'ಸೋಷಿಯಲ್ ಮೀಡಿಯಾ ಕೀಚಕರ ವಿರುದ್ಧ ದನಿ ಎತ್ತಿದ ಶೀತಲ್ ಶೆಟ್ಟಿ'

ಹೆಣ್ಣಾಗಿ ನನಗೆ ಸಹಿಸಲು ಸಾಧ್ಯವಿಲ್ಲ

''ಇದು ನನಗೆ ಸಂಬಂಧಿಸಿದ ವಿಷಯ ಅಲ್ಲ. ನನಗೆ ಇದರಿಂದ ವೈಯಕ್ತಿಕವಾಗಿ ಏನು ಆಗಬೇಕಾಗಿದ್ದು ಇಲ್ಲ. ಆದ್ರೆ ನನ್ನ ಜಾತಿಗೆ ಸಂಬಂಧಿಸಿದ್ದು. ಹೆಣ್ಣಾಗಿ ನನಗೆ ಸಹಿಸಲು ಸಾಧ್ಯ ಆಗದೇ ಇರುವಂತದ್ದು. ನನ್ನಂತೆ ಇದನ್ನ ಓದಿದ, ಇಲ್ಲಿಯವರೆಗೂ ನೋಡ್ಕೊಂಡು ಬಂದಿರುವ ಎಲ್ಲಾ ಹೆಣ್ಣ ಮಕ್ಕಳಿಗೂ ಸಹಿಸುವುದಕ್ಕೆ ಸಾಧ್ಯವಾಗಿರುವುದಿಲ್ಲ. ಅದಕ್ಕೆ ಮಾತನಾಡುವ ಧೈರ್ಯ ಮಾಡುತ್ತಿದ್ದೇನೆ. ತನ್ನ ಆಯ್ಕೆಗಳನ್ನ ದಿಟ್ಟವಾಗಿ ಮಾಡಿಕೊಂಡು ಮುಂದೆ ಹೋಗುತ್ತಿರುವ ಯಾರೋ ಹೆತ್ತ ಹೆಣ್ಣು ಮಕ್ಕಳಿಗೆ, ಬಟ್ಟ ಬಹಿರಂಗವಾಗಿ ಡ*....ಸೂ*, ದೈಹಿಕವಾಗಿ ಅವರುಗಳನ್ನು ಅವಮಾನ ಮಾಡುತ್ತಿರುವ ಕೆಟ್ಟ ಅಷ್ಟೇ ಹುಂಬ ಮನಸ್ಥಿತಿಗಳಿಗೆ, ಹಾಗೆ ಅದನ್ನ ಎಂಜಾಯ್ ಮಾಡುತ್ತಿರುವ ಮನಸ್ಥಿತಿಗಳಿಗೂ ನನ್ನದೊಂದು ಧಿಕ್ಕಾರ'' ಎಂದು ಶೀತಲ್ ಶೆಟ್ಟಿ ಕಿಡಿಕಾರಿದ್ದಾರೆ.

ನಾನು ಟಾರ್ಗೆಟ್ ಆಗಬಹುದು

''ನಾಳೆಯಿಂದ ಈ ಮನಸ್ಥಿತಿಗಳು ನನ್ನನ್ನು ಹೀಗೆ ಕಾಡಬಹುದು ಎನ್ನುವ ಅರಿವಿದ್ದರೂ ನನಗೆ ಯಾಕೋ ಸುಮ್ಮನಿರುವ ಮನಸ್ಸಾಗ್ತಿಲ್ಲ...ಬನ್ನಿ ನೋಡ್ಕೋಳ್ಳೋಣ'' ಎಂದು ಶೀತಲ್ ವಿವರವಾಗಿ ಬರೆದು ಆಕ್ರೋಶ ಹೊರಹಾಕಿದ್ದಾರೆ.

ಕನ್ನಡಮ್ಮನ ಅಭಿಮಾನದ ಹೆಸರು ತರಬೇಡಿ

ಮತ್ತೊಂದು ಪೋಸ್ಟ್‌ನಲ್ಲಿ ಮತ್ತಷ್ಟು ನಟಿಯರನ್ನು ಕೆಟ್ಟದಾಗಿ ಕಾಮೆಂಟ್ ಮಾಡಿರುವ ಫೋಟೋಗಳನ್ನು ಶೀತಲ್ ಹಂಚಿಕೊಂಡು ''ನನ್ನ ಕನ್ನಡ ತಾಯಿ ನನಗೆ ಬೇರೆಯವರನ್ನು ದ್ವೇಷಿಸಲು ಕಲಿಸಿಲ್ಲ. ನನ್ನ ಕನ್ನಡ ನಾಡಲ್ಲಿ ಹೆಣ್ಣನ್ನ ಅಸಹ್ಯವಾಗಿ ನಿಂದಿಸುವ ಪರಿಪಾಠ ಇಲ್ಲ. ದಯವಿಟ್ಟು ಇವುಗಳಿಗೆ ಕನ್ನಡಮ್ಮನ ಅಭಿಮಾನದ ಹೆಸರು ತರಬೇಡಿ. ಇದು ಒಬ್ಬರ ಬಗ್ಗೆ ನಾನು ಮಾತಾಡ್ತಿರೋದಲ್ಲ ನಮ್ಮೆಲ್ಲರ ಪರವಾಗಿ ಮಾತಾಡ್ತಿರೋದು'' ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇದು ಸಮಾಜಕ್ಕೆ ಮಾರಕ

''ಟ್ರೋಲ್ ಪೇಜ್‌ಗಳನ್ನ ನಾನು ಫಾಲೋ ಮಾಡ್ತೀನಿ. ಕ್ರಿಯೇಟಿವ್ ಆಗಿರುವ ಮಜವಾಗಿರೋ ಮೀಮ್‌ಗಳನ್ನ ಎಂಜಾಯ್ ಮಾಡ್ತೀನಿ. ಆದ್ರೆ, ಇದು ಕ್ರಿಯೇಟಿವಿಟಿ ಅಲ್ಲ. ಇದನ್ನು ನೋಡಿ ಸುಮ್ಮನಿರುವುದಕ್ಕೆ ಸಾಧ್ಯವೇ ಇಲ್ಲ. ದಯವಿಟ್ಟು ಇಂಥವುಗಳನ್ನ ನೋಡಿ ಎಂಜಾಯ್ ಮಾಡಬೇಡಿ. ಇದು ಸಮಾಜಕ್ಕೆ ಮಾರಕ. ಇಂಥವುಗಳನ್ನ ಕಂಡಾಗ ಖಂಡಿಸಿ. ನಮ್ಮ ನಾಡಿನ ಸ್ವಾಸ್ತ್ಯ ಕಾಪಾಡಿ. ನನ್ನ ಬೇಸರ ಟ್ರೋಲ್ ಪೇಜ್‌ಗಳ ವಿರುದ್ಧ ಅಲ್ಲ.'' ಎಂದು ಶೀತಲ್ ಶೆಟ್ಟಿ ಸ್ಪಷ್ಟನೆ ಸಹ ಕೊಟ್ಟಿದ್ದಾರೆ.