮಾಪಕರಾದ ಮೇಜರ್ ಶ್ರೀನಿವಾಸ ಪೂಜಾರ್ ಸೇನೆಯಲ್ಲಿ ಮೇಜರ್ ಆಗಿ ಸೇವೆ ಸಲ್ಲಿಸಿ ಈಗ ನಿವೃತ್ತರಾದವರು. ಅವರ ಅನುಭವಗಲೇ ಈ ಚಿತ್ರ ಮಾಡಲು ಪ್ರೇರಣೆಯಂತೆ.

ನಿವೃತ್ತರಾದ ಬಳಿಕ ಸೇನೆ ಸಂಗತಿ ಕುರಿತು ಸಿನಿಮಾ ಮಾಡಬೇಕೆಂಬ ಅವರ ಮಹಾತ್ವಾಕಾಂಕ್ಷೆಯಂತೆ ಈ ಚಿತ್ರವನ್ನು ಅವರು ನಿರ್ಮಿಸಿದ್ದಾರೆ. ಕ್ಯಾಪ್ಟನ್ ಒಬ್ಬನ ಕೆಲಸ ಏನಿರುತ್ತದೆ, ಅವನು ಅದೆಷ್ಟು ಒತ್ತಡದಲ್ಲಿ ಕೆಲಸ ಮಾಡಬೇಕಾಗುತ್ತದೆ, ಇಂತಹ ಅದೆಷ್ಟೋ ಸಂಗತಿಗಳು ಈ ಚಿತ್ರದಲ್ಲಿವೆಯಂತೆ. 'ಸಂದೇಶ್ ತುಂಬಾ ಸಾಫ್ಟ್ ಆಗಿ ಕಾಣಿಸುತ್ತಾರೆ. ಅವರಿಗೆ ಈ ಪಾತ್ರ ಮಾಡಲು ಹೇಗೆ ಸಾಧ್ಯವಾಯ್ತು' ಎಂಬ ಪ್ರಶ್ನೆಗೆ ಪೂಜಾರ್ ಉತ್ತರವನ್ನು ನೀಡಿದ್ದಾರೆ...

"ಕ್ಯಾಪ್ಟನ್ ಒಬ್ಬನ ದೇಶಪ್ರೇಮದ ಈ ಕಥೆಯನ್ನು ಸಿನಿಮಾ ಮಾಡಲು ಇಷ್ಟಪಟ್ಟಾಗ ನನ್ನ ಮಗ ಸಂದೇಶ್, ನಾನೇ ಈ ಚಿತ್ರದಲ್ಲಿ ನಟಿಸುತ್ತೇನೆ ಎಂದು ಅವನಾಗಿಯೇ ಹೇಳಿದ್ದಾನೆ. ನನ್ನ ಮಗನಿಗೆ ಹಿಂದಿನಿಂದಲೂ ಸೈನ್ಯಕ್ಕೆ ಸೇರಬೇಕೆಂಬ ಆಸೆಯಿತ್ತು. ಹೀಗಾಗಿ ಈ ಪಾತ್ರವನ್ನು ಮಾಡಲು ಅವನಾಗಿಯೇ ಮುಂದೆ ಬಂದಿದ್ದಾನೆ, ನಾನೇನೂ ಬಲಾತ್ಕಾರವಾಗಿ ಅವನಿಂದ ಈ ಪಾತ್ರ ಮಾಡಿಸಿಲ್ಲ" ಎಂದಿದ್ದಾರೆ ನಿರ್ಮಾಪಕ ಶ್ರೀನಿವಾಸ್. ಒಟ್ಟಿನಲ್ಲಿ 'ಜೈ ಹಿಂದ್' ಚಿತ್ರವನ್ನು ತೆರೆಯಲ್ಲಿ ನೋಡಬಹುದು. (ಒನ್ ಇಂಡಿಯಾ ಕನ್ನಡ)