ಜನಪ್ರಿಯತೆಯಲ್ಲಿ ರಜನಿಕಾಂತ್ ರನ್ನು ಹಿಂದಿಕ್ಕಿದ ವಿಜಯ್

ಕಾಲಿವುಡ್ ನ ಅತಿ ಹೆಚ್ಚು ಜನಪ್ರಿಯ ತಾರೆ ಯಾರು? ಈ ಪ್ರಶ್ನೆಗೆ ಮುಲಾಜಿಲ್ಲದೆ ಸಿಗುವ ಉತ್ತರ ''ಸೂಪರ್ ಸ್ಟಾರ್ ರಜನಿಕಾಂತ್''. ಆದ್ರೀಗ ಈ ಲೆಕ್ಕಾಚಾರ ತಲೆಕೆಳಗಾಗಿದೆ. ಕಾಲಿವುಡ್ ನ ಟಾಪ್ ನಟರ ಪಟ್ಟಿಯಲ್ಲಿ ರಜನಿಯನ್ನೂ ಮೀರಿಸುವ ಮಟ್ಟಕ್ಕೆ ಬೆಳೆದಿದ್ದಾರೆ ಇಳೆಯದಳಪತಿ ವಿಜಯ್.

'ಫೋರ್ಬ್ಸ್ ಇಂಡಿಯಾ' ಅನ್ನುವ ಮ್ಯಾಗಜೀನ್ ಹೊರತಂದಿರುವ ಈ ಸಾಲಿನ 'ಭಾರತದ ಟಾಪ್ 100 ಸೆಲೆಬ್ರಿಟಿ'ಗಳ ಪಟ್ಟಿಯಲ್ಲಿ ರಜನಿಕಾಂತ್ ರನ್ನ ಹಿಂದಿಕ್ಕುವ ಮೂಲಕ ಕಾಲಿವುಡ್ ನ ಜನಪ್ರಿಯ ತಾರೆಯಾಗಿದ್ದಾರೆ ವಿಜಯ್.

ವಿಜಯ್, ಈ ಮಟ್ಟಕ್ಕೆ ಜನಪ್ರಿಯವಾಗುವುದಕ್ಕೆ ಈ ವರ್ಷ ತೆರೆಕಂಡ 'ಕತ್ತಿ' ಚಿತ್ರ ಕಾರಣ. ಬ್ಲಾಕ್ ಬಸ್ಟರ್ ಚಿತ್ರವಾದ 'ಕತ್ತಿ', ವಿಜಯ್ ಗೆ ಜನಪ್ರಿಯತೆ ಮತ್ತು ಗಳಿಕೆ ಎರಡನ್ನೂ ಡಬಲ್ ಮಾಡಿಕೊಟ್ಟಿದೆ. ಆದ್ರೆ ತಲೈವಾ ಅಭಿನಯದ 'ಕೊಚ್ಚಡಿಯನ್' ಮಕಾಡೆ ಮಲಗಿದ ಕಾರಣ ರಜನಿ ಸ್ಥಾನ ಏರುಪೇರಾಗಿದೆ. [ಅಗ್ರಸ್ಥಾನದಿಂದ ಶಾರುಖ್ ಕೆಳಕ್ಕೆ ತಳ್ಳಿದ ಸಲ್ಮಾನ್]

ಖ್ಯಾತ ಸಂಗೀತ ನಿರ್ದೇಶಕ ಎ.ಆರ್.ರೆಹಮಾನ್ ಇದೇ ಪಟ್ಟಿಯಲ್ಲಿ 13 ನೇ ಸ್ಥಾನಗಳಿಸಿದ್ದಾರೆ. ಜನಪ್ರಿಯತೆ ಮತ್ತು ಗಳಿಕೆಯ ಆಧಾರದ ಮೇಲೆ 'ಫೋರ್ಬ್ಸ್ ಇಂಡಿಯಾ' ಈ ಪಟ್ಟಿ ತಯಾರಿಸಿದ್ದು, ಬ್ಯಾಡ್ ಬಾಯ್ ಸಲ್ಮಾನ್ ಖಾನ್ ಅಗ್ರಸ್ಥಾನ ಗಳಿಸಿದ್ದಾರೆ. ಎರಡನೇ ಮತ್ತು ಮೂರನೇ ಸ್ಥಾನದಲ್ಲಿ ಕ್ರಮವಾಗಿ ಅಮಿತಾಬ್ ಬಚ್ಚನ್ ಮತ್ತು ಶಾರೂಖ್ ಇದ್ದಾರೆ. (ಏಜೆನ್ಸೀಸ್)